華為今日在港發佈一部中階手機 G7 Plus，強調 90％ 金屬佔比，採用 Qualcomm Snapdragon 616 八核 CPU，3GB RAM，內置儲存空間有32GB，另可插 microSD 擴充至 128GB。具有指紋認證功能的 G7 Plus 擁有 1,300萬像素 RGBW 感光元件主鏡頭及500萬像素前鏡。想知更多就留意以下評測啦！
G7 Plus 話就話係一部中階機，但外型一啲都唔中階。擁有5.5吋全高清屏幕嘅 G7Plus 金屬佔機身90%，係就係可能令機身重咗啲，但感覺更實在，而機面玻璃有2.5D 設計，畫面更有立體感，好似浮出黎咁，依兩點加上機身造工仔細都令部機美感加強，更帶一點旗艦機味道。不過要留意，金屬機背可能有啲跣手，而用咗一陣機身有輕微發熱，籮文隻手就出手汗，金屬機身又變咗有啲啜手。不過要靚呀嘛，手感有少少瑕疵又邊有人介意！
▲金屬機背可能有啲跣手，而用咗一陣機身有輕微發熱，籮文隻手就出手汗，金屬機身又變咗有啲啜手
▲機右側有音量制開關制
▲機背有相機及指紋識別器
▲機底可見喇叭及 MircoUSB 位
▲2.5D 玻璃實在令美感上生色不少
早前籮文試過同樣係 Huawei 嘅 Mate S，我評佢為「將指紋識別器用到盡」。見到 G7Plus 當然期待佢有同樣表現啦，點知差好遠… Mate S 嘅指紋識別器可以俾你左右 Swap 上下 Scroll，睇相嘅時候非常方便。今次 G7Plus 嘅指紋識別器就只可以上下拉通知欄，影相時當快門。雖然只係冇得「左右」仲有得「上下」，但你諗留意吓你平時用手機，「左右」多定係「上下」多。相信 Huawei 係希望為 Mate S 留一啲明顯優勢先封咗 G7Plus 指紋識別器嘅某啲功能。不過同 MateS 一樣，註冊指紋極快，掂咗三四下就話完成，我仲以為自己 Skip 咗步驟，原來 G7Plus 同 MateS 等有指紋功能嘅 Huawei 機一樣，有學習嘅技術，一路用佢就一路繼續收集你指紋。
▲註冊指紋極快，掂咗三四下就話完成，我仲以為自己 Skip 咗步驟，原來 G7Plus 同 MateS 等有指紋功能嘅 Huawei 機一樣，有學習嘅技術，一路用佢就一路繼續收集你指紋。
▲依度可以見到指紋識別器可以做到嘅嘢，接電話、停鬧鐘…
【評測】Huawei nova 12s 外形 手感 屏幕 相機 操作 效能開箱評測 【評測】Huawei Pura70 Ultra 國行 外形 手感 相機 屏幕 網絡 效能開箱評測 【評測】Huawei Pocket 2 國行 外型 手感 體驗 屏幕 相機 效能開箱評測
Huawei G7Plus 擁有 1,300萬像素 f2.0光圈主鏡頭，搭配光學防手震(OIS)技術，而且有雙色LED閃光燈，最主打嘅就係 RGBW 感光元件，除咗三原色外加上白色，暗光環境下就可以提高感光度，用黎夜拍就更出色啦！而且有幾種趣味拍照模式，例如美食、美顏等等，仲有一個化妝 Mode，用 500萬像素前置鏡頭自拍時可以幫你化埋妝添！「車，用美妝相機 App 未得囉」。雖然 美妝相機 App 仲多妝俾你揀，不過 G7Plus 有實時預覽呀嘛，用 App 要影完相 import 入去搞又點同呢！而且化妝功能支援最多兩人合照，第三個入鏡嘅人就要素顏啦！
▲影相介面繼續係似 iOS 相機
▲f2.0 大光圈，淺景深效果好易做到
▲1,300萬像素都夠用啦，加上有 OIS。放大見到冇乜鬆郁矇情況
▲化妝功能就係咁囉，我知， model 本身都有化妝，好難睇到效果呀嘛
▲咁樣得未？效果非常明顯，但係自唔自然呢就見人見志啦
▲化妝功能支援最多兩人合照，第三個入鏡嘅人就要素顏啦
G7Plus 嘅 5.5吋全高清屏幕，擁有高達 1920×1080 分辨率，機內預載籮文最鍾意嘅 As One 嘅 Candy Ball MV，睇到色彩飽和度非常唔錯，加上 2.5D 玻璃畫面令畫面更富立體感，好似浮起咗一樣。不過睇 MV 時就暴露出一個弱點，就係喇叭音量有啲細，用家都係戴返耳機啦。
▲機內預載籮文最鍾意嘅 As One 嘅 Candy Ball MV，睇到色彩飽和度非常唔錯，加上 2.5D 玻璃畫面令畫面更富立體感，好似浮起咗一樣。
Huawei 嘅機喺籮文心目中都係機身設計唔錯，依部都唔例外，金屬機身加上2.5D 玻璃，令個樣更似旗鑑。而依個價位黎講，影相效果亦不過不失，化妝功能亦好搞笑（實用程度就要問女孩子）。至於指紋識別功能，雖然冇 MateS 同樣功能，令籮文感到有點兒失望，但 Huawei 將指紋識別功能帶到中階機市場，讓更多人有機會享受依個功能，都係好事！
售價：$ 2,980
查詢：8128 8810（Huawei）
【評測】Huawei nova 12s 外形 手感 屏幕 相機 操作 效能開箱評測 【評測】Huawei Pura70 Ultra 國行 外形 手感 相機 屏幕 網絡 效能開箱評測 【評測】Huawei Pocket 2 國行 外型 手感 體驗 屏幕 相機 效能開箱評測
