iOS 人自然鍾意用 iPhone，至於 Android 人，對於想第一時間獲得更新的一批用家，好多都會將目光放係 Nexus 系列。今年的新機 Nexus 5X 終於係今日接受預訂，下星期一拿得貨，而 Edward 今日就已取得 Nexus 5X 港行，大家不妨先睇睇筆者嘅評測，再決定係咪入手都未遲呀！而家先為大家帶來部分測試先。
首先拿到部 Nexus 5X，難得成家人「齊齊整整」，筆者自然睇下邊部比較靚啦！老實講部部機都係用相同物料，機背採用聚碳酸酯物料（即係強化塑膠），3 隻色拿上手「膠感」都幾重，不過呢種設計就勝在機身夠輕，真係搭地鐵或者搭巴士，要搭長途車成個零鐘拿住部電話都唔會累。唯一就係機背同機邊物料都幾跣手，建議笠番個保護殼 / 套先用會比較安全。
▲機背用塑膠物料，膠感都算幾重。
▲但好處係部機都真係好輕！
▲SIM 卡槽位於機身左側，採用 Nano SIM。另外要提提大家，Nexus 5X 不設插 microSD 卡，如果會裝好多 APP 嘅用家建議買 32GB 比較穩陣。
▲開關及音量鍵位於機身右側。
至於大家問筆者邊隻顏色靚？我就特別鍾情於粉藍色啦（官方稱為冰晶色），呢隻色同唔少女士勁 like 嘅 Tiffany Blue 有幾分接近，不過就再淺藍啲，好處係無論男士定係女士拿上手都唔失禮，襯衫都唔難，加上 Nexus 手機好少可會出黑白以外嘅色系（印象中只係得 Nexus 5 出過紅色，而個次都係 LG出！ [感謝讀者提醒!!]），既然今次第一次 LG 玩得咁盡，值得支持下嘅。
▲三隻 Nexus 5X 顏色，筆者自己就只鍾意粉藍色啦，夠特別呀嘛！大家認同？
▲至於機身大細比較，可見同 G4（中）同埋 iPhone 6s Plus（右）比較，Nexus 5X 明顯較細部。
Nexus 5X 採用 5.2 吋 1080p 熒幕，機身闊度只有 72.6mm，對於一般人來講，只要手唔係特別細，單手操控都應該唔會有太大問題。不過部機邊框都做得比較窄，筆者左手拿機個時，就試過揸得太實，搞到虎口位誤觸熒幕。不過筆者覺得如果大家配番個邊位會升高少少嘅保護殼 / 套，應該可以解決到呢個誤觸問題。
▲採用 5.2 吋熒幕，單手操控唔算難。
▲但係部機邊框似乎有啲幼，搞到筆者有時揸得部機太實，虎口位會誤觸熒幕。
【教學】「ImageFX」Google AI 繪圖工具教學 免費使用、一鍵生成旅行／食物圖片 挖角多名 Google AI 專家 Apple 瑞士蘇黎世設神秘實驗室 人工智能脫衣程式 強制從 App Store 下架 Apple 被批反應緩慢
至於熒幕方面，Nexus 5X 造工都算係唔錯，用來睇網頁都算幾 sharp，就算唔放大都睇到細字；而且可視角度都算高，就算從側面睇熒幕都唔會變暗。不過同同廠嘅 G4，同埋 iPhone 6s Plus 放埋一齊睇，Nexus 5X 嘅熒幕就有明顯偏黃問題了（iPhone 6s Plus 色溫最接近白色，G4 就偏藍，同 Nexus 5X 成兩極端），對於追求熒幕完美嘅用家來講，可能會有少少失望。但老實講：3 千零蚊部 Nexus，算係咁㗎啦！最少筆者角度係可以接受到先。
▲Nexus 5X（左）同 G4（中）同埋 iPhone 6s Plus（右）比較，可見 iPhone 熒幕比較接近真白色，G4 就明顯偏藍，而 Nexus 5X 就有明顯偏黃問題。
▲可視角度方面，iPhone 6s Plus 算係幾高，係較到最光熒幕亮度個時，側面都無變暗或變色。
▲至於 LG G4，就算熒幕亮度較至最光，係側面睇可視角度都係較低，明顯暗咗落來。
▲令筆者比較驚喜嘅係，Nexus 5X 平 LG G4 一截，但個熒幕可視角度竟然可以媲美 iPhone 6s Plus！係側面睇都唔會變暗同變色，抵讚！
今代 Nexus 終於肯加入指紋辨識器，支援指紋解鎖，對於唔鍾意輸入密碼或者畫圖案解鎖嘅 Android 用家來講，終於可以好似 iPhone 用家咁一按手指即解鎖囉。筆者亦試過，登記指紋個時已經超方便，只係禁隻手指落辨識器度 6 至 7 次已經登記完成，快過任何一部有指紋解鎖嘅手機好多！而且解鎖上亦十分快，基本上一放隻手指落辨識器，熒幕已經亮起，而且靈敏度仲好高，呢一點真係值得一讚！
▲Nexus 5X 指紋辨識器位於機背鏡頭下方位置，呢個位係好多人揸住部機個時食指擺放嘅位置，筆者就建議大家用食指解鎖啦，最就手！
▲登記指紋已經超簡單，禁 6、7 下就完成，快過絕大部分有指紋解鎖嘅手機！另外 Nexus 5X 解鎖都好快，基本上 1 秒都唔洗就解到。不過試玩影片製作中，請大家等等……
至於 Nexus 5X 採用 Qualcomm Snapdragon 808 六核心處理器，用個時會唔會發熱搞到辣手？筆者係用安兔兔評測跑分個時拿起部 Nexus 5X，就唔太覺部機有明顯發熱情況（當然筆者拿機係拿住機背下半部分）。之後再用測溫槍量度，發覺其實發熱部位都係位於鏡頭附近位置，但最熱嘅時候都只係 39.4 度，只係微溫唔覺辣手；而中間同下半部，更加只係 30 度左右，所以大家就唔洗擔心部機會發熱影響使用暢順度啦。
▲用安兔兔評測跑分時，Nexus 5X 處於 full-load 狀態，但筆者拿住部手機都唔覺辣手。
▲再用測溫槍一度，原來發熱位置集中係機頂鏡頭附近，但都只係 39.4 度，只屬微溫唔辣手。
▲至於機背中間同埋機背底部位置，溫度分別都只係 31.5 度同埋 30.1 度，完全只能用「冷靜」來形容，大家唔洗擔心啦。
另外，Nexus 5X 本身亦支援 Qualcomm 嘅 QuickCharge 2.0 快充功能，所以跟機火牛都支援快充，輸出電壓達到 3A，呢點真係連同廠嘅 G4 都做唔到！！所以真係值得一讚。不過個火牛設計同埋跟機 USB 線真係好怪，因為 Nexus 5X 採用 USB Type-C 端子，係第一部採用呢個端子嘅 Nexus 系列手機，本來係好事來，但筆者試過之後，可以話係除非大家係用新 MacBook 啦，又或者大家手上有具備 USB Type-C 插槽嘅外置充電器，否則要係街度幫部手機充電，咁就要另購一條 USB（傳統插頭）去 USB Type-C 嘅線啦，如果唔係真係睇你點樣充電！
▲今代 Nexus 5X 終於改用 USB Type-C 插槽。
▲不過跟機條線兩邊都係 Type-C 插頭，叫人點樣係街度駁外置充電池充電喎！！
筆者覺得就連個火牛都係怪怪哋，佢只係得個 USB Type-C 插槽，即係話個火牛只係可以拿來差 Nexus 5X……（呀唔係嘅，用來差新 MacBook 都得 sosad……）。想幫其他手機差電？麻煩駁番個新 MacBook 嘅 USB Type-C to USB 轉插，再加番條 USB 線，咁就得勒！（哂氣……）
▲跟機火牛都算輕，帶去旅行都唔算阻定。
▲手機支援 QuickCharge 2.0 快充，火牛電壓輸出亦有 3A，天生一對！
▲但因為跟機 USB 線兩邊都係 Type-C 插頭，搞到火牛都局住用 USB Type-C……
▲想個火牛可以幫其他手機充電？裝番個 Apple 為新 MacBook 而設嘅 USB Type-C to USB 2.0 插線囉！Google + Apple 完美結合 LoL！
【教學】「ImageFX」Google AI 繪圖工具教學 免費使用、一鍵生成旅行／食物圖片 挖角多名 Google AI 專家 Apple 瑞士蘇黎世設神秘實驗室 人工智能脫衣程式 強制從 App Store 下架 Apple 被批反應緩慢
整體來講，Nexus 5X 作為一部只係 3 千零蚊但擁有旗艦規格嘅 Nexus 系列手機，用落無論手感定係順暢度都真係唔錯！不過問題係個跟機充電火牛個設計真係好 stupid，只係可以拿來幫部 Nexus 5X（充其量加多部新 MacBook……）充電，如果屋企人唔係用 Nexus 5X 或者唔係用 USB Type-C 插槽嘅手機，就要用另一個 USB 充電器幫手機充電；就算 Nexus 5X 用家，出街要用「尿袋」充電都要另外買條有傳統 USB 插槽嘅 USB Type-C 線先至得，真係好 stupid 嘅設計。但除咗呢樣，筆者暫時都未搵到可以嚴重挑剔嘅位。
當然，大家可能會問：咁 Nexus 5X 影相得唔得？用落有冇 bug？舊電襟唔襟用？大家俾啲時間筆者啦，畢竟由拿到上手到出呢篇文，筆者只係用咗三個鐘。稍後或聽日會為大家帶來更多 Nexus 5X 嘅測試同體驗報告，想知更多就要留意住我哋啦！
售價：$3,398（16GB）/ $3,898（32GB）
查詢：Google（https://store.google.com/product/nexus_5x）
【教學】「ImageFX」Google AI 繪圖工具教學 免費使用、一鍵生成旅行／食物圖片 挖角多名 Google AI 專家 Apple 瑞士蘇黎世設神秘實驗室 人工智能脫衣程式 強制從 App Store 下架 Apple 被批反應緩慢
