頭先就同大家幫部 iPad Pro 開咗箱，又同大家分享過基本手感，不過相信大家更想知道 iPad Pro 嘅兩樣新配件：Smart Keyboard Cover for iPad Pro 同埋 Apple Pencil。究竟用起來感覺係點？就等 Edward 先同大家開箱睇睇個鍵盤 Cover，同埋同大家分享下初步試用後嘅感受啦。
▲要開箱囉！
▲一打開盒，就見到個鍵盤 Cover 同埋說明書個啲嘢，包裝好簡單。
▲表面質感同普通 iPad 嘅 Smart Cover 差唔多。
▲入面係絨布，接觸熒幕表面，不過會比較痴塵。
▲厚啲個個位再揭開就見到個鍵盤。
至於安裝方面，Smart Keyboard Cover for iPad Pro 都算幾容易，其實大家會見到 iPad Pro 左側同埋鍵盤 Cover 上面都各有 3 點金屬接點，只要啪埋一齊就完成安裝㗎啦，超簡單。
▲Smart Keyboard Cover 同埋 iPad Pro 左側都有 3 點金屬接觸，啪埋一齊就完成接駁。
▲跟住再 cover 埋就可完全保護熒幕表面。
▲不過因為佢只係普通 Smart Cover，所以機底係無任何保護嘅，大家就要自行想辦法保護佢啦，唔係肯定會刮花。
▲裝上 Smart Keyboard Cover 之後其實都幾厚……
【評測】MacBook Pro M4 2024 詳細效能評測 + 選購指南分析 7 大要點 【評測】Mac mini M4 2024：進階用家最應該買的 Apple 電腦 效能、日常應用詳細評測分析 【教學】iOS 18.1 如何用 Apple Intelligence 只需 2 個設定 + 香港免 VPN 也可用
既然 Smart Keyboard Cover 叫做 Keyboard，重點自然係個鍵盤度啦。筆者用過之後，就發覺佢係打字上都算幾舒服，甚至覺得比新 MacBook 嘅鍵盤有更深嘅鍵深，就算長時間打字都唔會太累（雖然呢個鍵盤並非採用機械式鍵盤）。另外，鍵盤亦十分穩陣，因為佢晾住機身個位都有磁石設計，就算拿起機身，鍵盤都唔會從 iPad Pro 機身甩出來；而斜晾住機身個時，亦唔覺有頭重尾輕，機身會向後翻嘅情況，個設計都算做得幾好。另外，鍵盤唔止採用 full-size 鍵盤設計，鍵距剛剛好，感覺就好似係 MBA 鍵盤上面打字咁；而且按鍵都好齊全，唔止有埋數字鍵，就算轉換輸入法，連組合鍵都唔洗襟，只要按下左下角嘅按鍵就得，設計得好體貼。另外，如果大家有用開 Mac 電腦嘅話，唔少組合鍵係 iPad Pro + Smart Keyboard Cover 上面都用得番，尤其是 Command + Tab，仲可以取代雙按 Home 鍵切換使用中嘅程式，呢個真係超好用嘅組合鍵。
▲打開鍵盤之後再如上圖般就可以轉換為鍵盤打字模式。
▲當轉換做呢個模式個時，虛擬鍵盤會自動收起，設計好體貼。
▲座檯模式嘅側面同埋背面圖，可見 iPad Pro 機身係呢個設計下都幾穩陣。
▲呢個交接位其實都有磁石攝住，安裝完成後就算單手抽起 iPad Pro，鍵盤都唔會甩。
▲鍵盤採用 Full-Sized Keyboard 設計，鍵距適中。
▲有一定鍵深，筆者覺得用佢打字甚至比新 MacBook 嘅鍵盤更舒服。
▲一襟呢個按鍵就可以切換輸入法，好體貼。
▲襟呢個 Command + Tab 組合鍵，就可以切換使用中嘅程式，以後要咁做就唔洗雙按 Home 鍵了。
▲仲有其他組合鍵，其實好多都同 Mac 電腦嘅組合鍵相同，有用開 Mac 機嘅 wire 民應該好容易上手。
整體來講，雖然 Smart Keyboard Cover 只能保護 iPad Pro 嘅熒幕，機底難免有機會被刮花，保護性唔算太足，但從另一角度去諗，如果保護埋機底，本身 Smart Keyboard Cover 都已經成 300 幾克，再加埋就真係太重了，所以 Apple 為照顧整體平衡而作出呢個選擇，都算合理。至於舒適度方面，Edward 覺得佢真係算做得唔錯，雖然感覺比 Microsoft Surface Pro 嘅鍵盤仲差少少，但整體表現都算可以接受，尤其是用起來真係有用緊 Mac 電腦嘅感覺，令 Edward 覺得呢個似係 Apple 融合 Mac OS 同埋 iOS 兩個作業系統嘅第一步。所以呢個鍵盤保護蓋索價高達 $1,348，但都算值得入手。最後提一提大家，雖然鍵盤保護蓋有黑、白兩款選擇，但白色比較易整污糟，如果你問 Edward，我就會建議大家入手太空灰嘅 iPad Pro，再加上黑色嘅 Smart Keyboard Cover，成套睇起來就 Pro 好多啦！
售價：$1,348
查詢：Apple（800 908 988）
【評測】MacBook Pro M4 2024 詳細效能評測 + 選購指南分析 7 大要點 【評測】Mac mini M4 2024：進階用家最應該買的 Apple 電腦 效能、日常應用詳細評測分析 【教學】iOS 18.1 如何用 Apple Intelligence 只需 2 個設定 + 香港免 VPN 也可用
