真係開心，以後籮文每個星期都有一個機會同大家分享一下科技評測以外嘅嘢。今次想同大家分享一個故事，話說籮文有個朋友，佢好鍾意聽電子跳舞音樂（下稱 EDM，可以參考早前的文章）…
佢之前仲係單身嘅時候，都會相約朋友一齊落老蘭 Clubbing，當其他朋友都係去獵食嘅時候，佢就喺 Club 入面對住個 DJ 台，一邊聽住強勁節拍嘅音樂，睇住 DJ 同埋燈光效果點樣帶動氣氛 ，一邊好投入咁跟住節奏跳舞。就算期間有女仔埋身，佢都冇任何暇想，因為佢已經將全副精神放到節奏上面。
▲其他人眼中，佢就好似上圖嘅男仔咁，人人都去獵食嘅時候，佢就企係 DJ 台前享受自己嘅世界。
直到佢同依家個女朋友一齊咗，初期都有繼續落 Club，但慢慢發現女朋友唔鍾意，並開始有怨言，「又玩到咁夜！」「又去識女仔呀？」「你試吓問其他女仔，邊有人會俾男朋友去蒲？」。當然我朋友試過帶埋女朋友去，希望女朋友可以知道落 Club 係咩一回事，但由於女朋友本身對依種音樂冇興趣，所以都唔會明白點解我朋友嘅諗法，只會見到場內有好多衣著性感嘅女仔，認為依啲就係我朋友鍾意落 Club 嘅原因。
我朋友覺得好無辜，因為佢去 Clubbing 並唔係為識女仔，而係因為佢真心喜歡電子跳舞音樂。無可否認，大部份香港人都唔鍾意另一半去 Clubbing，一來可能係佢本身俾唔到足夠信心佢嘅伴侶，二來 Clubbing 文化受電影電視等主流媒體渲染，令人將 Clubbing 同一夜情、性生活等字眼掛勾。所以佢女朋友無錯架，唔想男朋友去 Clubbing 都只係出於緊張同關心。
雖然事實上有唔少人去 Clubbing 都係為結識異性，但都有人係為咗聽下音樂跳下舞，享受一下氣氛，返工辛苦咗成個星期，去釋放一下生活壓力。我朋友覺得，依家唔係文革時期，依家係廿一世紀，點解仲要連聽咩音樂都被禁止，只可無奈地心諗：「想聽容祖兒陳奕迅就可以去聽演唱會，點解想聽 EDM 就要落 Club，要俾人覺得係去識女仔？」
見到我朋友咁慘，我就幫佢諗下有乜解決方法啦。知道外國每年都有舉行大型的電子音樂節，例如全球巡迴的 Ultra Music Festival、比利時舉行的 Tomorrowland 、主要於美國舉行的 EDC Electric Daisy Carnival 等等，就算近至國內或台灣都有具規模的電子音樂節活動，全部都邀請到國際級 DJ 演出，而重點係：唔係喺 Club 舉行，而喺更大嘅場地，例如體育館，甚至戶外大草地上舉行，唔再係陰陰沈沈嘅 Night Club，出席者全部都當係嘉年華咁玩，普世歡騰。出席依啲國外嘅電子音樂節係我朋友其中一個夢想，但夢想歸夢想，奈何佢冇錢冇時間。
▲比利時舉行的 Tomorrowland 音樂節，淨係睇圖都覺得形象比 Clubbing 正面好多啦！
好彩，我同我朋友講，近年有一個香港團隊致力於推動香港 EDM 發展，不定舉辦一啲大型活動，請來世界級 DJ ，將 EDM 由 Night Club 帶到亞洲國際博覽館等場地，將 EDM 帶到主流場地。佢地簡直係我朋友嘅救命恩人，終於「想聽容祖兒陳奕迅就可以去聽演唱會，想聽 EDM 唔一定要落 Club」。
之後我朋友同女朋友講，「BB，我聽日約咗幾個 Friend 去聽音樂會，晏啲返。」女朋友話：「哦好呀。」Yeah，成功過骨！
雖然今次我朋友成功過骨，不過依個方法都係治標唔治本，女朋友仍然會覺得去聽 EDM 就係唔乖。我在此呼籲大眾正視電子跳舞音樂，聽 EDM 唔代表係爛蒲友，每種音樂都有屬於佢嘅地方，聽流行曲可能係去紅館，聽 Orchestra 就要去大會堂演奏廳，而 Night Club 就係 EDM 嘅屋企。你去紅館睇演唱會都不能夠排除有其他觀眾拍手打錯拍子，去 Club 當然都阻止唔到人哋親熱。無論你喜歡嘅音樂種類係乜，最緊要用自己鍾意嘅方式去享受自己鍾意嘅音樂，同時亦都要尊重他人，唔好戴有色眼鏡去睇任何一種音樂。
