去補習社睇 Video 上堂你就聽得多喇，或者網上亦都有好多 Web App 提供唔同的虛擬課程俾你學習新技能。但你有冇聽過其實一個人成功好多時並唔係靠你有幾多張沙紙，有幾多個學位，人脈先係最緊要呢？而人脈好多時就係睇你嘅 「Soft Skills」有幾強，識唔識社交技巧及潛規則，而建立起黎。不過，書本或者學校入面嘅老師就好少會教你呢啲知識，好多時係靠個人經驗先領悟到。所以有時你輸嘅「起跑線」，並不在於學歷，而是 Soft Skills。最近，香港有隻 App 就專門教授呢啲書本上學唔到嘅野，而第一堂，就有名模教你 Kiss！
ShowMuse 剛剛係 11 月初正式出爐，係一個網上影片教學平台，佢地本著「三人行，必有我師」的諗法，鼓勵用戶分享生活技巧課程。例如社交技巧方面有剛剛提及過的 Kiss、餐桌禮儀，工作方面有自我品牌推廣、試酒，仲有一啲 Ice-breaking 的教學等等，內容看似日常，但其實又真係從來都冇人切切實實咁教過你架喎！
呢個七個人的團隊剛剛就憑 ShowMuse 網上影片教學平台奪得 2015 「創業之星」 中國新媒體創業大賽的冠軍，創辦人之一的張龍華（Dennis） 就表示佢地將會主力做廣東話市場，佢地亦非常開心得到比賽的認可，了解到自己的 Idea 係可行的。
ShowMuse 除左可以俾「導師」自行上載教學影片以及定價教學收費之外，亦會與網上商店合作，俾學生買教材，例如試酒的課程上用到的用具及酒辦，魔術課程上用到的道具等等都可以供應到，方便學習。現時，他們的試用人數，在不足兩個月已經超過兩萬人，相信加上黎緊的宣傳會吸引到更多用家。
Dennis 表示佢地可以發展得咁快，其中一個原因係因為加入左香港科技園的培育計劃，「最初只係諗住有免費辦公室，但原來他們的配套非常好，現時 ShowMuse 的 Technical Partner （技術合作伙伴）都係喺科學園搵返黎。」Dennis 指，科技園還會幫忙做集資的前期工作，對於好似佢咁對財務不太熟悉的 Startup 係一大幫忙。