投影機愈出愈細部，不過好多都未夠細到可以拎出街，今次介紹依部 Mini Ray 就號稱全球最細便攜式投影機，仲細過用黎點麥樂雞嗰盒甜酸醬，最緊要佢係 OTG，即係唔使插電，一條 OTG 一條 MicroUSB 就可以從手機取電就可以投影，想知有幾好玩就快啲閱讀以下文章。
Mini Ray 叫得做超迷你投影機真係冇誇張，籮文本來心諗「投影機可以有幾細部呀？頂多未同手機差唔多 Size！」。一開盒真係嚇一跳，Mini Ray 只有一粒麥樂雞嘅 Size 同重量，白色機身睇落簡簡單單、有一個 MicroUSB 插口，一條對焦加減制，原來仲暗藏一個鎖匙扣圈，真係可以當鎖匙扣拎出街。
▲一開盒真係嚇一跳，Mini Ray 只有一粒麥樂雞嘅 Size 同重量
▲白色機身睇落簡簡單單、有一個 MicroUSB 插口，一條對焦加減制，原來仲暗藏一個鎖匙扣圈，真係可以當鎖匙扣拎出街。
▲一條對焦加減制隱藏於黑色機邊
▲投影鏡頭於機身前面
多數投影機又要插電源線又要插 HDMI，想駁手機又要加多抽線，不過用 Mini Ray 就只需要一條 OTG 一條 MicroUSB 就可以接駁手機直接投射影像，乜野係 OTG？唔知邊度有得買？唔緊要，盒內已經有埋俾你。只要你部手機裝咗 DisplayLink Desktop 依個 App，唔需要任何 Setting，基本上一插好，Projector 就會投射出手機上的畫面，一插即用，不過要留意暫時只有 Android 版，而官方表示 iOS 版 App 已經已交 咗俾 Apple 審批，不久嘅將來都會支援。而如果你想插電腦用，不論 Mac 定 Windows，只要裝咗電腦版嘅 DisplayLink App 就可以。
▲Mini Ray 就只需要一條 OTG 一條 MicroUSB 就可以接駁手機直接投射影像，乜野係 OTG？唔知邊度有得買？唔緊要，盒內已經有埋俾你
▲只要你部手機裝咗 DisplayLink Desktop 依個 App，唔需要任何 Setting，基本上一插即用
▲如果你想插電腦用，不論 Mac 定 Windows，只要裝咗電腦版嘅 DisplayLink Software 就可以。
機身細細主打輕便，玩味比較重，畫質就唔好期望太高，亮度有 45 ANSI 流明，室內基本上要關晒燈先可以清????睇到畫面，解像度為 640 x 360 (16:9)，對比度則為 1000:1，而 Mini Ray 除咗有得調校對焦之外，其他設定如：梯型校正、對比度、色調及色彩濃度調校全部都欠奉。官方指亮度足夠投影出 60 吋畫面，籮文在家中試過大約 1米距離下，Mini Ray 能夠投影出約 30 吋畫面，如要投影出 60 吋畫面就需要大約 2 米，籮文屋企細，實在試唔到 60 吋大畫面。
由於屋企太細，籮文只帶住部 Mini Ray、手機及一條線就走落旺角街頭試玩，可想而知有幾方便，而 Mini Ray 便攜度高，除咗有需要時用黎做 Presentation，用家可以發揮下創意自創玩法，例如玩 projection mapping 都好適合。其實早前艾域就介紹過 Sony 一款 MP-CL1 掌上投影機，雖然畫質比 Mini Ray 好，但係 Mini Ray 比 Sony MP-CL1 更輕巧方便，價錢亦較為相宜（相差700元左右）。如果比較重視便攜，畫質並非主要考慮因素的用家不妨諗諗 Mini Ray！
售價：$1,999
查詢：銀河通訊 (8202 2098)