抱住「甚麼都不想做」精神風靡全港的蛋黃哥一直為打工仔同學生哥發聲。原來係台灣佢都係慵懶萌主，仲係國立臺灣科學教育館搞咗個「蛋黃哥懶得展」。竟然連展都懶得展？Edward 就飛咗去台北親身睇下到底有咩睇。展覽去到 3月架，蛋粉們注意啦！
離開有土地問題的香港，「蛋黃哥懶得展」當然比暑假係朗豪坊的「蛋黃哥食堂」大好多啦！今次展覽分為 5個部份，包括以日本文化為主軸的「蛋黃哥的日常」、主打台灣文化特色的「蛋黃哥遊台灣」，蛋粉必睇的「蛋黃哥手稿區」，噴血指數極高的限定店同小食區。除了呈現蛋黃哥可愛趣味的生活點滴，仲可以近距離同蛋黃哥互動接觸，一齊渡過慵懶的一日！
▲ 台灣好多展覽都收入場費， NT$280 大約 HK$65 左右，即場買飛仲會額外贈送蛋黃哥立體造型帽，睇佢咁 QQ ，咩都抵啦！
▲ 宣傳海報一句「來看就知道，懶得跟你說」真係超頂癮，一到 7樓大大隻蛋黃哥就攤係門口、打晒鼻軒咁等緊我啦！(好似係)
▲ 正中間，蛋黃哥破殼而出，懶洋洋坐係淋有醬油的飯上面，好似唔想郁咁，真係好想一啖吞落肚。
▲ 旁邊有本「蛋周刊」，仲可以走入雜誌封面，成為緋聞主角添！
▲ 另一邊有一幅以蛋盒為主題的牆，除了展示各式各樣的蛋料理外，仲記錄咗好多蛋黃哥威水史。
▲ 原本第一套蛋黃哥 LINE Stickr 推出就拎到 No.1 了，唔怪得連自拍都懶啦！
▲ 萬聖節版蛋黃哥食玩推出 5日就賣晒，難怪之前一路眅住兆萬都唔見有啦。
▲ 接住的「蛋黃哥快問快答」記錄咗蛋黃哥的專訪，左右翻開就有答案。當中有唔少係絕密公開，身為蛋粉的你又知唔知佢的三圍數字呢？
▲ 懶洋洋的蛋黃哥連運動都唔肯做，會流汗嗎？
▲ 作為 fans 唔係答唔到丫嘛？不過答案真係估佢唔到咁 hea 囉！
只係開頭已經咁精彩，正式入到展覽當然謀殺更多菲林啦！「蛋黃哥的日常」以蛋黃哥的早餐、午餐、下午茶、晚餐切入，抱住「有得瞓就唔會坐，有得坐就唔會企」的姿態比你任影。如果跟住呢個餐單，膽固醇可能會過高啊！
▲ 午餐係賽車式迴轉壽司，迴轉帶上有個紅綠燈，好似催緊壽司們行快 D 咁。
▲ 午餐跑得咁辛苦，下午茶當然要嘆番杯茶。正當你坐係榻榻米休息的時候， 蛋黃哥就懶洋洋咁係蛋殼狀茶杯中睡著咗。
參觀完蛋黃哥的一天，走到展覽的重點－「蛋黃哥遊台灣」。據說整個展區都係蛋黃哥作者 Amy 特意為今次展覽設計，如最為大家熟悉的商店街、廟宇、夜市、公園、101等名勝，充滿台灣獨特的文化，而且仲有大量從未曝光的蛋黄哥新造型，當中的蛋黃大帝同檳榔西施真係超級爆笑。
▲ 巨型雪櫃入面擺滿豉油、啤酒、牛奶、雞蛋，通通都係蛋黃牌出品，係咪好想試下先？
▲ 來到蛋黃街，第一樣見到的就是…鼎泰豐！啊！係鼎黃先啱！主菜同樣係小籠包，不過就有蛋黃哥懶死係包邊咁囉！風係蒸籠吹吹吹，感覺就好似啱啱蒸好咁，唔食對唔住自己啦！
▲ 台灣人鍾意食牛肉麵係人都知，但就未見過上面會有蛋。旁邊仲有條滑梯，溜完之後坐落蛋黃哥個 pat pat 度，正呀！
▲係滑梯上面可以影晒成個場館的佈置，大家上去記得忘影咗先好 sir 呀。
▲ 蛋黃哥最鍾意用煙肉做被，但冬天好似唔多夠暖，轉咗蓋臘肉當棉被，超療癒呢！
▲ 唔只臘肉，懸掛的各種肉品都可以當被蓋架！
▲ 蛋黃哥明明就無頭髮，不過戴咗假髮又幾型啵。
▲ 主場館正中間係蛋黃府，而且仲香火鼎盛，信徒絡繹不絕，我睇大家都係度祈求日日不勞而獲、可以瞓到自然醒吧！
▲ 蛋黃大帝金光閃閃，成個皇帝樣，一定好靈驗。(如果佢肯出力的話)
▲ 大帝前放滿供品，仲有蛋黃聖杯，非常可愛。
▲ 掟聖杯之餘記得求番支籤，不過每一支籤都勁搞笑，難怪蛋黃哥掩住半邊咀笑。
▲ 如果仲有煩惱就要走到廟後問蛋黃大帝。
▲ 蛋黃哥大帝可是有問必答啊！不過幫唔幫到你就…
▲ 拜完蛋黃大帝，係時候去蛋黃夜市掃街。
▲ 臭豆腐、蚵仔煎、芒果綿綿冰、西冷牛排，每一檔都由全新造型的蛋黃哥做檔主，相當搞鬼。
▲ 呢隻蛋黃哥就嚟俾蛋黃人帶走都仲死攬住蚵仔唔放。
▲ 蛋黃西施戴住桃紅假髮，就連 Bra 都用蛋殼做，仲手抱住檳榔蛋黃哥添！
▲ 蛋黃哥拎住把刀坐係鐵板牛排上，睇嚟佢要誓死保護佢張床。
▲ 展場最抵死的莫過於保證夾不到的娃娃機。咪以為用巨型筷子夾蛋黃哥好容易，就算比係夾得起都拎唔到出嚟。
▲ 走過夜市會見到巨型吹氣蛋黃哥，肌肉好結實咁啊！
▲ 牆邊有各個台北市的名勝，101、貓空纜車、YouBike、小巨蛋，中正紀念堂，一一都充滿著蛋黃哥的蹤影。
▲ 旁邊的大黃電鍋發出陣陣蒸氣，3隻茶葉蛋黃哥係入面取暖取到就嚟裂開都唔願走。
▲ 呢個蹺蹺板同蛋黃哥一樣，郁都唔郁，真係…
▲ 遊完主場館可以更上一層樓，細心睇樓梯上的圖案係台灣地圖啊！
上一層係「蛋黃哥手稿區」，作者 Amy 借出了 19幅珍貴手稿，當中更有蛋黃哥早期的樣同融入咗台灣特色的蛋黃哥造型圖，蛋粉一定唔可以錯過啊！
▲ 原來蛋黃哥最初好精靈架！睇嚟學精三年教懶三日係啱嘅！
▲ 假蛋黃人第一次出場原來係正常人嚟架！
▲ 作者 Amy 設計的展覽草圖，還原度超高啊！
最後一區係噴血特區，入面唔只有平時 Sanrio 買到的蛋黃哥文具、拼圖、公仔、娃娃、雨傘、手機殼等等，仲有部份展覽限定的台灣蛋黃哥精品，蛋粉好難忍得住手。另外仲有蛋黃哥鳳梨酥、雞蛋糕、馬卡龍等等可以買，用嚟做手信一定唔寒酸。
▲蛋黃哥化身布甸杯，好萌啊！
▲ 呢 D 信紙寫到明係台灣嘅，夠特別啦掛？
▲ 萬聖節版的蛋黃哥…(汗)
▲ 小食區的蛋黃哥雞蛋糕，又萌又香，十分誘人。
▲ 蛋黃哥的蛋糕都好可愛。
▲ 不過馬卡龍就有 D 怪怪地咁。
▲ 限定版的水樽都好正架！快 D 拜見蛋黃大帝啦！
蛋黃哥懶得展
展覽地點：國立臺灣科學教育館 本館 7、8F (台北市士林區士商路189號)
展覽日期：2015年12月18日 至 2016年3月6日(除夕休館一日，餘每日開放)
展覽時間：週六日、國定假日、寒假 09:00-18:00 (17:30停止售票及入場)、非寒假之平日 09:00-17:00(16:30停止售票入場)
入場費：全票 NT$280、優待票 NT$250、幼童票 NT$220 、愛心票 NT$140