仲有唔夠一個月就農曆新年，大家準備好收利是未呢？為咗收到更多利是，Monchhichi 換上一身《西遊記》造型飛到朗豪坊同大家拜年，我依莉詩今日就去到現場同佢一齊大話西遊啦！
向來形象百變的 Monchhichi 今次化身成 11 個 《西遊記》中的人物造型，美猴王、悟空、唐僧等穿梭係 4 個場景中充滿中式氣氛。
一上到 4樓，第一時間就見到美猴王 Monchhichi 準備借走定海神針。但支針成一萬三千五百斤咁重，憑佢一猴之力到底拎唔拎得起架？
▲ 只係睇得半支神針已經覺得好重啦，但美猴王 Monchhichi 都仲好似扶得好輕鬆咁。
從東龍番嚟，左面就係悟空 Monchhichi 結拜兄弟牛魔王的府邸，紅孩兒同牛魔王企係門口迎接緊大家啊！
▲府邸後，鐵扇公主拎著佢把巴蕉扇起勢咁舞，正當以為牛魔王又做錯 D 咩的時候，發現佢身後係個灶頭，原來係忙緊煮團年飯。
▲唔知鐵扇公主煮緊咩俾大家食呢？
係牛魔王府右邊有個盤絲洞…丫…聚寶洞先啱。唐三藏、悟空、豬八戒同沙僧仲啱啱經過添。睇嚟係取西經途中啦！
▲估唔到唐僧 Monchhichi 仲係BB 嚟，看來沙僧要更努力照顧師傅先得。
咪以為美猴王 Monchhichi 會乖乖同玉皇大帝、王母娘娘拜年，其實佢係想去猴子偷桃！仲要坐埋玉帝張龍椅，激到佢死死下。
▲唉…美猴王 Monchhichi 竟然偷咗個桃，仲要瞓埋係玉王大帝個座度慢慢嘆。
▲天宮入面的壁畫角色都係 Monchhichi 化身而成，超可愛呢！
去完 4樓影靚相，粉絲們記得去 7樓 Pop-up store 買限定版 Monchhichi 精品，入面仲有由日本直送的新品添啊，粉絲一定雙眼發晒光！
▲ Pop-up store 門口有對 Monchhichi 情侶坐係桃花樹下談心，你唔會想走埋去做電燈膽掛？
▲ 店內唔少造型都同新年有關，十分應節。
▲呢隻悟空 Monchhichi 係今次的獨家精品，身邊的記者朋友已經雙眼發光了。
▲呢隻金色的招財 Monchhichi 係最新的產品，唔知金色係咪比白色可以招到更多財呢？
▲新年又點可以冇財神同利是封呢？我都好想要啊！（入面D 餡）
▲中式的 Monchhichi 都好有新年feel 架！
▲呢套係 Monchhichi 係上海展出時的限量套裝，只有 1200套，大部分已經賣晒架啦。
▲現場仲有日本直送的 Monchhichi 曲奇，有大阪限定、京都限定同埋北海道限定，點解無香港限定架？
▲對於低調的粉絲，戴呢隻手錶就啱晒啦！
▲此外，店內有大量不同造型的 Monchhichi 公仔，我又聽到身邊的記者朋友尖叫了。
▲男生們是非……學園風的 Monchhichi 啊！
▲仲有制服 look，型！
▲有時 Monchhichi 的造型都幾爆架！
▲臨走前記得回頭望望呢條橋啊！
因為大多商場都將重點放係聖誕，所以新年裝飾都未必咁揼本，呢度係少數吸引到我的商場。雖然 Monchhichi 人氣未必好高，不過勝在係馬騮，今年又係猴年夠貼題，而且朗豪坊的裝飾一向夠細緻，所以都幾值得去。粉絲去到間 pop-up store 更加會尖叫，雖然未必係最齊，但好多平時見唔到的造型都有，我覺得佢地會隨時破產啊！
新年氣氛 ★★★★☆
必影指數 ★★★★☆
必買指數★★★★☆
日期：2016年 1 月 15 日至 2 月 28 日 (上午 11 時至晚上 11 時，年廿七至年廿九延長至凌晨 1 時，初一至三照常開放)
地點：朗豪坊 4 樓通天廣場