農曆新年就到，又係時候準備整糕點過年，但年年都食椰汁年糕同蘿蔔糕好似有 D 悶，於是我依莉詩就向惠而浦請教如何用蒸焗爐整抹茶年糕。味道特別之餘又易整，依家就等我分享食譜同製作心得俾大家，等你都可以係屋企整番幾底送俾親朋好友啦！
今次整抹茶年糕嘅材料非常簡單，基本上係普通超市已經可以買齊。而食譜上的份足夠製作一底(焗飯錫紙盤的)年糕。當然，如果打算整嚟送禮，份量可以再加啦！
抹茶年糕材料
糯米粉……………………… 230 g
澄麵 ………………………….70g
抹茶粉……………………… 10g
蜂蜜…………………………. 100ml
水………………………….… 100 ml
牛奶………………………… 200ml
菜油………………………… 30克 + 少許（用作掃糕盤）
因為製作的時間唔算長，10分鐘內已經可以將材料攪勻好，所以建議先預熱蒸焗爐，待材料攪勻好立即放入爐。
▲ 當然，係屋企想整可以用鑊隔水蒸，不過今次我就嘗試用呢部 惠而浦 m.a.x. 座檯式蒸焗爐 嚟蒸。
▲ 首先要將蒸焗爐以 100度 預熱 10分鐘。
之後就開始製作年糕。其實好簡單，就係要將所有材料搞勻就得，不過為免有粉粒，我地都係先粉類過篩。
下一步就係加入濕身的材料，呢一步如果有打蛋器幫手就最好，就算無都唔係用多好耐時間。秘訣就係要將材料逐少加入，以面起粒。
▲ 將牛奶同水倒埋一齊以方便逐少加入粉中攪拌。加入牛奶同水後，粉團會慢慢變硬。攪拌到表面沒有水份就可以停止。
▲ 將麵糊倒入已掃油的焗盤。
整開年糕的人都知道，攪粉唔係問題，最大問題係蒸的時候要睇火。蒸一底糕最起碼都要成個鐘，如果平時用鑊蒸要耐唔耐加水，但打開個蓋一來怕蝕咗度氣，二來又怕 D 蒸氣整濕個面，而用蒸焗爐就可以避免呢 D 問題。
▲ 將焗盤放入已預熱之蒸焗爐中，以 100度蒸 60分鐘。
▲ 放涼後，放入雪櫃中冷凍三小時以上就可以送俾人啦！
如果係雪櫃拎出嚟就咁食，會覺得有 D 黐牙，所以年糕通常都會蘸蛋煎，等佢脆口 D。
▲ 然後蘸上蛋汁，用中慢火煎至 4 邊金黃色即可。
▲ 煎好咗雖然無咁靚，不過好食好多呢！
抹茶粉有好多種，一般來說顏色愈青綠愈高級。至於我今次用的抹茶粉係 DIY 材料店購買，大約 $10 就有 25g ，唔算太貴。成品的都算有抹茶味，不過就唔太濃同無苦澀味，抹茶控可能要加多 D 先得。如果想回甘味更重，我建議用八女抹茶粉，不過就千奇唔好用已經含奶粉的即沖抹茶粉，唔係就會唔夠色架啦！
整年糕最怕係有粉粒，除了粉粒要過篩，逐少加入濕身材料亦可減少粉粒形成，而且邊加邊攪比較好。
如果有打蛋器幫手當然好，但我係整的時候只用了手打，發覺加入水同牛奶之後用「孤寒刮」將粉粒壓碎比較容易，但加入蜂蜜同菜油之後用筷子攪更就力。
我同時同了焗盤同錫紙盤整出來效果都差唔多，不過如果想送俾人用錫紙盤比較方便。錫紙盤有圓形同長形，過年前係街市特別多，大約 $10/2個左右。
年糕年年都食，今次試整抹茶年糕覺得好新鮮。無咗椰汁味，多咗陣蜂蜜同抹茶味，但口感依然煙韌，就算傳統的老人家都應該接受到。至於蒸煮方面，今次用咗蒸焗爐代替用鑊蒸確實方便好多，特大容量水箱，唔洗睇實個火，可以無間斷咁蒸足一粒鐘，而且噴注式蒸氣設計可以減少「倒汗水」，咁底年糕就唔怕蒸出嚟一個個窿啦！
惠而浦 m.a.x. 座檯式蒸焗爐 (MAX209S)
售價︰HK$ 6,498
相關影片﹕