恭喜發財～～港女祝大家猴年可以「日日 『UN』『 UN』 腳，爽『歪』『歪』，笑到甜『牙』『牙』～」
老實說，新正頭，本來今日呢篇想寫《情人節獻禮》，但香港社會發生咁大件事，我無辦法扮睇唔到，仲笑笑口同大家分享人生。不過，唔使擔心，我都唔會評論太多，因為網上已經有好多人做左更深入更詳盡的分析討論，唔使我再加多把口。反而我想講下一直以來我點同屋企人睇新聞。
上年拜年時見到親戚講雨傘革命時搞到面左左的日子仲猶有餘悸，點知今年大年初一仲發生埋咁嚴重的事件，相信大家呢幾日拜年的時候都唔係幾好過，逼住要聽啲姨媽姑姐發表偉論，人人做判官。
港女比較好彩，全家都幾明白事理，站係同一陣線，而且我係屋企都叫做有啲牙力，唔使谷住谷住，又要開片又盛。有人問過我，點樣可以令到屋企人同聲同氣？其實，我屋企有呢個局面，都唔係一朝一夕就可以出現，必要時要耍少少手段。
就以睇新聞為例，睇一睇上圖，如果你屋企係睇緊大台，恭喜你，佢地睇到的「真相」可謂少得可憐。年初二當日的大台新聞報道，我叫我屋企人睇完一次，再俾有線同 now 的新聞片段俾佢地睇，然後好似講故佬上身咁，一路睇，一路解畫。而因為港女的荼毒，父母都有用 Facebook，我當日同時 Like & Share 左好多相關報道及分析，然後同佢地講，「唔好咁快 judge 咩係啱咩係錯，了解多啲件事先，睇下人地講咩先」。對與錯中間有好大空間，呢個係真，急於下判斷其實無助討論，亦會令好多偏見出現。
當然你一定會話，我爸媽先唔會好似你咁囉，佢地要幾「萌塞」有幾「萌塞」，佢地一早有晒前設啦，同佢地傾都係嘥氣。
無錯，所以我一開始就講，我屋企今日有咁嘅局面係得來不易的。
你睇嘅接觸嘅，同佢地睇嘅接觸嘅，超級唔同，而最大的分野，在於網絡－access to the Internet。佢地日日淨係睇大台，再望返上圖，如果冇適當的「引導」及解說，久而久之，佢地真係只係會睇到大台播出黎嘅畫面。咁睇埋報紙係咪好啲呀？係好啲，但要睇你睇邊份同幾多份報紙，淨係睇一份報紙的話，其實差別唔大。
我咁講係咪偏幫晒網媒呀？唔係，你又再睇下幅圖喇，網媒的報道都只係能夠覆蓋部分真相，而且我們不能排除網媒也有 hidden agenda，如果你又淨係睇部分網媒，世界觀又會有所不同。所以你話批判性思考係幾咁重要，而父母個一輩好多時呢方面的訓練未必足夠，呢個時候，你就要扮演引導（唔係威脅）的角色。
要做到令親戚都明白事理一點也不易，但如果你想，港女建議不妨從核心家庭入手，先說服到父母，佢地自然會運用影響力令其他親戚朋友站在同一陣線。不過，呢啲野真係唔急得，尤其是老人家，千祈唔好以為一朝半載可以改變到佢地，鬥長命先係基本盤。你俾多一個選擇佢地，首先令佢地的世界不只有大台，其實已經好很多。
其實新年流流，個個都想做「孝子賢孫」，開開心心逗逗利是架啦，相嗌唔好口。遇著唔通氣的親戚要同你開片，港女其實建議唔好反駁，可以轉話題就轉話題，反正唔係成日見，都冇咩好拗，不要執著於一時，因為你唔會因為今次「贏左」而令佢投向你，長線投資（即係伴侶/父母）先係最緊要。而如果你的立場係站得住腳，你亦無需擔心說服唔到人，總會遇到同行者並肩作戰。