最近 Kit Kat 特別為日本高中生打氣而推出的 KitMail x 3D Hologram 爆紅，當中最特別的莫過於附送的一塊膠片。只要按著指示組裝成倒金字塔形狀，再將膠片放係手機上並播放特定影片就可以出現立體效果。聽落好神奇，但原來製作非常簡單，等我依莉詩教下大家啦！
其實要整 Hologram 一 D 都唔複雜，製作的材料亦好簡單，幾乎 $1 都唔洗，隨時係屋企都搵到。
所需材料：
膠片…………..1塊
紙………………1張
筆………………1支
間尺…………..1把
膠紙…………..少許
▲ 首先係白紙上畫出一個梯形。
▲ 然後剪出，並將膠片鎅出 4個同樣大小的梯形。
▲ 最後用膠紙黐好，就完成了！
第二個步驟就係上網搵片做測試。只要係 YouTube 打 「Hologram 」就有唔少相關的片，只要將膠片放係螢幕中間，再播放影出。影像就會好似飛出嚟咁立體架啦！
▲ Hologram 的片多數係黑色背景，而主體會分成 4面同時播放，非常易認。
▲ 水平放就可以睇到立體的浮影。
試睇要人地的片，當然要自己整番條啦！同樣都係好簡單，只要係手機下載「Holapex Hologram Video Maker」，再匯入預先拍好的片就搞掂。情人節雖然過咗，但整定條表白片，再用呢個方法白色情人節播出嚟，一定冧死女啦！
▲ 打開個 App ，揀 「Create Video」。
▲ 然後係相簿揀條片。
▲ 之後就播到架啦！可惜呢個 App 無得儲存影片，不過自用就好夠了。
1. 膠片要夠硬
其實任何的膠片都可以整到，不過愈硬愈挺的膠紙反射效果就愈好，所以網上唔少人都建議用 CD盒嚟整，不過就比較難鎅。
2. 膠紙愈少愈好
同膠紙將膠片拼合係最簡單的方法，但膠紙愈少愈好，因為就算係透明膠紙都會影響投射效果啊！
3. 環境愈黑愈清楚
睇片的環境都好重要，環境愈黑，光差就愈大，投影亦更明顯，所以 show 比人睇之前記得揀個黑的地方呀！
4. 手機螢幕校最光
同樣，手機螢幕要校到最光，效果先明顯架 !
5. 黑色背景最突出
如果係整 slideshow 亦最好揀黑色背景，而拍片的時候亦最好揀 D 背景較暗的地方的地方。唔係投射出嚟就會有框，睇落唔似浮係空中。
6. 主體顏色要鮮明
除了黑背景，主體的顏色都要鮮明，例如影人就避免著沉色衫，唔係就會得番個頭好怪。