今次奇怪，我依莉詩唔帶大家去玩或寫科技野，而係帶各位 wire 民食雞煲。事關屯門的朋友選擇真係唔多，早排我依莉詩就上網見到工廠區有間雞煲幾抵，有燒蠔、乳鴿食，宵夜時段都係 $108 免加一。於是我就放工同朋友一齊去食啦，忍唔住都要寫下。
因為搭車番屯門的時候已經 Book 咗位，所以唔洗排隊就入得。一坐低，店員知道我地第一次食，就好用心介紹俾我地知邊度有嘢飲嘢食，同問我地要雞煲、醉雞煲定炆魚鍋，估唔到工廠區嘅服務態度都咁好，Vcity D 甜品店真係要好好學習。 係雞煲未上之前，就係我最期待的頭盤，每人一件燒茄子同燒蠔，熱辣辣燒起，超惹味。燒茄子同燒烤店的差唔多，都係碟上，有少少辣，但就唔太油。至於燒蠔都落足料，有好多蒜蓉同蔥，而且仲係未離蠔殼，夠新鮮。
▲ 燒茄子有少少辣之餘好惹味，而且唔太油，有水準！
▲ 燒蠔都落足料，有好多蒜蓉同蔥，而且仲係未離蠔殼，夠新鮮。
▲ 奇怪的是，朋友食的蠔肉又大又肥美，但我的就細細粒，肉質仲有 D 韌添。但再睇真 D ，發現我個隻蠔有兩粒肉，仲要一粒連殼一粒唔連。睇嚟師傅都覺得我隻蠔太細，送多粒蠔肉補數，算係咁啦！
食完頭盤，見雞煲未到，於是出去睇下有咩熟食。點知，唔知係咪宵夜時段啱啱開始，D 嘢未 refill 得切，熟食區 D 嘢幾乎清得七七八八，有 D 吉碟甚至唔知係咩。但後來坐咗兩個鍾頭，發現魚同皮蛋重來都無 refill 過。至於我最想食的乳鴿…又一開始我見到兩個乳鴿頭，變 4個乳鴿頭，到 6個，我都係食唔到，幾乎每次出爐唔夠 1分鐘就已經夾清光，好想講一句！吃不到的乳鴿是嬲嬲的！
▲ 食唔到乳鴿唯有食雞翼，不過又有 D 驚喜啵。係幾乎咩都清晒的情況下，D 雞翼仲係熱架，而且仲係鹽酥雞咁脆咁入味，食多幾隻先。
▲ 呢條骨肉分離的魚，我由一入去見到佢，就走佢都仲係咁。
▲ 涼拌青肉同木耳睇嚟唔太受歡迎，隔離碟皮蛋無晒，佢地都仲有咁多。
食咗咁多嘢，終於到主菜，麻辣雞煲！不過因為我唔食得辣，所以叫唔辣。如果你話，食唔辣嘅雞煲不如唔好食！咁係就錯啦，我個本來打算叫小辣的朋友，最後同我一樣，飲咗 3、4罐涼茶。又麻又辣超惹味，不過同時間我地都覺得食完之後 D 衫會超臭！講番 D 雞，兩個人食有半隻雞，本來睇落都幾多，可惜 D 雞無乜肉，好似得骨咁，勁失望。
雖然 D 雞無肉，不過食雞煲從來都注重 D 汁多過 雞，用番 D 汁打邊爐先係王道。呢度火鍋料大多數都要出去拎，而出面無先至要劃紙仔。配料都幾大路，芝士腸、魚蛋、生菜，魷魚都有，而肥牛、豬肉片就要自己劃先出，都幾多款揀。而最驚喜的是，呢個價錢竟然有出前一丁俾你，真係估唔到。
▲ 飲品都係汽水、涼茶、樽裝水，仲有啤酒揀添，難怪咁多男人放工嚟啤一啤。
▲肥牛就好似麻麻地，真係好肥。
▲自助區無嘅嘢食都可以劃紙仔落，不過我劃芝心丸嘅時間，個姐姐就話，出面有就有，無就無架啦。車，咁直接同我講無未得囉！
▲ 食飽飽唔好漏左食糖水，蕃薯糖水同芋頭西米露都好足料，可惜我已經投左降，食唔落啦。
以大排檔質素，呢個價錢都算吸引，食雞煲之外，仲有熟食，特別係送嘅燒茄子同燒蠔，可惜我忙咗成晚最後都係食唔到乳鴿。(可惡嘅隔離枱，成隻成隻咁拎走！) 當然雞件同火鍋配料都只係不過不失，如果住市區的朋友山長水遠入屯門，車費都係番度。不過住屯門的朋友都可以一試，提提大家，食之前最好打定電話去先，因為門口四圍無瓦遮頭，隨時要食成個鐘西北風。仲有，雖然間野叫良景美食，但係唔係喺良景，要係建安或者屯門站落架！
地址：屯門新平街2號屯門工業中心B座地舖
電話：2462 1591
營業時間：星期一至六，星期日休息
晚飯時段： 5:30pm-9pm 成人$128；小童$108
宵夜時段： 9pm-12am 成人$108；小童$78