港女上個月睇左一套講日本人減廢及回收的新聞節目，見到佢地除左分開可燃、不可燃的垃圾之外，就連廚餘都有好多方法回收。係節目入面仲見到有一個一家三口的家庭在家中實行減廢，每日佢地可以只產生 6 個 ¥1 咁重的垃圾，連尿片都有得回收。港女的屋企實行左垃圾分類多年，但每日都會有半袋至一袋垃圾不能以分類形式丟棄，於是我決定去一轉日本，實地了解佢地的垃圾分類方式。
我諗唔少去過日本的讀者都知道日本的街上係無垃圾桶，連便利店都唔係間間有分類回收箱，如果手上有垃圾，分分鐘真係要拎到返屋企先有得掉。港女去左東京的幾個住宅區觀察，然後有以下發現。
最初發現呢啲籃的時候，係我行緊上山個陣，見到有架小貨車行兩步停一停，司機走出黎疊一疊啲籃，跟住又停一停，重覆以上動作，揸住架車一條斜路停四五次，我行路都快過佢，仲以為係啲籃疊得唔穩陣，驚佢冧落黎。
後來我見到有戶人家屋企外面放左以上四個顏色的籃出黎，我以為係放牛奶按樽或者係麵包之類，好奇走過去一看才知道原來係…
垃圾分類裝置！可能係日本不同的區域有不同的回收方式，呢個籃我真係第一次見，一般見過的都係用透明膠袋裝起不同類別的垃圾，再按日子丟棄，如下圖。分得咁仔細，仲見到有人負責收都係第一次見。
不過，回收還回收，港女覺得佢地貨品包裝真係落重本，拆完包裝出黎用得或食得的比例有時可以很低，同行友人笑說：「唔知係咪日本人啲野唔見得光，咩都要包幾層先出得街，就連飯盒、水樽、書⋯都可以整個套俾佢地入住架！」我諗包裝都係促進銷情的方法黎嘅，賣唔出拎去扔浪費啲，定係賣得出然後啲包裝拎去回收環保啲呢？我諗佢地都有計過嘅～
日本而家對於商家及家庭有成 50 幾項有關回收的守則，連用過的油都有方法回收，香港就連廚餘都冇得分開掉，幾時先做到人地一半呢？
相關文章:
太宰府天滿宮用 AI 預測人流 新年參拜預計會有超過 200 萬人到訪 東京公務員明年可周休三天 每周工作時間不變支援員工育兒 香港環境卓越大獎頒獎典禮 李家超: 力爭 2050 年前實現碳中和
分享到 :
最新影片
