港女細個嗰時無 TSA，唔使補習，冇咁多課外活動，我只係一個小小電視迷，迷到可以背得出電視節目表。之但係我小學係讀下午班，放左學返到屋企其實剛好 Miss 晒兒童節目及卡通片時間，但嗰時我阿媽好好，會幫我地用錄影帶錄起晒啲卡通片，等第二朝一早起身自己重播，睇完返學校同同學嘻嘻哈哈講劇情。
細個嗰時我都有少少小聰明，除非要作文，其他功課做得好快，10 幾樣都可以趕到係食飯之前搞掂，食完飯就可以坐定定睇電視。以前啲劇真係好好睇，仲會跟住唱主題曲，學下講口頭禪。我最記得有一年播《小寶與康熙》，張衛健有句好長的口頭禪：「涼風有信，秋月無邊…」個時我同埋啲同學仔可以背晒成段出黎（而家都仲記得，反而木蘭辭背到尾已經冇乜印象 sosad），仲因為講得太大聲俾風紀罰「揜咀」，哈哈哈。
但係去到中三，我就少睇左電視，而我最後一套有追的劇集，係《金枝慾孽》，之後由於港女進化成功，亦因為網絡開始發達，轉為煲韓劇，電視都有睇嘅，扮大個－睇新聞及資訊節目為多。
直至上左大學，我完全脫離了電視，因為嗰時興用 Facebook、YouTube、上大陸網睇戲睇劇睇多國綜藝。加上我又住係宿舍，又去外國交流幾次，又去旅行，一來冇咗部電視係左近，二來都唔係茶餘飯後的話題，唔睇係非常理所當然。
後來港女愈來愈依賴網絡（我諗我並不是例外，好多人同我都一樣），所有野都可以用電腦/電話/平板滿足到。即使開電視都駁個盒睇戲啦，或上 YouTube 睇片，由個時開始，我已經好少俾部電視主導我的生活，唔會再係 8 點半坐定定睇 ABC 劇，反而如果個節目係好睇，我係會主動搵黎睇（正常合法途徑）。我已經唔使知道電視台個節目表，有好多其他渠道睇到「電視」，自尋快樂。
琴日 viuTV 開台，我係條街度開住個 App 睇直播，之後我諗到一樣野，就係電視，而家已經唔係講緊一部擺係大廳的電器咁簡單，因為我地基本上係唔再需要一個電視機去用黎「睇電視」，HKTV 好 unwireTV 又好 CapTV 又好，你都唔係用電視黎睇架啦～
與其話係睇「電視」，我地而家切切實實係睇「製作」、睇「內容」，根據內容的吸引力及話題性決定你要唔要花時間落去。我地仲可以自決播映，例如，港女見到宋仲基句對白好正笑得好型，我可以 replay 睇多幾次；又或者我唔鍾意韓劇個節奏咁慢，可以「飛住黎睇」，唔單止係自訂節目表，仲可以自訂播放方法。
我地而家，已經可以用自己的方式在「電視」中找到快樂，唔需要依賴部電視機，有得揀先至係老闆！