大家好，我係夏蕙BB，今次客串做《一日記者》，跟著依莉詩採訪位於觀塘工廈嘅 Party Room。對於觀塘工廈其實我不陌生，數十年前有一段時光曾跟昔日嘅姊妹在附近一帶閒逛， 當時更加是工廠林立，但聽依莉詩講，原來而家少左好多工廠喇，取而代之嘅係各式各樣店舖進駐﹕ Party Room、食肆、特色小店比比皆是。第一次去Party Room，都唔知原來入面有咁多野玩，而家就一一介紹比你地！
幾好喎，開 Party 就梗係要同朋友唱下歌仔啦，佢地部機啲歌有新有舊，可以裝到 10 萬首歌，邊唱得晒！我平時出去登台就唱禪院鐘聲嘅，今次就同依莉詩合唱首紫鈺釵你地聽下，不過依莉詩可能太細個，唔係幾識唱。
除左唱歌，仲有得跳舞，哈哈哈，跟住啲公仔郁下郁下，都幾過癮。（編按：其實個部係 PS 4 黎嘅，可以玩體感遊戲，亦都可以打機）
我同依莉詩企喺張枱隔離同負責人傾下計，佢就同我地講話張枱有「景轟」，原來打開黎可以打桌球，夏蕙都唔識打桌球，阿哥哥仔仲教我點樣拎好支棍同打波。
呢間 Party Room 原來係由 7 個後生仔自己夾份搞嘅，而且啲裝修全部都係自己搞，唔識點算呢，佢地話可以上網自學，好叻仔。佢地話，因為覺得香港無乜娛樂，所以整呢間 Party Room 出黎俾大家有多一個落腳的地方。除左有得唱歌跳舞，仲有有掟下飛鏢，玩下遊戲呀咁。
後生仔多啲嘗試係好嘅，而家香港有好多唔同嘅出路，好似佢地咁工餘的時間出黎做下小生意，做啲大家都開心的工作，都唔錯。而家工廠大廈都變晒咯，啲後生嘅就可以跟住個潮流變通，香港仔好醒目架嘛！
夏蕙其實都幾經常做訪問架！不過係俾人問嗰個吖嘛！今次要我做《 unwire 生活版記者》呢個角色都唔係話咁易架，雖然依莉詩係旁邊幫下我，提點下我，但做起上黎都要好多技巧。例如，你地睇我好似好開心，可以試玩到好多野咁，但每樣野都係蜻蜓點水咁樣玩下架咋，之後又要寫返出黎，如果好似我咁唔夠經驗，根本唔會知道啲野係好定唔好，要真材實料先可以言之有物架。
另外，要訪問人個度又唔係真係咁容易架喎。開頭我以為都係同阿哥哥仔傾下計呀咁，原來要諗下點樣問問題，先可以令到佢講到重點，唔係傾計咁簡單。而最難嘅係，你要自己判斷究竟哥哥仔係咪同你講緊真說話，當然今次佢地好好啦，但如果出到去做一啲大新聞，就唔係咁講法架嘛，做記者唔係你諗咁易。首先你要熟個題目，然後做好準備，到場仲要臨時執生，都考功夫架。
仲有一樣就係影相喇，依莉詩同我講，平時佢出去做訪問係一腳踢，要自己做採訪、影相、度稿、拍片，有時仲要做埋直播！嘩，我聽見都頭暈暈，原來呢個年代佢地一個人要搞咁多野，好辛苦好辛苦，希望大家尊重記者工作，做得咁辛苦但成日裁員都係由佢地開刀真係好陰公。
今次 UNWIRE 搵我夏蕙黎體驗做記者，我都學到好多野，佢地呢間做生活科技的網上媒體，有個口頭禪（編按：係口號）「玩生活・樂科技」，夏蕙真係相當明白，雖然我唔係幾識用自己個 iPhone，因為啲字實在太細粒喇，但都知道與時並進的重要性。就好似之前我著嗰件幾廿年嘅皮草出街，原來俾人影左相放上網，好在及時用 Facebook 解釋返，如果唔係就俾人嬲嬲要去搵關公架喇。你話吖，我都 80 幾歲，都要學人玩 Facebook，同啲後生仔溝通喎，唔係俾人洗左版都唔知呀！
Homemade Party
觀塘道396號毅力業中心13樓B室
6048 3537
