談到澳門，除了賭場好似甚麼都沒有了。不過近年澳門好似打算轉型，多了不少藝術、展覽等活動，而賭場亦多咗唔少娛樂設施。我依莉詩襯住黃金週啱啱結束，來過兩日一夜的少旅行。首先同大家介紹下今次入住的酒店 － 新濠影匯 。
黃金週後無乜人
新濠影匯上年 10月先開，與其他賭場唔同，唔再以金碧輝煌吸客，反而以荷里活電影為主題，變得更時尚唔俗氣。雖然店舖都係離唔開名店，不過就多了摩天輪同蝙蝠俠電影等娛樂設施，就算唔賭錢，唔 shopping 都可以 hea 大半日。因為黃金週剛過，今日參觀的時候無乜人，行得非常輕鬆。
▲ 接駁巴士入口有個巨型 Hologram，連同四周的大型廣告牌同車站裝飾，感覺好似去咗外國車站一樣。
▲ 眼見拖喼的旅客唔多，行得好舒服。
▲ 雖然少不了名店，但裝飾到好似外國街道一樣，唔 shopping 經過都好有置身外國的感覺。
蝙蝠俠 4D 電影有環球影城風味
既然呢度想模仿影城，當然有 4D電影睇。蝙蝠俠夜神飛馳就係華納同 DC娛樂合作推出的 4D數碼動感遊戲，坐上會郁的座位，配合虛擬實境同音響，猶豫置身梭葛咸城，親歷蝙蝠俠黑夜的冒險之旅，相當刺激。雖然入場後唔可以影相，我亦唔打算戲透，不過可以話比大家知，玩法就好似大阪環球影城的蜘蛛俠 4D電影，製作非常逼真。如果問我百幾蚊睇一場十幾分鐘的電影抵唔抵，我可以話算係咁。反正去環球影城比幾百蚊入去，排隊排到傻都係玩得 3-4個，咁呢個價錢計番睇一場都差唔多啦。
▲ 等候的位置有小丑等頭號罪犯的通緝令，睇落似畫，但其實會郁架。
▲ 另外仲有立體的蝙蝠俠同戰車，可惜唔可以坐上去影相啦！
▲ 入去前的模型都好仔細，將漫畫場景一一呈現眼前。
▲ 同好多主題一樣，玩完每樣嘢，出口都有間主題店賣精品，而呢間當然賣蝙蝠俠精品啦！
華納樂園置身英雄漫畫
如果帶埋小朋友嚟玩，呢個佔地 4000平方米的主題樂園就可以比佢放下電。園內充滿華納兄弟同 DC漫畫中的角色佈置，賓尼免、翠兒、傻大貓等等穿梭係各個遊戲入面。百幾蚊就可以帶個小朋友入去 2個鐘任玩 8個遊戲，佢地一定唔捨得走。
▲ 2米高的跳樓機話高唔高，不過對小朋友嚟講都幾刺激架。
▲ 想有蝙蝠俠的身手一定要從小培養，呢個模擬摩登大廈的攀石牆就啱晒小朋友挑戰自己。
▲ 要捉壞人當然要學飛車。
▲ 仲有射擊遊戲玩添！
▲ 都係果句，玩完一定有間精品店係出口，fans 可以去望下。
8字型摩天輪睇地盤
未去到新濠影匯都已經見到大大個 8字型摩天輪係酒店中間。本應係 130米高望落去應該可以睇到澳門的靚景。可惜摩天輪係氹仔，旁邊仲係地盤，加上今日大霧，玻璃有 D 朦，睇得唔清晰，有 D 失望。
▲ 近睇就發現，原來摩天輪並非 8字型而係胡蘆型。
▲ 係車廂入面有唔少建築結構阻住景觀。
▲ 因為橫琴未發展，所以無乜嘢睇咁。
▲ 車廂地下有塊透明玻璃，可以睇到下面的風景。
摺枱膠凳食小食
行得耐係時候食下嘢，呢度條美食街設計到好似澳門的福隆新街，每間店以紅鐵閘、摺枱膠凳就佈置，非常有特色。至於食物當中有唔少馳名地道小食，雖然未必係澳門最正宗的鋪頭，不過可以一次過食晒都幾方便。
▲ 摺枱膠凳好有大排檔風味。
▲ 記得以前路環真係有支人咁高既橙汁架！
▲ 除咗小食，呢度都有多間食肆，今次我就去咗滬菜食府 － 上海魅影。雀籠的設計好特別。
▲ 豆腐要砌到咁碎，好巧師傅功架。
▲ 橙色的小籠包入面滿滿酸辣湯，熱辣辣的湯汁刺激著口腔每一個角落。
▲ 除咗上海菜，仲有分子甜品，每一份都好細緻。
酒店房新又乾淨
上到房，今次我住的是明星匯，地方唔算大，不過勝在夠新，而且都算乾淨，景觀亦算開揚。
▲ 18樓望出去景觀亦算開揚。
▲ 可惜廁所無浴缸，來本想浸浴啊！
▲ 雖然無小食 bar ，不過窗邊放了兩個生果。
▲夏天去有個室外泳池可以游水。
▲ 5月仲新開咗條 400米的漂浮道俾住客玩，好舒意啊！
分享到 :
最新影片
