係網絡的世界，RPG 就係不停做任、打怪，但就係因為嗰種投入另一個世界的感覺令一著迷。估唔到「實況角色扮演」的遊戲世界竟然跳出電腦螢光幕，成為真實版的 Planet J 冒險王國。今日我依莉詩就走入去試玩了。
一人一角色進入樂園
呢個室內的主題樂園引入了角色扮演概念，每個入去的玩家都係傳說中的「冒險使者」，協助拯救魔石王國。進入樂園後，玩家會獲發一本稱為 「魔導卷」的電子裝置，並從「魔導卷」中獲得各種任務，你就可以根據指示完成以得到分數。玩家在樂園中就好似平時玩 RPG 咁，可以全情投入冒險使者角色，接受各個意想不到的挑戰、進行刺激的冒險之旅。
▲ 公測期間每節會係 1個鐘，要把握時間完成任務啊！
▲ 冒險使者需要租借一本「魔導卷」，而「魔導卷」會引領你在魔石王國進行各種任務，同時記錄你的遊戲進度，讓你重返王國時，得以繼續冒險。
十萬呎場景如迷宮
魔石王國雖然係室內樂園，不過一 D 都唔細，佔地 100,000 平方呎，分為 8個區域。今次我去到只係開咗 6個， 7月正式開幕就會全部開放，但都已經大到好易蕩失路。當中每個園區都有不同的佈置，亦有不同的魔物出現，原格上走可愛、童話風，小朋友或者女士們應該都會幾受落。據說呢個樂園的設計團隊曾建設美國迪士尼樂園同環球影城，所以係佈置上一 D 都唔馬虎。
▲ 每一個區都有各自的風格同名稱，等你做任務的時間容易知道自己係邊區。
▲ 每一區都有不同的魔物係度生活。
▲ 雖然佈置上好出色，但路牌上的簡體字好礙眼。
▲ 同一般 RPG 一樣，無血就需要去救護站接受治療了。
百幾個任務有排玩
呢個主題樂園最特別的地方就係要代入角色以完成各種任務。場內就包括了超過 100種任務，而我地會係「魔導卷」自動接收不同任務，配合場內 200種互動遊戲設備，作偵查同接受挑戰。但一個任務大約要 15-30分鐘先可以完成，如果入場一個鐘就只完成得 2-3個任務，所以要完成所有任務應該都幾難。幸好得分同紀錄會儲存係魔導卷，到下次嚟都唔駛重新計過。
▲ 因為每本「魔導卷」會體驗不同路線的任務，如果想同朋友一齊玩最好只租一本「魔導卷」。
▲ 場內有 200種互動遊戲設備，等你尋找同收集物件以完成任務。
▲ 每個任務都有一個主要遊戲，每個主要遊戲都好似玩一部街機咁，我就玩了拍蘑菇同跳舞機，身手遲鈍 D 都玩唔到。
▲ 每部街機都有自己的特色，好似呢部就係魔法製藥的裝置，要倒唔同顏色的藥水製藥。
精品店賣自家怪獸
樂園中的角色同魔物都係原創，並唔係抄任何一隻 RPG ，所以樂園旁的精品店所賣的精品都係全澳門獨家。雖然知名度唔高，不過都幾可愛架！
▲ 精品的種類都幾多下，有毛公仔、匙扣等等。
▲ 就算係毛公仔都有唔同 size。
依莉詩：「場景靚但簡體字好唔順眼」
其實我幾鍾意呢個主題樂園的概念，融入咗角色扮演不但可以令玩家更投入，而且不同的任務令每次入場都有新的體驗，加上了解到整個開發過程包括故事主題創造、遊戲研發、角色設計、遊戲裝置的生產及安裝，均由香港團隊負責就更有親切感。不過，雖然話任務解說會根據「魔導卷」選擇語言去講解，但路牌上只有簡體字真係睇到好唔順眼。至於樂園的風格以可愛為主，相信未必吸引到玩開 RPG 的宅男們去玩，相反會係俾 3-16 歲的小朋友玩吧！
PLANET J 冒險王國
地點： 路氹金光大道金沙城中心金沙廣場3樓 3009-3010號（鄰近美食廣場）
票價：$80/位 + $120/魔導卷
營業時間：星期一至五 (中午12時至晚上9時)、星期六、日及公眾假期(上午11時至晚上9時 )
查詢：+853 8791 6000
分享到 :
最新影片
