話說近日流傳一個手機 App 教人如何買六合彩必中。必中？唔好玩我啦，你估你係賭神咩？但係本著我好奇嘅心 (加上呢個星期二就係一億五千萬嘅金多寶！)，我決定瞓身重注出擊，為各位 wire 民身先士卒，試一試呢個 App ，睇下佢到底咩葫蘆賣咩藥。
呢個 App 名叫「六合彩必中法」，係 App Store 或者 Google Play 都有得下載，不過只有標準版先用到「必中安慰獎」嘅功能。標準版要買架，但係 $8 就得，所以唔貴。
▲ 睇返個 App ，佢內裡有幾個功能俾你揀，當然大家最留意就係「必中三個字 (安慰獎)」嘅功能啦，咁到底係咩嘢玩法呢？
我地撳入去必中三個字裡面，發覺佢有好多唔同嘅組合係入面，意思即係話，假設你買足咁多注，就至少會有一注，有較高嘅機會率中到三個字或以上，當然愈中得多字，機會率亦係會愈來愈低。(呢度所指嘅係單式投注，並非複式、膽拖等特別玩法。)
▲ 可以見到佢話必中安慰獎都有 399 個組合，假設你要買晒先可以大大提高中三個字嘅機率，換言之，你要買晒要花費 $3,990 ($10 x 399 注) ，假設咁好彩，俾你中到個安慰獎，只能講句，乜你好想中獎咩？
▲我就身先士卒買咗 43 注，都唔少架要買成 $430，對於一個貧苦嘅打工仔，咁就無咗成兩個星期嘅飯錢…
除咗必中三個字之外，仲有其他功能，就係「必中一個字」同埋「必中兩個字」嘅功能，另加一個「好手氣」嘅功能。頭兩個功能唔使多講，都係由佢電腦程式自動產生唔同組合嘅號碼，話會增加機率，所以簡單交代下算。
另外一個好手氣功能，你可以當佢係一個普通幫你抽號碼嘅程式，免費版都有得用，有時只想試下自己手氣又唔想買電腦飛嘅，都可以係度撳個號碼出嚟自己畫下，過下手癮咁：
但係根據網上眾多報導所引述，呢個 App 只係能夠提高中安慰獎嘅機會，實際上對於中頭獎嘅機率影響不大，仍然都有 1,400 萬之一，即係話比起你搭飛機出空難嘅比率更加低，所以話，中頭獎只有三個條件：就係好運、好運同埋好運，唔係點解釋到你咁都中到頭獎。
老實講，筆者都上網睇過好多文章，發覺不外乎都係用唔同嘅買法，例如膽拖、複式等，當中膽拖最為人熟悉，就係揀 3 個膽 + 4 隻或以上嘅腳，然後組合成多條 6 個字組合，從而提高中獎嘅機會。但係係咪真係呢？
筆者認為，好多都好唔划算，甚至好多都要你買好多次先會有一次中，咁到底到頭來賺咗定蝕左呢？
▲ 真買咗 43 注，好訓身
筆者不嬲都好均真，準就準唔準就唔準，不過佢聲稱會高咗機會率，呢個就真係好難講，我唯一可以判斷嘅就係佢一定要中到三個字，假如中唔到，我就評佢為「廢 App」，所以要知道佢準定唔準，真係要睇返六合彩嘅攪珠結果嘞！
相關影片: