數碼同學會:媽媽研發遊戲 助 ADHD 童提升專注力

讚好此文:

五月 24, 2016 •Tech+, 健康, 生活科技, 遊戲評測, 配件

坊間出現咗利用腦電波玩嘅遊戲,俾用家睇到自己嘅「腦力」,數碼港創意微型基金及數碼港培育計劃嘅成員-Playto 亦用咗相同原理設計遊戲,幫助小朋友提升專注力及管理情緒,更希望藉此幫助患有專注力不足及過度活躍症(ADHD)嘅小朋友。創辦人之一何蘊禮(Vernée)笑言,家長可以放心俾小朋友玩佢哋嘅遊戲,因為佢哋除咗從小朋友嘅角度設計遊戲,亦非常明白家長嘅心態。

Vernee & Ann

Playto 的兩位媽媽級創辦人-何蘊禮(Vernée)及 柏安妮(Ann)。

兩位媽媽一拍即合搞 Startup

Playto 三位創辦人之中包括兩位媽媽-何蘊禮(Vernée)及 柏安妮(Ann),Vernée 有 3 名女兒,其中一名患有專注力不足及過度活躍症(ADHD)。佢曾經接觸過好多醫生同心理學家,了解到醫學上主要有三個方法幫助改善小朋友嘅 ADHD 情況,提升專注力:包括食藥、認知行為治療及神經反饋訓練(NeuroFeedback Training)。但呢啲方法一係就有副作用,一係就貴到負擔唔起,要成 $8,000-50,000 美金不等,仲要唔知係咪會有實際影響及改善。

Vernée 喺女兒學校認識咗另一個家長 Ann。Ann 係臨床心理學家,有好多接觸家長及小朋友嘅經驗,非常了解佢哋心理,於是同 Vernée 一拍即合,為小朋友提供一個既輕鬆好玩,又划算方便嘅方法,提升專注力。

108

將「集中精神」訓練成習慣

專注力有問題嘅小朋友,唔係唔可以專注,只係較一般小朋友困難,但其實大腦係可以訓練嘅,而  Vernée 及 Ann 就想透過遊戲完成呢個「訓練」。Ann 表示,每個人集中精神嘅方法都唔同,有 D 人會「UN 腳」,有 D 人會食香口膠、有 D 人會食支煙,所以好難教。而 ADHD 患者個腦轉不停就更加難教。於是佢哋設計咗「GlowMaster」呢個遊戲出嚟,透過遊戲俾小朋友揾出自己嘅方法集中精神,將集中精神訓練成為一個習慣,亦可以幫佢哋理解乜野係專注力。Ann 比喻訓練專注力就好似學踩單車,當你踩咗十次,就會領略到竅門。

DSC03079

小朋友要自行摸索出方法增強集中力,飛機尾部發出嘅藍光表示集中力強勁。

升小學中學過渡期最易出事

GlowMaster嘅遊戲介紹寫明適合 7 至 13 歲嘅小朋友玩,但 Ann 笑住話,即使你唔喺呢個年齡層入面,冇 ADHD 都一樣玩得,「7 至 13 歲係講緊個遊戲嘅故事設計,我哋喺開發嘅時候搵咗 30 個小朋友試玩,問過佢哋意見,再按照佢哋嘅喜好嚟做,所以先話 7 至 13歲。」佢表示,呢個年紀嘅小朋友剛升小學,開始要做功課,同埋升中學呢幾個年紀有好大挑戰,亦最容易發現問題,所以希望呢個遊戲可以應付小朋友嘅需要,幫助佢哋儘快適應。

除咗小朋友嘅意見,老師嘅參與亦好重要。喺數碼港穿針引線下,Playto 參加咗上年嘅「教與學博覽 2015」。喺呢類大型教學展覽入面,藉藉無名嘅 Startup 較難吸引到參加者注意,兩位創辦人笑言因為數碼港夠「牙力」,係數碼港嘅牌頭協助下,佢地先可以喺博覽入面接觸到唔同學校嘅老師,為未來發展鋪路。

DSC03072

玩遊戲前要戴頭箍

Playto 開發嘅遊戲同其他腦電波遊戲一樣,需要搭配一個可以偵測腦電波嘅頭箍,頭箍會將採集到嘅腦電波以藍芽傳送至平板電腦,並將數據呈現喺遊戲之中。Vernée 表示遊戲使用嘅頭箍達到醫療水平,可以偵測到超過 98% 準確度嘅腦電波。

nsh

使用頭箍嘅時候需要將「採集器」放到額頭上,並將另一電極夾著耳仔,製造迴路,讓腦電波通過,並進行分析。

小朋友唔使教   家長要教

Playto 推出嘅首個遊戲可以訓練到多個「腦力」範疇,如記性、專注力及情緒管理,小朋友要令集中力增強,從而喺遊戲中獲得高分,Ann 表示,小朋友唔使特別指導, 2 至 5 分鐘內就識得玩,反而係家長要教,「要教佢哋唔好騷擾個小朋友摸索玩遊戲嘅方法」。同「腦力」相關嘅數據唔會喺遊戲 App 內顯示,家長要另外下載一個 Dashboard App 嚟睇返數據。

83

一次「訓練」可以玩到幾個「腦力範疇」小遊戲,遊戲內會暗中收集腦力數據,並將進度資料傳送俾家長。

DSC03074

玩遊戲嘅過程要戴住頭箍收集腦電波數據。

DSC03071

戴上頭箍後,就會開始偵測唔同嘅腦電波數據。Dashboard App 會將呢啲數據解讀成集中力、思考力等,亦會顯示唔同頻率嘅腦電波接收水平。 從圖中紅圈嘅數字見到小編做訪問時嘅集中力有超過 90 分呢(笑)!

IMG_6027

完成一個小遊戲後,腦力分析會發送至家長的介面,讓家長了解小朋友嘅進度。小編第一次玩就得到高分,創辦人都話我勁,哈哈!

限玩半個鐘   遊戲自動熄

因為 Vernée 及 Ann 都係家長,佢哋會企喺家長嘅立場設計遊戲,但卻令到 Game Developer 十分困擾。例如遊戲開發組嘅同事建議遊戲要有打仗元素,因為根據佢哋嘅經驗,呢種形式小朋友非常受落,但 Vernée 及 Ann 就擰晒頭,「唔得!我哋唔想佢哋打仗呀,咁暴力!」但佢哋問過小朋友意見之後,又發現唔可以完全冇咗呢種元素,結果佢哋唯有妥協,「加少少嘢俾佢哋 射下,有意思得嚟唔會太暴力嘅就得。」

另外 Vernée 及 Ann 要求遊戲每次只可以玩半小時,過鐘就要停,令 Game Developer 大惑不解,「Game developer 問我哋點解要停,佢哋想小朋友繼續 玩落去,我哋梗係唔想小朋友沉迷啦!」所以最終遊戲設計到每次只可以玩半小時,臨結束時仲會有倒數提示,如果要再玩就要等 6 個鐘先可以重新啟動,家長嘅苦心呀!

DSC03093

數碼港助研發推廣

Playto 用咗三年時間製作整套遊戲訓練,加入數碼港培育計劃之前,亦係數碼港創意微型基金成員。Vernée 話,數碼港提供的資金幫到佢地做遊戲開發前的臨床研究,等佢地有足夠的科學實證支持開發。

 

Glow Master by Playto

價錢:$1,288
(包括:MindWave Mobile 腦波耳機、遊戲 App、腦力數據 App(家長用))
查詢:https://playto.org/buy/

• 不想錯過新科技 ? 請 Follow unwire.hk FB 專頁http://facebook.com/unwirehk/
• 要入手生活科技潮物 即上 unwire store
https://store.unwire.hk/

讚好此文:


Comments are closed.

相關文章:



更多同類文章:

最新文章