ASUS 今日在 Computex 2016 上發布了多款新產品，其中這部以輕巧作為主打的 ZenBook 3，無論在效能以至便攜性上都有更大的突破，它更以 MacBook 作為主攻對手，究竟 ASUS 今次又可唔可以靠 ZenBook 3 取回已轉會的用家，各位 wire 民又鐘唔鐘意呢？
好多人出街都唔想拎 Notebook 而用平板電腦作為取代，主要原因都是手提電腦太重，加埋身上各種流動裝置同瑣碎品，對於成日要出街工作的用家確實是一種負擔。ASUS ZenBook 3 的重量就太幅減輕至只有 910g，比起 MacBook 的 920g 還要輕，拎上手確實又薄又輕，同現時的平板相差唔遠，就算單手拎住都唔會覺得重。可能各位 wire 民會覺得，機身輕相對上就要放棄保護性，ZenBook 3 就全面用上鋁合金物料打造，好處除咗更「硬淨」之外，對散熱亦都有一定的幫助，雖然未能作詳細的「煲機」測試，但就以 YouTube 播 4K 片一段時間來講，機身底部都未算太熱，以一部咁薄的機來說已經不錯。
既然 ZenBook 3 又輕又薄，用落又唔算太熱，咁會唔會在硬件上面作出取捨呢？ZenBook 3 的另一個賣點就是效能絕不弱，將會分別有 Intel Core i7 / i5 處理器 2 個版本，記憶體更配搭上 16GB DDR3，所以在剛才的 YouTube 4K 影片測試相當流暢。根據 ASUS 官方資料顯示，ZenBook 3 的效能比 MacBook 高 50%，比起 MacBook Air 亦都要高 7% 左右，當然好多時效能同實際使用體驗都會有唔同，始終 Windows 在長期使用之下，唔多唔少都會感到效能唔及新機流暢，但呢個都是同 Windows 有關。為了進一步加強各位的使用體驗，今次 ZenBook 3 最高更會配置到 1TB PCIe SSD，完完全全解決了 SSD 容量唔多夠用的問題。
ZenBook 3 將會配搭 12.5” 熒幕，最高支援 1920 x 1080 解像度，對於 12.5” 熒幕來說這個解像度已經足夠，夠清之餘又唔會令到字體同 icons 大幅縮細。為了更有效保護熒幕，它更用上 Corning Gorilla 4 Glass 作為保護，對於這類超薄電腦尤其重要，始終熒幕會更容易受到擠壓。對於用得手提電腦亦唔用平板，其中一個原因就是手提電腦都會有一個實體鍵盤，但好多時手提電腦的鍵盤手感始終同一般鍵盤差好遠。ZenBook 3 在鍵盤設計上亦都有花不少心思，除了鍵距同按鍵大小同一般鍵盤無異之外，按鍵的高度更提升至 0.8mm，每個按鍵的回彈感都更好而且相當寧靜，加上背光設計就算在較暗環境下都可以繼續打字。
不過講到 ZenBook 3 的缺點，就是與 MacBook Air 一樣得一個 USB Type-C，雖然 ASUS 都有推出自家品牌的擴充器，相信亦都可以兼容現時市面上的 Type-C 擴充器，但始終對於追求輕便的用家來說不太方便，其實只要多加一個 USB 3.0 就會好好多。ZenBook 3 的續航力都算唔錯，官方表示續航力長達 9 小時，而且支援 Fast Charging 技術，只要充電 49 分鐘就可以有 60% 的電量，萬一趕出門口先發現無電都唔洗太擔心。Touch Pad 方面，可以支援多指指令，就算用慣 MacBook 的用家都可以立即適合，無需再重新學習，在右上角亦加入了指紋感應器，要登入 Windows 10 就會更方面更安全。
講咗咁耐，如果講成部機的感覺，ZenBook 3 確實唔錯，咁究竟又賣幾多錢？現時看到將會有 3 個不同版本，其中最便宜的 $8,000（USD 999） 有找，用上 Core i5 處理器、4GB RAM 同 256GB SSD，以這個規格來說其實同現時同級產品相差唔遠。至於高一級就賣 $11,500（USD 1,499），處理器已經用上 Core i7 同 16GB RAM，SSD 亦都升級至 PCIe 512GB，速度上會比普通 SSD 更快。而最頂級配置就是將 SSD 容量再提升至 1TB，售價就要再貴多 USD 500，要 $15,500（USD 1,999）先有交易，所以如果小編要買的話，Core i7 版本配 512GB SSD 就相抵玩。
