今年 Computex 雖然不少廠商都是以 VR 作為主打，但其實各個品牌之間在 VR 產品上的分別不大，反而 ASUS 就大膽推出了一款外型相當可愛的智能機械人 Zenbo，外型上確實與 WALL-E 有幾分相似，相對上就更加智能更人性化，仲識得行、睇、講、聽、學習同表達情緒，就算各位 wire 民想買都可能有排等，而家就等小編同大家介紹一吓先喇。
識得聽有對答
智能機械人一直都是大家的夢想，希望有朝一日屋企可以有一個智能助手，為大家處理家中各種大小事務，最好洗衫、煮飯、湊仔全部攪掂晒，以今時今日既科技來說，要真正實現就比較難。ASUS 今次就介紹了一款外型相當可愛的智能機械人 Zenbo，名字就結合了 Zen 同 Robot。Zenbo 下半身採用了球體設計，當中分別有喇叭、用於移動的設計、系統硬件以及電池，至於「頭部」就有一個熒幕，用於顯示 Zenbo 的各種表情同內容，至於收音咪則可能隱藏於頭部兩側。講得智能機械人，當然唔止可以執行指令咁簡單，就現場的示範，只要對 Zenbo 講出 Hi Zenbo，就可以再講出想執行的指令，其實方法同大家現時用開的 Siri 或者 Google Now 一樣，有時 Zenbo 仲會識怕羞添架。
照顧家人好週到
如果 Zenbo 只是做到一般對答的話，咁就無咩咁特別，佢除了可以對答之外，仲可以作出不同的互動功能，例如小朋友可以叫 Zenbo 講故仔或同玩遊戲，對家中的年老用家，就可以透過語音上網、網購甚至當有危險時即時發出求救訊號，家中其他成員會收到來自 Zenbo 的視訊通話，透過 Zenbo 的鏡頭，就可以即時看到家中老人家是否需要進一步協助。Zenbo 仲可以控制家中的各種電子產品，只要配合埋 ASUS 各種智能家居的周邊配件，要校燈光光暗又得，操控電視冷氣甚至影相都無問題。如果各位 wire 民鐘意煮吓飯仔，又一時之間諗唔到點煮，只要問 Zenbo 就會幫大家搵到有關食譜，仲可以逐個步驟讀俾你聽。
其他特別產品
ASUS 今年 Computex 確實推出較多新產品亦較全面，除了重要的 ZenFone 3 系列、ZenBook 3、Transformer 3 系列同 Zenbo 之外，周邊產品都有不少。
▲Zenflash S 是上代產品的升級版，體積較細方便攜帶，與 ZenFone 3 機身更為配合，可以提供更強的補光效果，夜晚影人像都是必備。
▲呢個木盒其實是一個外置 4K UHD Blu-ray 機，可以說是早前 Impresario SBW-S1 的 4K 升級版。
▲ASUS 推出一系列 SmartHome 產品，只要透過一個 App，要控制全屋各種電器都話咁易，仲可以有埋防盜功能。
分享到 :
最新影片
