小小錢可以將你屋企普通冷氣升級 iOT 智能冷氣 ，用手機 APP 係知道屋企幾度再開定冷氣等 ！ 加個 Ambi Climate 智能冷氣遙控就可以做得到。我依莉詩就借咗番公司玩啦！
呢個智能冷氣遙控係由香港的物聯網初創公司 Ambi Labs 設計，2014年係 Kickstarter 集資時風頭一時無兩，不過就最近先決定推出市面。坦白講，佢所做到的功能係新款的冷氣系統已經一早出現咗，只係因為舊款的冷氣做唔到，所以先需要呢個智能冷氣遙控令屋企原先的冷氣變智能。而佢的原理好簡單，就係將 Ambi Climate 透過 Wi-Fi 連接家居網絡，我地就可以透過手機 App 遙距控制 Ambi Climate 發出訊號，再利用紅外線控制冷氣的溫度同模式等。因此，就算舊式冷氣都可以番屋企前用手機開定冷氣，一入屋就可以有舒適的環境。依家 Ambi Climate 支援超過 350 種不同型號的冷氣遙控，我測過公司 3間房的冷氣都可以分別控制到，而且反應都幾快。
▲ Ambi Climate 一隻手掌咁大，放係屋企都唔會好礙眼，而前方有 3粒 LED 指示燈，3粒都著就代表正常運作。
▲ 後面有 USB插口，要長期插電先可運作。
▲ 頂部有 7 個紅外線收發器連接冷氣機，4米左右的距離都可以控制，唔似平時要放到個控制埋一埋先有反應。
▲ Ambi Climate 兼容 iOS 8 、 Android 4.1 系統或以上。
▲ Setup 好就可以即時控制冷氣溫度。
▲ 基本的溫度、模式 同 扇葉都可以控制到。
▲ 如果唔想下下控制，都可以係 App set 定幾時開關冷氣。
除咗開關冷氣，Ambi Climate 內置 6個智能感應器負責收集有關用戶所處的環境數據，例如室外的溫度、陽光和濕度。我地唔單止可以係 App 獲取冷氣機的詳細數據，智能系統更會持續分析家居的溫度、濕度等數據，再因應用家個人喜好和習慣，自動調節冷氣機至最合適的環境，同時做到省電慳錢的客觀效果。不過我用的時間除咗溫度，其餘的數據都未收集得夠，看來都係要手動調校一段時間先有成效。
▲ 就算唔係屋企都可以透過手機 App 知道家中環境數據同冷氣的狀態。如果有人係屋企偷偷開冷氣都知道呢！
▲ 當然，要佢識得自動調整冷氣系統，需要一定的數據啦！
雖然話搖距控制同變頻等功能都唔係新科技，大部份新款冷氣都會有，不過冷氣唔用到壞都好難會換，所以呢個智能冷氣遙控對於舊冷氣都幾實用。以後就唔駛番到屋企先開冷氣，仲要等多 10幾分鐘先開始有涼意，而且可以自動調節溫度、濕度等，就唔怕瞓瞓下凍親了。
售價：美金 179 元(即約港元 1,393)
查詢： ambiclimate.com