香港的機鋪執完一間又一間，間唔中想去打下機都幾難搵。唔知大家仲記唔記得以前放學入機鋪打太鼓的日子呢？最近東港城就舉行《太鼓之達人》的展覽，唔單止有得同可愛的「和田咚」、「和田咔」影相，仲有太鼓街機免費任打，畀大家一顯身手。我依莉詩今日就同咗製作人中館賢先生及設計師笹岡武仁先生傾計，了解《太鼓之達人》呢個世界知名的遊戲係如何誕生。
唔經唔覺《太鼓之達人》已經推出咗 15年，但依然人氣爆燈，無論街機定家用版，男女老少都應該玩過，不過原來係在2001年開發的時候，連遊戲公司都唔覺得隻 game 賣得，令團隊感到很大壓力。幸好製作人中館賢先生同團隊的眼光，令「太鼓」這種日本傳統樂器可以發揚光大。「喺當年大部份的音樂遊戲對普通人來說難道都幾高，所以想做一隻任何人都可以輕鬆玩到的音樂遊戲。而太鼓玩法簡單，如果碰上流行曲及動漫音樂應該會擦出有趣的火花。」他更笑言自己本身無打太鼓的經驗，為咗設計呢個遊戲，刻意買個太鼓番屋企苦練。
談到《太鼓之達人》的象徵角色， 2位太鼓孖生兄弟「和田咚」及「和田咔」經過 15年的演變漸漸有了屬於自己的性格、說話語調、周邊設定，以至世界觀等，但原來他們一開始只係喺譜面出現的圓圈，笹岡武仁先生笑言「我愈望愈覺得個圈得意，所以設計埋個身俾佢地。」至於點解係呢兩隻色，他就表示「好單純揀咗紅藍兩色，不過想俾小朋友都覺得好睇，所以就用橙紅色同藍綠色。」而最近2位太鼓孖生兄弟更係家用版中大冒險添！
除了可愛的角色之外，當中廣為人知的樂曲相信都係《太鼓之達人》咁受歡迎的原因。喺揀歌方面，笹岡武仁先生就以多啦A夢主題曲為例，表示「一方面歌曲需要有強的節奏感適合以太鼓演奏，另一方面歌曲本身要有咁上下知名度。」不過，唔少人都發現，太鼓街機出完一代又一代，但有時玩開的歌會無咗，笹岡武仁先生解釋係因為一段時間後，某 D 歌的版權過期需要抽走，另一方面又會加更多新歌，而最新的街機版本有大約 500首歌。而隨著社交媒體發展，最近《太鼓之達人》亦開始收錄網民發表的流行曲，去年登場的《太鼓之達人 V version》更推出了日本以外亞洲國家的歌曲。
近年，全球電玩遊戲的市場正因科技發展而改變，用家習慣不斷轉變由落機鋪打機到日日對住手機。對於香港的街機舗不敵時代巨輪一間執完又一間，中館賢先生都覺到非常可惜，「即使我們有推出家用版，但玩落都係街機有真實感。」不過他表示日本的情況同香港不同，認為「日本細型機鋪少咗，不過大型的機鋪愈來愈多，一間可以有 10部太鼓機」，所以對他們都沒有太大影響。談到未來《太鼓之達人》的發展他們說是秘密，不過問到會否融入 VR 技術，佢地就覺得好感興趣。小編亦很期待會有 VR 版的《太鼓之達人》啊！
聽完兩位達人分享係咪好想即刻打番鋪呢？東港城呢個 5,000呎的《太鼓之達人》展覽就有多部最新的《太鼓之達人》街機免費試玩。另外，仲有 15隻 1:1的3D《太鼓之達人》公仔以運動達人亮相，當中包括單車、劍擊、柔道、籃球、拳擊、乒乓球等等。我就覺得影相位都幾多幾特別，可以同「和田咚」、「和田咔」一齊做運動，不過公仔同公仔之間都幾密，多人的時候就要就就位啦！
▲ 場內設有兩部最新的《太鼓之達人》街機係星期五、六及日免費任玩，畀大家重溫當年機舖叱咤風雲的日子。
▲ 懂湯馬士迴旋，也可以跳過太鼓造型的鞍馬，扮體操王子呃like。
▲ 騎上發光單車後，一邊踩一邊啟動發電裝置，彩虹燈光逐一亮起後，亦會啟動太鼓主角發出光芒。
▲ 配合攝影角度不費吹灰之力就可以高舉 200公斤的太鼓啦！
▲ 來射十二碼與守龍門的太鼓一較高下吧！
▲ 風帆是港隊強項之一，今次太鼓「過江」，說要和各位香港朋友一較高下。
▲ 一個個太鼓排排企，睇你的球技好定佢地的定力夠啦！
雖然怪怪地，不過同場除咗有《太鼓之達人》的限量精品外，中間仲有間紅卜卜的 pop-up store，入面展出過百款珍藏波鞋，當中包括Air Jordon I原版等全球限定款式，全波鞋狂迷不容錯過！
▲ 聽閒呢對係手繪波鞋，得一對架咋！
▲ 活動期間，每逢星期五、六、日，場內設有期間限定店，搜羅近 20款全新的《太鼓之達人》精品，全部貨品都係東港城獨家限定，其他地方無架！
▲ 唔同表情的太鼓兄弟係咪好可愛呢？
▲ 夏天做運動一定要飲多 D 水啊！
▲ 手提袋都唔錯架！
▲ 唔知著係呢件 T-恤打太鼓會唔會醒 D 呢？
▲ 件衫好似有 D 花，不過遠望一定認到你！
東港城 x 太鼓之達人運動會
日期：7月9日至8 月31日 (10am – 10pm)
地點：東港城一樓展覽場