Processed with VSCOcam with f2 preset
幾個星期前，港女去咗一個工作坊幫手，工作坊的主題係由得獎攝影達人 Wilson 教大家用手機影相。幫手期間，港女當然唔執輸，順便偷師，學下影靚相啦！玩完成場工作坊，港女對 Wilson 講嘅其中一句教學一直念念不忘，而且深表共鳴：「水平真係好重要！」我即場點晒頭。
點解港女對於呢一句教學咁有反應呢？好可能係因為我有「水平強逼症」。
有時得閒上網睇下人地去旅行啲遊記，除左有大量文字解說有咩好睇好玩好食，總係少不免會有啲風景照、食物照、個人照… 影俾人葡萄下。但睇呢啲遊記個陣，唔知點解總係有好多人鍾意影到張相斜左，尤其是背景有地平線、海、廣闊平原等，斜左少少都好覺眼，唔係頭已側嘅問題，係睇到我好唔舒服，好想瘋狂幫佢 rotate 晒啲相。
我非常明白唔係人人都係攝影師，但攝影技巧 101 唔係就要影到張相四四正正咩？自拍都算喇，有人揸機都可以影到張相斜晒，港女真係接受唔到。Sorry，好大怨氣。
就係因為港女有呢個「水平強逼症」，我部相機係會長期開著個 4 條井字型「黃金分割線」，方便構圖之餘，也方便對正，唔會影到歪晒。萬一真係手快快唔夠時間俾我對正影相，好彩無論係電話定係 Photohop 都好，可以事後校正，轉返正張相先 Post 出黎，唔係點見得人。
大家千祈唔好睇少呢幾條「黃金分割線」，我就係用佢黎教媽媽影相。咁當然，冇人係你心入面個條蟲，你想媽媽影到你要嘅效果，就要俾適當的指示，除左先影一張做示範、幫佢度好啲位之外，最好就係教佢睇畫面。例如影個人照，你就同佢講地下條線痴住畫面內下面嘅橫線，個人要係中間、左邊、右邊等。俾張媽媽的作品大家睇下啦：
其實仲有一個蹺妙，就係唔好影大頭相。媽媽s 好鍾意幫人影大頭相架，因為佢地覺得個人細細粒睇唔清楚。但影大頭好多時都會出事，斜左扭返正會 crop 走一忽，而家啲相像數咁大，影完執完 crop 返個大頭出黎都可以好清，唔使下下隊到咁埋架嘛！