如果以為 Virtual Reality 虛擬實景遊戲只係放手機用 Cardboard 睇嘢，咁你就錯啦！其實 VR 遊戲仲可以有好多唔同的體驗。襯住暑假熱辣辣唔想到戶外，我依莉詩就介紹 8個體驗 VR 遊戲的好地方俾大家，有平有貴，豐儉由人！
今個暑假有唔少商場設有 VR 體驗遊戲，雖然未必好刺激，不過總算係免費，適合初體驗的大人細路。
非洲咁遠未必個個去到，但用 VR 就可以將非洲的草原立即搬係眼前。3款港產 VR 遊戲就登陸德福廣場，俾大家試玩。
第一個挑戰要係好似洪水傾瀉的瀑布旁，踏上步步驚心的吊橋，拯救橋上受傷的兔仔。遊戲雖然簡單，但玩遊戲的地方真真正正係木橋上，加埋開始前的動畫配合水聲隆隆的聲音令人很容易投入其中，要係真搖晃的吊橋上行，真係小 D 膽都唔得！
而第二個挑戰需要企上吉普車後方，係只見動物不見人的馬塞馬拉大草原上，用望遠鏡搜尋獅子、大象、犀牛、水牛、花豹等「非洲五巨」身影。而最有趣的是吉普車後方會左右搖晃，就好似真係企左上係前行緊的吉普車上，睇動物之餘都要練好平衡力啊！
最後一個挑戰要係被稱為「非洲屋脊」的乞力馬札羅山上展開滑翔傘，係晃動同涼風下，用雙手操縱滑翔傘控制方向同平衡，並係湖面 3 個浮島之一降落。係山水望落地面的感覺好自由，雖然唔係真正玩緊滑翔傘，不過飛飛下真係唔想降落。
詳情可以睇番：依莉詩坐吉普車 + VR 影大象
真實度：★★★☆☆
刺激度：★★☆☆☆
抵玩度：★★★★★
收費：上載照片至Facebook 即可參加其中一個 VR 遊戲
日期：2016年 7 月 28日至 8 月28日 (中午12 時至 晚上 9時)
地址：德福廣場一期中央展場
同樣係 100% 香港設計，2款 VR 遊戲以《80步遊世界》為主題帶大家觀賞壯麗景色。
第一款遊戲「天行者」讓你現身英國倫敦 250 米高空。遊戲雖然簡單，要係 45秒內一邊射汽球一邊行到獨木橋對面，不過有畏高的朋友都會步步為營。
而「深海潛行」讓你登上黃色小潛艇，潛入澳洲大堡礁，係燦爛繽紛的海底世界收集寶石。雖然畫質沒有外國的遊戲高，遊戲時間亦只有分半鐘，遊戲亦沒有太多變化，不過總算是香港 VR 遊戲的第一步吧！
詳情可以睇番： 淘滿慈 ：「《Pokemon Go》 幫到我，但香港開發 VR 遊戲有難度」
真實度：★☆☆☆☆
刺激度：★☆☆☆☆
抵玩度：★★★★☆
收費：登記成為 PopFans Smart 會員，並消費滿$500 即可參加其中一個 VR 遊戲
日期： 2016年 7月16日 至 8月28日(中午12 時至 晚上 9時)
地址： PopCorn一期一樓大舞台
Tim Cook 確認今年中國有 Vision Pro 外媒發現 visionOS 加入廣東話 Sony PSVR2 被指暫停生產 推出一年銷量未如理想 FevaWorks 兩大免費遊戲設計工作坊 免費步入 Unity 2D / 3D / VR 遊戲設計入門
而 MCP 新都城中心就唔止玩 VR 咁簡單，有部份遊戲仲有加入埋AR體感互動。
當中二期的「擬」形換「影」巨型單車賽就將 3D Hologram 結合VR 技術，玩家需要走進巨型全息投射裝置內，戴上 VR 眼鏡並真實地駕駛單車，進入虛擬實境的越野單車場區，參加比賽。而場外的觀眾亦會經全息投射裝置睇到立體的虛擬比賽路線，效果十分有趣。
雖然只有一個 VR 遊戲，不過還有以 AR 進行的「快跑激鬥」互動屏幕遊戲、採用體感技術及噴水裝置的「陸上激鬥水運會」及 結合真實及刺激度高的「鐳射神槍手」射擊場館，令大家的體驗去到另一層次。
真實度：★★★☆☆
刺激度：★☆☆☆☆
抵玩度：★★★★☆
收費：於商場以電子貨幣消費滿 $300 或以上，即可參加其中一個遊戲
日期： 2016 年 7 月 14 日至 8 月 31 日 (逢星期五、六、日及公眾假期)(下午 1 時至晚上 9 時)
地址： MCP 新都城中心 2 期 L1 天幕廣場
VR 遊戲唔一定要刺激先好玩。圓方就以花為主題，除了將金區搖身一變成為繽紛萬花園，高達 6米的巨型摩天輪及七色彩虹豎立於翠綠花園的場景佈置中，更設有 VR遊戲裝置帶領大家一起走進栩栩如生的花海世界中，捕捉蝴蝶及昆蟲，於鬧市中感受大自然魅力。
真實度：★★☆☆☆
刺激度：☆☆☆☆☆
抵玩度：★★★★☆
收費：免費
日期： 2016 年 7 月 23 日至 8 月 31 日 (上午10時至晚上10時)
地址：ELEMENTS圓方金區1樓
試過商場的基本體驗，如果覺得唔夠喉，不妨去體驗館玩一 D 進階段的遊戲吧！
JetOne Motion 算係香港 VR 體驗館的一哥，到現時已經係各區已經有 4間分店，每一間的收費同遊戲都唔同。不過勝在同場有 VR遊戲同模擬器可以玩，感覺有 D 似小型機鋪。
4間當中觀塘店收費最平，有兩部賽車模擬器同一部 VR座位。你可以選擇過山車或者射擊遊戲，坐上半球狀的座位，就會隨住 VR 播放的影片而郁動，相當逼真。而賽車模擬器用軚盤同腳踏控制架車，模擬賽車的感覺。不過呢度就逐樣收費，當中 VR 座位 15分鐘 $60，可以揀兩個遊戲，而模擬賽車 15分鐘 $120，如果想雙人連線每人要加 $50，抵唔抵玩就見人見智。
而銅鑼灣店重點放係 VR Walker ，只要戴上 VR 眼鏡並企入步行裝置後，猶豫置身 3層恐怖鬼屋，穿過莊園、醫院及嘉年華，音樂不但陰深恐怖，小丑仲會突然彈出嚟，真係隨時嚇到腳軟。而收費為 15分鐘 $180。
中環店的收費係 4間中最貴，但私隱度比較高，玩到慘叫都唔怕瘀。除了 VR 遊戲，呢間的重點放係飛行模擬器，三個巨型曲面螢幕、控制器同會震既凳，坐上去就好似係飛機的駕駛倉一樣。而玩的時候旁邊會有飛機師資格的導師指導，佢地都好有耐性，除咗教你點飛之外，仲一路講佢學飛的故事比你聽。
詳情可以睇番：試玩 JetOne 電玩體驗館
真實度：★★★★☆
刺激度：★★★★☆
抵玩度：★★☆☆☆
收費：觀塘店、銅鑼灣店：逐項收費、中環店：$580/30mins、$980/hr
地址：觀塘 APM 6樓 (三聯書局對面)、銅鑼灣名珠城HMV旗艦店4樓、中環世紀廣場14樓1405室
eGG 唔知得眼鏡，原來仲有 VR 眼鏡。體驗館以 Pop-up 形式係各商場出現，地方雖然細，不過都有幾多款 VR 遊戲可以玩。
其中一款 VR 過山車的遊戲，配合 3 Glasses – D2 VR 頭戴式裝置，加上一個可搖擺的平台，會隨過山車的移動而作出相應的搖擺，大大增加了真實體驗。
而場內比較大型的 VR 體驗是以射擊為主的遊戲，2 人拍檔乘坐飛船勇闖冰天雪地，與朋友一齊擊退四方八面出現的怪獸。
當中最過癮的就係打喪屍，大家可以盡情射殺來自四方八面的喪屍兵團。遊戲情景設定由於都相當黑暗，戴上耳機確實會令人有不寒而慄的感覺，玩玩下俾人拍搏頭都真係幾得人驚。
詳情可以睇番：屯門 Pop-Up Store 大量 VR 任你玩！
真實度：★★★★☆
刺激度：★★★★☆
抵玩度：★★★☆☆
收費：$50 / 個、$100/3個
地址：
7月22日至8月底：屯門市廣場中庭
7月28日至8月底：荃灣荃新天地１期中庭
8月至11月：尖沙咀 The ONE 商場地下 GA11 號舖
Tim Cook 確認今年中國有 Vision Pro 外媒發現 visionOS 加入廣東話 Sony PSVR2 被指暫停生產 推出一年銷量未如理想 FevaWorks 兩大免費遊戲設計工作坊 免費步入 Unity 2D / 3D / VR 遊戲設計入門
電腦愈來愈普及，網吧都要與時並進。金雞廣場的陽光網絡就增加了 VR 專區，並設有 2 個 3 米 x 3 米 VR 空間，以及 1 個 VR 賽車空間。當中有 20多個遊戲俾你揀，包括《Hover Junkers》、《Project Cars》、《Job Simulator》及《Fantastic Contraption》等，而部份 game 仲有得對戰，對機迷嚟講絕對係新體驗。呢度的收費比合理，$240 可以包晒個專區，唔限人頭，咁帶多幾個人一齊玩就會平好多啦！
真實度：★★★★☆
刺激度：★★★★☆
抵玩度：★★★★☆
收費：$240/hr
地址：九龍旺角洗衣街 39 – 55 號金雞廣場 6 樓全層
VR 唔一定係成年人的專利，小朋友都一樣可以玩。而呢個硬蛋香港體驗館就免費開放俾公眾參觀。入面唔單止有 VR 虛擬體驗 ，仲有機械人、3D打印、智能家居及智能穿戴等多種產品試玩，算係一個一家大細的好去處！
真實度：★★★☆☆
刺激度：☆☆☆☆☆
抵玩度：★★★★☆
收費：免費
地址：香港數碼港道 100 號 3 座 F 區 8 樓 811-813 室
試完咁多款 VR，如果想番屋企慢慢玩，可以參考番：
Tim Cook 確認今年中國有 Vision Pro 外媒發現 visionOS 加入廣東話 Sony PSVR2 被指暫停生產 推出一年銷量未如理想 FevaWorks 兩大免費遊戲設計工作坊 免費步入 Unity 2D / 3D / VR 遊戲設計入門