網上不時都有「1秒學懂拍出女神級女友」、「女朋友拍影秘笈」等等的攻略，奈何就係點學點影都影唔到長腿、瘦面的效果，有時未必係相中人的問題，更可能係相機鏡頭唔夠廣角的關係。最近 CASIO 就推出了最新一部「反Mon自拍神器」EX-ZR5000，雖然外觀上同上幾代差唔多，不過就可以包你一秒變長腿。講到咁勁，只有 150的依莉詩就立即搵朋友一齊試機啦！
外型改變不大 薄荷綠夠討好
今次 EX-ZR5000 的外觀同上幾代差唔多，無論前置按鍵、閃光燈、錄影按鍵等的位置幾乎同 ZR3600 完全一樣，甚至機身淨重量同樣係 209g。不過 ZR3600 左方的凸起手握位就變得平坦，雖然睇落順眼咗，但就無咁好揸手。顏色方面，ZR5000 飛走了艷麗的桃紅色及優雅的紫色，轉成甜美糖果色系的粉紅、粉綠 及 文青風格的復古黑、自然白，明顯針對不同喜好的女仔。可惜粉紅及粉綠機身背後的手握位仍然配襯白色，令機背看起來還是有點玩具相機的膠味。
▲ 可以 180度上掀的螢幕始終係自拍神器必備設計，能夠隨時影人影景。
▲ 反 Mon 系列的自拍神器外型一向都似普通 DC，唔會好似 TR系列咁特別。
▲ ZR5000 同樣有白色，但就沒有暗閃，比較自然。
▲ 粉紅色機身帶有珍珠亮光，帶有點點淘氣。
▲ 薄荷綠係近年大熱的色系，sweet 之餘帶點浪漫，送俾大部份女仔都應該無法抗拒。
▲ 機頂上方的功能轉盤新增了「ART藝術濾鏡功能」及「智能廣角變焦 (Wide View Photo)」，但就取消了「SR多清晰影像變焦」。大部份 ART 藝術濾鏡係 TR系列已經出現過，可以令自拍變得更有 ig感。而「智能廣角變焦」就係同時拍攝「特寫」及「超廣角」影像各一張，並即時合成「變焦動畫」，對於呢個功能，我就覺得用途不大，影風景未必會有一個想放大的主體，自拍就更加唔會想放大自己 D 毛孔。
▲ 機背螢幕右側保留上一代的錄影按鍵、WiFi及設定選單等，位置亦沒有太大變動。
▲ 官方估計充電一次可拍攝 430張相片。我今次用咗一日，剩一格電，加上可以用 USB充電，再去旅行都唔擔心無電的問題。
超廣角一秒變長腿
講嚟講去 ZR5000 的外型同上一代無分別，咁點解仲要出新機呢？原來 ZR5000 最大的特點在於鏡頭規格由 ZR3600 的 25mm 升級至 19mm 超廣角鏡頭，而最大光圈從 f/2.8進步至 f/2.7，不但可以拍到更多的背景，令畫面看起來更有張力，就岩角度仲可以一秒變長腿添！此外， ZR5000 內置自動紅外線阻隔功能(IR-cut filter)，加上採用 1/1.7吋高速CMOS感應器，即使逆光或者昏暗環境拍攝都唔怕出現模糊或雜訊。不過其遠攝功能就被削弱了，由上一代的 12倍光學變焦降至 5 倍光學變焦，想影紅葉或者櫻花的大特寫就唔夠用了。
▲ 只要好好利用鏡頭邊沿位置會被拉長的特性，條腿想幾長就幾長都得。
▲ 影風景亦變得更加廣闊壯麗，不過記得橫到的時候人物要集中係晝面中間，唔係就會影出肥手臂啦！雖然係逆光相，不過係無打燈的情況下，主體的輪廓仍然清晰，沒太多雜訊。
▲ ZR5000 削弱了特強的遠攝功能，以 5倍光學變焦、10 倍多影像超高解析度變焦 及 4倍數位變焦代替，想影紅葉或者櫻花的大特寫就唔夠用了。
相關文章:
Casio 推出全新手錶戒指 外觀儼如小型 G-Shock 可顯示時間兼計時 柴犬主人們注意 Casio 推出柴犬主題 G-Shock 三款配色選擇 Casio 與 Sanrio 合作推出 Hello Kitty 50 週年特別版 G-SHOCK 手錶
粉嫩美肌更勝 TR系列
既然係自拍神器，美肌功能必定不可少。延續 ZR3600 的「粉紅嫩肌」美顏模式，ZR5000 除了可以 12級偏美白或健康古銅色的膚色及 12級平滑肌膚軸外，肌膚看起來更亮白嫩滑，唔再一味死白。比起 TR70 的「粉紅嫩肌」，今次背景唔會染紅，變得更自然呢！
▲ 美顏模式其實同上一代分別不大，都係有 12 級美白或古銅膚色及平滑肌膚軸，而我覺得用 3級美白同 6級平滑肌膚，感覺就最自然。
▲ 因為唔會瘦面同大眼，就算將美白同平滑肌膚推到最高，都唔會變蛇精。
▲ 使用模式旋轉盤就可以使用「Selfie Art」功能，提供 5種自拍藝術風格，包括優雅、唯美、仙境、懷舊、艷麗，令相片增加 ig感，等大家可以即拍即上傳照片。
▲ 除咗藝術風格，今次 ZR5000 加入了 TR系列部份的藝術濾鏡，包括玩具相機、黑白效果、水晶球特效等，更容易影出超有 feel 的自拍呢！
自動傳相更快更易用
至於傳相技術方面，「EXILIM Auto Transfer」應用程式介面改進了不少，指示不但更清晰，而且只要連過一次就不必再特別開 WiFi 去選擇照片來複製，的確簡單不少。另外，手機遙控相機的功能亦提升了，係手機可以切換拍照錄影、變焦、倒數計時及閃光燈開關，更可以全螢幕拍攝，最重要大大減少了延誤，變得好用了太少。
▲ 每次最多可以揀 100張相過落手機，分幾鐘左右就過晒，啱晒心急的我即影即放上 Facebook。
▲ CASIO 在遙控相機功能部分做的蠻簡陋，像是拍照錄影切換、變焦、倒數計時及閃光燈開關等。
依莉詩：「完全體驗角度的重要！」
今次的改進其實不多，未必吸引到本身有自拍神器或者普通 DC 的朋友升級。特別係新增的「智能廣角變焦」功能用途不大，影風景未必會有一個想放大的主體，自拍就更加唔會想放大自己 D 毛孔。不過，比起 TR 系列的售價 EX-ZR5000 都算吸引，加上有甜蜜浪漫的薄荷綠色機身，都係一份唔錯的禮物。再就啱角度幫女朋友影超長腿女神照，一定開心死！當然，如果你下下橫到用黃金比例構圖，就神仙都救唔到你了！
售價： HK$3,480
查詢：捷成消費品 (2926 2300)
相關文章:
Casio 推出全新手錶戒指 外觀儼如小型 G-Shock 可顯示時間兼計時 柴犬主人們注意 Casio 推出柴犬主題 G-Shock 三款配色選擇 Casio 與 Sanrio 合作推出 Hello Kitty 50 週年特別版 G-SHOCK 手錶
分享到 :
最新影片
