有小朋友嘅家長都好擔心個仔發燒唔舒服，心痛之餘仲要切夜照顧，定時量體溫、餵藥。今年嘅 CES，Withings 就推出了一支智能探熱針，最近呢支探熱針終於登陸香港，仲叫價 $800幾，到底有幾勁呢？等我依莉詩話俾大家知啦！
Thermo 智能探熱針原理其實同紅外線探熱針差唔多，唔需要貼住額頭都可以量到體溫。Thermo 內建 HotSpot 感應器，當中包括 16 個紅外線感應器，可以係 0.5cm 距離探測額頭最熱一點溫度，唔怕小朋友探熱時郁嚟郁去，令數值更準確。
▲ 係額頭上以 0.5cm 距離移動探熱針，2秒內白色位置就會顯示溫度，旁邊嘅燈會顯示小朋友是否仍在發燒。
▲ 探熱針比起一般紅外線探熱針輕巧，只係長過支唇膏少少，方便攜帶。
▲ 綠色位置內有 16 個紅外線感應器，可以喺 2 秒內找到最熱一點嘅溫度。
▲ 探熱針使用兩粒 AAA電。
▲ 我哋同時用探度針同測溫槍量度，發覺測溫槍量到嘅溫度都比較低，並非正常嘅體溫水平。
叫得智能探熱針，重點當然係支援以藍芽或 WiFi 接駁手機，探熱針量度體溫後就會將記錄儲存到 APP，令父母更容易追蹤小朋友嘅病況。
▲ APP 亦可儲存多於一人嘅體溫數據，適合一家人使用。
雖然話 Thermo 唔會直接接觸到小朋友，但始終都要父母親自量度。如果好似曾經試過某牌子嘅智能探熱針，貼係小朋友嘅衫，每小時自動測量，發燒的話會透過 APP 通知父母就更好。單單是增加了自動記錄量度，但定價成 $800 幾蚊，比非智能專業探熱針貴上差不多一倍，未必會有父母捨得入手啊！
售價：$828
查詢：Lava Tech (2768 7009)
