問答題，蠟筆小新個 pat pat 同奶凍有咩共通點？無錯！就係一樣咁震騰騰！依家除咗飛去日本主題餐廳外，去中環嘅 DIM SUM ICON 都可以親吻小新嘅 pat pat 啦！我依莉詩亦第一時間去相機食先啦！
攪鬼嘅蠟筆小新唔單止百厭，仲趕走咗醜比頭成為 DIM SUM ICON 嘅主角。小新仲將自己同佢嘅好朋友正男、阿呆、妮妮、小白、媽媽 同 爸爸 變成 7點心、3款甜品及 4款飲品，等大家盡情打卡呃 like！見到小新嘅動感屁股同大象何B仔係咪紅都面晒呢？
▲ 今次新推嘅點心其實同之前分別唔大，都係以流沙包同蝦餃為主，不過貼咗小新嘅米紙之後造型就唔同晒啦！
▲ 大象朱古力流沙包 $49
小新最自豪就係佢嘅動感屁股同大象何B仔，仲要印係包面上面，睇到人紅都面晒。一篤個屁股，瑞士朱古力及咸蛋黃慢慢流出，超級重口味啊！
▲ 不理不理左衛門奶黃流沙包 $49
同小新亦敵亦友嘅不理不理左衛門化身成 DIM SUM ICON 招牌奶黃流沙包，條眉粗得嚟都幾型架！篤一篤個鼻仲會流出咸蛋黃混合好立克粉、煉奶加鮮牛油造成嘅鼻涕。問你敢唔敢食？
▲ 蒙蒙豬蝦餃海鮮腸粉 $49
要數美冴嘅名句一定係「起身啦！遲到啦！」呢碟蝦餃、鮮蝦腸粉就重現咗小新每朝嘅形態。薄薄嘅腸粉皮包住大蝦、帶子及蟹柳，睇得又食得！
▲ 三兄弟鮮蝦餃 $49
同樣係蝦餃，不過呢款就印上阿呆、小新同正男三兄弟的圖案，同樣可愛。
▲ 震震屁股奶凍 $39
講完點心，講下甜品先！呢個震震屁股奶凍絕對係呃 like 必備！以日本3.6牛乳、淡奶油混合日本魚膠片打造嘅小新 pat pat ，震騰騰，睇到都開心心啊！
▲ 真真假假西瓜糕 $35
真亦假時假亦真，呢件西瓜糕以日本魚膠片造成，而西瓜核以蘭香子造成，睇落似西瓜，食落都有少少西瓜味，不過就好似啫喱咁滑，十分特別。
▲ 情人蛋撻 $35
雖然唔知點解妮妮同小新做咗情人，不過曲奇皮外層鬆脆，配合日本北海道 3.6 牛乳混入日本蛋白做成嘅蛋漿，香滑可口。情侶們一人一件，仲唔 sweet sweet！
▲ 小白朱古力特飲 $39
小白朱古力特飲以朱古力粉、朱古力雪糕、鮮忌廉、碎瑞士朱古力、棉花糖 及 日本3.6牛乳製成，飲落軟綿綿，口感溫厚，同小白嘅形象好夾呢！
▲ 媽媽櫻花味啤酒 ＄69
廣志同好多打工仔一樣，最愛放工後啤一啤。呢杯麒麟沙冰啤酒上面嘅泡沬將啤酒同空氣隔絕，令啤酒內嘅氣泡持久不散之餘增加層次。唔知又啱唔啱廣志口味呢？
▲ 叫啤酒仲會送小新杯墊呢！
除咗點心，小新更反轉餐廳每一個角落。一入到中環店就有一個立體小新等你同佢影相，樓梯仲有一個個小新嘅朋友帶你入餐廳，而店內更有一幅幅小新掛畫，好似走入小新嘅動畫世界。
▲ 呢個動感小新絕對係必影位！
▲ 雖然今次無小新餐具，不過餐紙都幾靚架！
呢間餐廳由開業到現在都係用不同嘅卡通人物做主題，帶俾人一次又一次嘅新鮮感。今次用到小新確實會吸引唔少 80、90後，不過點心嘅款式明顯少咗，來來去去都係流沙包同蝦餃上面加上米紙，似乎少了點創意。至於影相位方面，今次都算幾多，可以滿足到大家打卡嘅慾望。而精品方面，官方暫時未公開，粉絲要好好留意啦！
DIM SUM ICON
推廣期：2016年10月18日 至 2017年1月17日
中環店 (2807 1682)
地址：中環德己立街1-13號世紀廣場B/F
尖沙咀店 (2885 1345)
地址：尖沙店The ONE3樓L308號店
相關影片:
