一年一度嘅萬聖節又到,大家諗好去邊狂歡,過一個既驚嚇又歡樂嘅晚上呢?我依莉詩就搜羅全城嘅萬聖節活動,睇下又有無一個啱你?
恐怖鬼屋驚住玩
無論約好情侶定一班朋友一齊過,鬼屋都係每年萬聖節重點活動。
屍囚之路
免費嘅樂富鬼屋每年都引來超多人排隊挑戰,今年「屍囚之路」把大家投入喪屍世界,通過監獄並記下隱藏密碼,逃出生天,更增設 Hologram 3D 立體浮空投影技術及採用人臉檢測科技(Face Detection) 的「驚魂照屍鏡」,保證驚嚇好玩!今次樂富鬼屋的設計上花咗唔少心思,特別係陰森重犯監房,兇殘殺人犯喪屍現身特襲追殺,驚嚇度甚至比今年哈囉喂某 D 鬼屋更利害。雖然短程比較短,但勝在免費,想感受萬聖節氣氛一於嚟呢度玩吧!
試玩報告:樂富鬼屋萬聖節免費玩!依莉詩:「 喪屍監獄製作認真」
日期:2016 年 9 月 16 日至 10 月 31 日(逢星期五至日、公眾假期及萬聖節當日)(下午 4 時 – 10 時)
地點:領展樂富廣場 B 區露天平台
山頂廣場「小丑・血聲・樂園」萬聖遊樂場
另一個每年都吸引大量勇士嘅山頂廣場鬼屋,今年以萬聖遊樂場之「小丑・血聲・樂園」為主題,透過超真實嘅驚慄聲音,帶領大家感受多個陰森恐怖場景,體驗充滿感觀刺激的恐怖血腥之旅。比起上年驚嚇得多!
日期:2016年9月28日 ‑ 10月31日 (下午2時 ‑ 10時)
地點:山頂廣場 頂層平台 》香港山頂山頂道118號
入場要求:消費滿 $100/ 1張入場券
萬聖節虛擬實境體驗
嫌一般鬼屋太普通,可以去又一城試玩 VR鬼屋。戴上 VR眼鏡就會仿如置身於驚慄詭異場景,感受100%香港原創、令人不寒而慄的恐怖故事。遊戲場景以香港 60年代舊式屋邨靈異事件為背景,玩家須手持搖控器、載上眼罩,獨自走進藏着屍體嘅單位,需要係指定時間內找到方法逃離單位,否則會成為替死鬼。遊戲配以真人聲音引領,令整個驚慄體驗變得更立體像真。另外亦有為小朋友設計嘅魔幻樂園,進入「妖精遊樂場」小朋友同家長可以一同進入虛擬遊樂場感受機動遊戲帶來的刺激快感。
日期:2016年10月6日 ‑ 31日 (上午10時 ‑ 下午10時)
地點:又一城 》香港九龍塘達之路80號
海洋公園哈囉喂全日祭2016
各位大膽鬼當然不會錯過海洋公園哈囉喂。不過今年海洋公園哈囉喂確實有點令人失望,雖然同上年一樣有十種設施體諒,不過驚嚇程度大大減低。除了屍立中學同捉鬼敢死隊稱得上係鬼屋,其他都沒有太多驚喜,大部份走家庭路線。更甚的是,每年最有睇頭的鬼屋,16禁 轉玩 SM ,非常重口味,好似睇 sex 表演咁,但就難以投入。 以往買普通門票就已經可以入晒鬼屋入面所以房,不過今年就係【16禁】、【屍立中學】、【心慌血色吧】及【血祭宮殿】留咗 4個秘密暗室俾優越門票持有人玩。
日期:2016年10月2、7-10、14- 16、20-23、27- 31日 (早上10時 – 晚上11 時)
地點:海洋公園
票價:成人 $ 385 ;小童(3 至11 歲)$193
哈囉喂優越門票:成人 $730 ;小童(3 至11 歲)$365
Disney Halloween Time 反轉迪士尼2016
至於迪士尼 Halloween派對今年比上年有進步,新增了「詭夢實驗室」鬼屋,進入最搗蛋嘅迪士尼惡人及詭異夢境,引發詭怪夢魘!另外,米奇連同多位迪士尼好友換上全新的萬聖節裝束,參與「Mickey and Friends 化妝派對」和「米奇Halloween大街騷」,一起盡情狂歡!一眾惡名昭彰的迪士尼惡人將會在晚間「驚」世現身,密謀聯手反轉樂園,更佔據幻想世界的「迪士尼惡人花園」,及於「迪士尼惡人大出巡」。
日期: 2016年10月28日 ‑ 31日 (上午10時30分 ‑ 下午11時)
地點:香港迪士尼樂園
票價:$428 起
狂歡派對化鬼妝
除了鬼屋,化個鬼妝參加 party 亦是萬聖節嘅重要環節。
動漫基地萬聖節「急急如律令」
萬聖節派對都可以好文青,動漫基地舉辦了一連串節目,用「急急如律令」召喚一眾嘩鬼同大家「驚」住過萬聖節!八位香港漫畫家會於這棟經活化的二級歷史建築不同角落,設計鬼怪角色,等訪客遊走動漫基地,將猛鬼逐隻捉!動漫沙龍亦會有主題書目展示《鬼,全部都係鬼!》,搜羅世界各地的靈異漫畫,嚇到您個心都離一離!「灣仔畫鬼腳」由漫畫家Adam Pun帶大家遊灣仔,一邊聽歷史同鬼故事,一邊畫「鬼」!仲有街頭音樂表演、拉糖表演……仲唔快啲開壇作法,一齊召喚嘩鬼?
日期:2016年10月22日 ‑ 11月13日 (上午10時 ‑ 下午8時)
地點:動漫基地 》香港灣仔茂蘿街7號
「萬聖鬼馬英雄匯」派對 @黃金海岸商場
小朋友亦可以一同參加萬聖節派對。黃金海岸商場的「萬聖鬼馬英雄匯」派對誓要把歡樂氣氛帶到商場每一個角落!各路「鬼馬英雄」將出巡並大派萬聖節糖果;同場並設「英雄遊樂區」射擊攤位遊戲,讓小朋友訓練眼界。小朋友只需打扮成不同嘅英雄卡通角色到場,更可獲氣球世界冠軍代表 Wilson Pang 即場製作出不同英雄武器造型的氣球,齊齊做個威風兼可愛的鬼馬小英雄!
日期:2016年10月29日 ‑ 31日 (上午10時 ‑ 下午10時)
地點:黃金海岸商場 》香港新界青山灣青山公路1號
YOHO MALL「萬聖節派對」
除了黃金海岸商場,YOHO MALL 亦急急召換大小鬼怪齊齊玩。每晚都會有萬聖節百人巡遊,穿上萬聖節服飾在商場內變身遊魂野鬼,巡遊吸睛勾魂。另外更有十八層無間樂隊沿途演奏地獄之歌,鬼聲鬼氣把人嚇至目瞪口呆。巡遊期間頑皮嘩鬼更將大派糖果禮物向人類示好,你會欣然接受還是嚇到雞飛狗走?
日期:2016年10月22日 ‑ 31日 (上午10時 ‑ 下午10時)、2016年10月29日 ‑ 30日 (下午6時 ‑ 6時45分 )
地點:Yoho Mall 形點 》香港新界元朗元龍街9號及朗日路8號
![2016-10-28_125228](https://cdn.unwire.hk/wp-content/uploads/2016/10/2016-10-28_125228.jpg)
「萬聖節魔法黑森林」狗狗鎮嘉年華 第二屆
汪星人亦可玩埋一份,《狗狗鎮嘉年華》以萬聖節魔法黑森林為主題,活動包括狗狗黑森林大街、寵物傳心術、 寵物美容、 狗狗波波池、 狗狗障礙跑、 空中花園手作市集、 狗狗積木展覽及 Trick or Treat 等等。
日期:2016年10月29日 – 10月30日 (下午1時 ‑ 9時)
地點:D2 Place 》香港九龍荔枝角長義街9號
娛藝(UA)院線「UA萬聖習作」
唔單止商場每一個角落都係嘩鬼,就連戲院都充滿驚嚇。3隻嘩鬼殭屍伯爵 (Vampire)、科學怪人 (Frankenstein)和鬼娃安娜 (Annadoll)會到 UA戲院進行秘密任務,係大家觀賞最新「驚」嚇電影的同時,更可品嘗甜「血」爆谷及試玩UA App打卡遊戲獲取獵人包。
日期:2016年10月7日 ‑ 31日
地點:UA院線
資料來源:timable
分享到 :
最新影片
![](https://cdn.unwire.hk/wp-content/uploads/2024/09/iphone16_d_web2-694x390.jpg)