話說籮文由細到大都對汽車有濃厚興趣，尤其呢排做左 unwire 記者，留意 Tesla 呢部咁高科技的車真係好想渣下。 細細個就立志18歲生日就要去報學車課程，可惜當時財政緊拙，好彩，幾經辛苦今年終於考到車牌啦，坊間有人話自己搵師傅學就便宜啲，又有人話去駕駛學院就易 Pass 啲，就等過來人籮文話你知點揀啦！

 

貨Van／私家車 ? 自動／棍波?

第一件事就當然係要知道自己想考咩車種啦，如果你預見自己將來可能會駕駛貨 Van 黎搵食，就當然考客貨車啦，因為持有客貨車駕駛執照亦可以駕駛私家車，如果只為代步用，考私家車就會比較簡單，始終車身較貨 Van 細嘛。

考到棍波牌就可以駕駛棍波或自動波，而自動波牌就只可以駕駛自動波，其實近年市面上各大車廠推出嘅私家車都有自動波和棍波選擇，對自己嘅手腳協調冇太大信心，可以考自動波。雖然考棍波係難啲，不過棍波都有棍波嘅樂趣，亦可以當係學樣求生技能，萬一有架棍波車喺你面前都識揸嘛。但儘管唔好考自動波客貨車啦，因為市面上愈來愈多自動波客貨車推出，但二手市場上選擇都係比較少。

而價錢方面，多數駕駛學校不論私家車或客貨車，自動波或棍波都係一樣價錢，所以籮文就揀咗棍波客貨車，最抵呀嘛！（不過記得要視乎自己能力，否則到時 Fail 咗就得不償失）

▲自動波，容易控制

▲棍波雖然難，但有另一番樂趣

想慳錢就跟師傅 嫌麻煩就報學校

身邊不少朋友都係跟師傅學車，因為跟師傳收費通常都較便宜，而且課堂比較彈性，打個電話同師傅約就得，加上全程跟同一個師傅，師傅會更加了解學生嘅學習進度。但係籮文就係報學校，因為一個字：懶，因為多數駕駛學校都會為學生代辦學牌、路票等運輸署手續，唔使自己去排長龍，而某啲駕駛學校有專屬嘅場內試場和考試路線，難度較低，不過報學校課程就未必全程跟同一個師傅（可以吸收不同師傅嘅意見，都係好事），而且有 Package 綁住，補堂又可能加錢。

咁兩者價錢又差幾多呢，最出名（貴）嗰間學校近日推出好好意頭嘅 $8,838 優惠，包 15 堂實習，送幾堂理論課，而出面跟師傅的話則每堂大約$200，乘返15堂都只係 $3,000，兩者價錢真係可以差好遠架，所以記得視乎自己需要黎小心選擇。（兩者價錢都未包括學習駕駛執照費、運輸署考試表格費用及考試租車費）

▲揀選教車師傅，可以到運輸署查看駕駛教師名冊

有玩模擬 App 筆試 話咁易

如果你係報學校的話，好快學校就會幫你報考筆試；如果你諗住跟師傅學車的話，就記得自己先去運輸署排期報考筆試。筆試唔使用筆嘅！而係採用電腦 Touch Screen 作答，筆試有20題選擇題，內容不外乎一般道路安全知識，只要答啱16題或以上都為之合格。

▲考車必備天書

你問我難唔難呢，可以話你知限時20分鐘，籮文用咗5分鐘之內的時間就秒殺20條問題，因為籮文有溫書嘛！駕駛學校通常都會送一本筆試天書俾學生，跟私人師傅嘅學生都唔使驚，iOS 或 Google Play 都大把筆試攻略 Apps，搭車去試場途中開黎溫一陣都夠做架啦！

上車考試 見真章 抽啱路線 致勝之道

考完筆試（甲部）就要考乙部及丙部，乙部包括：泊位、掉頭、斜路開車、斜路停車。而丙部就係路試。考生可以跟據自己能力選擇循序漸進分期乙部及丙部，又或者選擇合併試，即是一次過考乙部及丙部。

路試方面，考私家車同考客貨車嘅路線不盡相同，不論係跟師傅定係報學校，抽啱路線都係致勝之道。跟師傅的人士可選擇在港島或九龍或新界應考，如果該區有超過一間駕駛考試中心，就會在當中隨機抽一條路線應考。每條路線的路面情況、汽車流量都不盡相同，難度當然亦有分別，所以各位準考生就梗係揀自己熟識嘅區域黎報考啦。

如果你報讀嘅學校有專屬嘅場內試場和考試路線，就記得要揀返位於熟悉區域嘅分校。就好似家鄉位於北區嘅籮文，對於沙田比較熟悉，所以就揀咗喺沙田分校學車。唔及格點算？實不相瞞，籮文第一次考合併試都肥咗丙部，好彩只係丙部唔及格的話，可以只補考丙部，不過又要再排期，等返三五七個月咁解囉。

▲實不相瞞，籮文第一次考合併試都肥咗丙部，好彩只係丙部唔及格的話，可以只補考丙部，不過又要再排期，等返三五七個月咁解囉。

究竟衰啲乜？

籮文究竟衰啲乜搞到要兩 Take 先 Pass 呀？未就係因為籮文份人太內儉，望鏡或者望盲區時動作唔夠大囉，搞到明明有望，考官都剔我「未有察覺交通情況」囉，所以望鏡或者望盲區時動作有咁誇張得咁誇張，同時可以大叫：「等我望下鏡先！～」，確保考官得悉你有望。而各位心急的人，就算周邊啲車點爬你頭都好，記得要保持克制，車速控制喺40公里以下，唔好俾人挑釁到呀，當然太慢亦都唔得啦。實習嘅時候除咗練習如何操控車輛之外，停喺路口等轉燈嘅時候唔好發吽哣，不妨感覺一下每盞燈的轉燈時間，到考試時，每次臨近路口交通燈時就可以預計到「究竟應該盡快過埋依盞綠燈，定係減速預備紅燈停車呢？」。

 

籮文：「善用科技 助你輕鬆過骨」

唔係叫你考試時拎手機出黎「出貓」，而係叫你善用科技，做好準備。就例如筆試前，下載定幾個模擬筆試 App，玩多幾次就唔怕到時緊張手震㩒錯制啦！而考路試前如果無時間補鐘，都上 YouTube  碌碌，有唔少有心人一早就將所有路線行過一次，甚至泊位、開車停車的正確步驟都有，仲拍埋片錄埋旁白，教晒你點行，考之前睇多幾次就有助你發揮出應有水準啦！仲有，路試當日記得上運輸署網頁 Check 下考試路段嘅交通情況，暢順就當然好啦，萬一有阻塞的話都有個心理準備嘛，最後祝你考試成功！