唔知由幾時開始，熒光幕同喇叭到處入侵我地的生活。一大早，俾一舊會發光會出聲的石頭嘈醒；出門口等?，又有無限量咁多居民通告係度 Loop 住播；搭巴士、小巴、地鐵，又有人不停係個框入面講野；返到公司，又要打開另一舊會發光會出聲的石頭，直至放工，然後再一次搭交通工具搭?，上床瞓覺。

呢個世界好噪，好多我唔需要的資訊，日日無間斷被疲勞轟炸。呢啲時候，我就會出動我的「天堂神器」－入耳式 Earphone。

好多人以為我咁鍾意去旅行，又成日廣交朋友，肯肯定係一個外向型的人！實不相瞞，我實情係非常內向的，而且仲好怕噪，需要好多寧靜的時間同空間。為左幫自己係噪吵的環境之中，找到寧靜的空隙，我試過好多方法，包括唔出街宅係屋企做乾物女，不停開 OT 匿埋係公司扮女強人，返學校坐係運動場睇壯男打波，去圖書館放英文書的位置睇人行來行去…

太毒了！更何況，我都想行下街睇下野，唔係想坐係度發霉囉！於是我拎起我個入耳式 Earphone，放入耳仔…

嘩～成個世界唔同晒，表面上我係聽緊歌，實際上我個 Earphone 根本冇連接到任何機器，加上入耳式 Earphone 可以做到非常好的隔音，又唔會特別惹人注目，掩飾到我怕噪的呢個事實。BTW，你地會唔會好似我咁…?

入耳式 Earphone 除左可以隔開 80％ 噪音，仲可以幫你專心工作。我係公司成日都會戴住佢，有同事嗌你的時候，可以扮聽唔到（其實真係唔係幾聽到 XD），但老細嗌你個陣又會聽得到架喎，因為有剎氣丫嘛～ XD

有人問，咁點解唔用耳塞？要用 Earphone？傻豬黎嘅，Earphone 係隨電話附送架嘛，唔使另外買，而且 Earphone 有線，人地會睇到，唔使驚會俾人問係咪撞聾，仲可以大條道理講，「Sor，我聽緊歌/收音機/上次會議紀錄呀。」

不過咁，我解決到噪音的問題，熒光幕我都可以選擇合埋眼冇眼睇，但係肢體碰撞真係搞唔掂，雖然我自問「攝石人」技術高超，最叻捐窿捐罅，但係人多所帶來的心理＆物理壓力真係好難解決，唔通我真係要移民先得？ 😛