Motorola 於柏林舉行嘅 IFA 2015 正式發表 Moto 360 第二代，今次籮文就搵到隻可以上手試，究竟 Moto 360 第二代有冇上一代咁有競爭力，Keep 唔 Keep 到個吸引力？睇以下文章啦！
有玫瑰金！男裝獨有 46mm 大錶面版本
Moto 360 第二代嘅美國買家繼續可以喺 Moto Maker 自訂款式，分別有男裝同女裝嘅 42mm 錶面，而男裝仲獨有 46mm 錶面可供選擇。男裝 42mm 錶面就要配 20mm 錶帶，女裝 42mm 錶面就要配 16mm 錶帶，而男裝 46mm 錶面就要配 22mm 錶帶。
錶圈同錶殼都可以分別選擇金、銀、黑，三色，錶圈仲有分斜切同滾花兩種。而錶帶則有皮革錶帶同鋼錶帶之分。不過唔好咁興奮住啦，都話此服務只限美國買家。而香港，依家連行貨都冇呀！莫講話 Customize 啦（嬲！）
▲Moto Maker 自訂款式、錶圈、錶殼及錶帶，但香港無份
▲籮文手頭上的女裝42mm 金色及男裝42mm 黑色
相關文章:
三星計劃於2025年第四季將固態電池應用於智能手錶、戒指和耳機
還是有黑色下巴
Moto 360 出第一代嘅時候，算係市面上少有嘅圓形錶面 Smart Watch，所以有好大吸引力。但係黎到 Moto 360 第二代，市面上已經有不少圓形錶面 Smart Watch，例如 LG 嘅 Watch Urbane、G Watch R，Pebble 嘅 Time Round 仲有 Samsung Gear S2，甚至乎華為嘅 Huawei Watch ，全部都做到真・圓形錶面，反而 Moto 360 第二代都仲未飛走錶面下面嗰塊礙眼嘅黑色嘢，仲話要用黎放觸控式感應器，但可見其他品牌都有能力用盡整個圓形，所以 Motorola 今次依個理由（藉口）實在係講唔通，依個黑色下巴就成為咗 Moto 360 最大嘅象徵，亦係最大嘅缺點。
▲真係好礙眼囉
切蛋糕！錶冠位置時光倒流一個鐘
包裝盒同上一代一樣，都係用圓筒型設計，好似蛋糕盒咁，PR 扮入黎嘅時候我心諗，我未生日喎！打開個蛋糕後就發現，Moto 360 第二代同上一代嘅其中一個分別就係錶冠位置，由第一代嘅 3 點鐘位置，向上移到 2 點鐘位置，依個小小嘅改動都足以令到用家㩒制時更就手。
▲圓筒型設計，好似蛋糕盒咁
▲錶冠位置，由第一代嘅 3 點鐘位置（上圖），向上移到 2 點鐘位置（下圖），依個小小嘅改動都足以令到用家㩒制時更就手。
Android Wear 設定簡單 幾分鐘搞掂
Moto 360 係 Android Wear 呀嘛，用家只要喺手機下載 Android Wear 程式，然後跟住指示以藍牙接駁手錶及手機就可以了，全程都唔洗 3 分鐘。不過提提大家，同上一代一樣，系統語言都係冇中文揀，用住英文先啦。不過唔使驚，講緊系統語言啫，收 Message 或各種通知都係可以睇到中文架！（你估 Pebble 咩！）
▲系統語言都係冇中文揀，用住英文先啦
▲跟住指示以藍牙接駁手錶及手機就可以，全程都唔洗 3 分鐘
▲搞掂，仲可以揀唔同嘅錶面
相關文章:
三星計劃於2025年第四季將固態電池應用於智能手錶、戒指和耳機
屏幕冇大升級 但日常使用綽綽有餘
同上一代得一種 Size 唔同，今次第二代 Moto 360 有兩種 Size 當然屏幕大細都冇兩種啦。42 mm 錶款用上 1.37 吋 360 x 325 屏幕，而 46mm 錶款用上 1.56 吋 360 x 330 屏幕，講像素密度嘅話，分別係 263ppi 及 233ppi，不過相信冇人會用隻錶黎睇片，最緊要都係睇字睇訊息時夠清?，依方面第二代 Moto 360 係合格嘅。另外，最多準買家重視嘅係屏幕亮度，因為如果次次一去到烈日當空嘅戶外就會連時間都睇唔到，的確係好惱人嘅事，而第二代 Moto 360 嘅亮度絕對係足夠，而且設有光度感應器，去到唔同環境會自動調節光度，咁就不怕較得太光又要驚晒電啦！
Gorilla Glass 3 抗刮花玻璃
另一樣好重要嘅就係玻璃硬度，因為手機都會痴保護貼，不過手錶應該好少人會痴，偏偏手錶一向都係好易撞擦到，籮文之前就買咗隻 Pebble Time，用咗幾日就花咗塊玻璃，不過兩代 Moto 360 都用上 Gorilla Glass 3 玻璃，雖然唔夠 Apple Watch 嘅藍寶石咁硬淨，但係都有一定硬度。
訊息要出唔晒 。。。
買得智能錶，當然係想睇 Message 方便啲，唔使下下摷電話。不過礙於圓形錶面，預設嘅字型大小下，顯示喺屏幕下方嘅字往往都係出唔晒，依方面籮文就比較喜歡 Pebble 一收到訊息會全螢幕顯示訊息幾秒鐘嘅方式。講返 Moto 360，收到訊息時會先喺底部以走馬燈方式顯示。只要按住向上拉就可以見到全相，但籮文就覺得資訊顯示應該有多返少少，例如訊息接收時間等等。
▲收到訊息時會先喺底部以走馬燈方式顯示
▲只要按住向上拉就可以見到全相
▲但籮文就覺得資訊顯示應該有多返少少，例如訊息接收時間等等。
相關文章:
三星計劃於2025年第四季將固態電池應用於智能手錶、戒指和耳機
語音辨識 快而準
除咗閱讀訊息，當然都要回覆啦（我知，我知有好多人係睇完唔覆嘅）。只要向左拉就可以見到回覆嘅選項，㩒入去就可以選擇用一堆預設回覆字句（例如 Yes、No、好 等等）或者選取 Emoji 回覆，而身為 Android Wear，第二代 Moto 360 最強就係可以用「Speak Now」同畫 Emoji 黎回覆。先講「Speak Now」，其實即係語音辨識，一㩒就講得，籮文試過幾次，幾次都成功辨識，成功率好高。
▲只要向左拉就可以見到回覆嘅選項，㩒入去就可以選擇用一堆預設回覆字句（例如 Yes、No、好 等等）或者選取 Emoji 回覆
▲語音辨識，一㩒就講得，籮文試過幾次，幾次都成功辨識，依次就係向女朋友報告行蹤…
畫 Emoji 得個玩字
頭先講到，仲有畫 Emoji 覆 Message 嘅功能。老老實實，籮文就覺得幾好玩嘅，不過就得個玩字，實用性唔大，因為喺個 List 度揀 Emoji 同畫 Emoji 之後再揀，所需時間係相若。不過係好玩嘅，可以用黎練下畫功，睇下要畫幾多次隻 Moto 360 先認到你畫緊咩。
▲知唔知我畫嘅咩呢…
▲我係想要人嘅笑喊，唔係要貓嘅笑喊…
▲由於依隻係 Android Wear，唔該畫返 Android 版嘅 Emoji （下圖）
相關文章:
三星計劃於2025年第四季將固態電池應用於智能手錶、戒指和耳機
跑步需配合手機 GPS
注重健康或鍾意運動嘅人士，依隻錶都有你想要嘅嘢。其中一樣就係心跳感應及計步器，可以記錄用家嘅即時心跳同已行步數，配合 App 使用可以有更多可能性，不過要提提大家，Moto 360 係冇 GPS 功能，如果想紀錄跑的位置要靠手機 APP 了。
▲內建的心跳偵測器及計步器，可以記錄用家嘅即時心跳同已行步數
▲可能因為籮文見到 PR 姐姐心情太緊張，心跳都跳快咗。（正常人靜止時每分鐘60到100次）
籮文：「ok 正，無黑色下巴更完美」
市場上 Android Wear 智能手錶選擇多，Moto 360 第二代價錢又唔係賣得特別平，功能同其他品牌產品亦差唔多，整體外觀上 Moto 360 其實真係唔差，不過就係輸在嗰塊礙眼嘅黑色下巴。Motorola 曾經表示做過調查，顯示大多數人都唔覺得個「下巴」係問題，其實籮文覺得只限黑仔錶面，一轉淺色少少就望得唔係好慣
Motorola Moto 360 (2nd Gen.) (Mens, 42mm Black Housing, Black Leather Band)
售價：$2,595
Motorola moto 360 (2nd Gen.) (Womens, 42mm Rose Gold Housing, Blush Leather Band)
售價：$2,895
查詢：2405 8071 （Expansys）
相關文章:
三星計劃於2025年第四季將固態電池應用於智能手錶、戒指和耳機
分享到 :
最新影片
