最近新平板一部接一接，不過如果你問筆者點樣嘅平板手感最好，我首選一定係金屬機，至少就咁望落去都 grand 過塑膠機先啦！最近 Dell 就將年初於 CES 發佈的 Venue 8 7000 引入香港，究竟用落係點？大家就要睇 Edward 的介紹啦。
金屬手感好但設計怪怪
Dell Venue 8 7000 一拿上手，第一件事觸動到我嘅就係：金屬手感！Venue 8 採用了磨砂金屬機身設計，雖然係跣手少少，但手感真係唔錯，同埋採用 Intel Atom 處理器，機身就算打機個時都唔會感受到熱，呢一點令筆者好欣賞。
▲採用金屬機背，單以機殼物料來講手機係幾好，唯一缺點係比較易痴指紋。
▲唯一缺點係比較易痴指紋。
▲機身好薄，長時間拿住都唔會太累。
不過係設計上，Edward 就有少少保留，雖然採用超窄邊框（好似 Sharp Aquos Crystal），令就算有 8.4 吋熒幕都可以單手長時間拿住都唔累，不過如果拿住機底，就會遮住喇叭同埋鏡頭；如果拿住機頂，就因為邊框太幼，有機會誤觸熒幕。而就係呢種奇怪設計，令筆者覺得雖然有金屬機身，但唔太好嘅揸手手感又減番分，變相感覺一般般。
▲如果橫向拿，一般人都會偏向拿住比較粗邊嘅機底。
▲不過問題來了：咁拿就會遮住個前置喇叭，減弱了輸出的音量。
▲亦會同時遮住個鏡頭……
▲如揸住較幼邊嘅一邊，機背來講問題不大。
▲但機身前方就有機會誤觸熒幕，影響操控。
▲唯一比較無影響嘅就係直向咁揸機，採用幼邊框設計的 Venue 8 7000 令大家單手拿住都還 OK。
▲不過就輪到遮住整個景深鏡頭 Orz……
景深鏡頭好睇唔好用
Dell Venue 8 7000 最一個特點，就係設有其他平板、甚至手機都唔一定有嘅景深鏡頭。呢個鏡頭係全球首部採用咗 Intel RealSense 景深鏡頭模組的裝置，用落就好似 HTC One M8、Samsung Galaxy S6 系列咁，可以拍攝後點選希望對焦的位置再儲存相片，做到「先拍攝後對焦」的效果。
▲大家係機背可以見到有 3 個鏡頭，呈三角形擺設：上方的是主鏡頭，有 800 萬像素，而下方黑邊左右兩端的就是兩個景深鏡頭（類似 HTC One M9+ 的設計，不過佢有兩個），每個像素為 720p。
▲只要係相機介面入面揀 Depth Snapshot 就可以選用景深鏡頭。
▲可以選擇係介面左上角睇埋兩個細景深鏡頭的效果。
▲拍攝後，係相簿中可靠相片左上角的盒形圖示，辨識出哪些相片是用 Depth Camera 景深鏡頭拍攝。
▲進入後等一會，就可以進行編輯。
功能上好似好 Pro，實際介面亦好 Pro，但對於一般用家來講，好 Pro 有時真係會代表唔夠 user-friendly。首先：用尺來度景深去做修改，係 Pro，但我寧願用佢就咁篤個芒揀對焦點更實際；其次，佢可以令大家度到相片中某部分係實際環境下的平面面積，不過唔算易用；第三，亦係最重要的，就係即使可以後對焦，但效果唔夠好，而更麻煩嘅係，Venue 8 7000 本身的 800 萬像素鏡頭，質素都好一般，尤其是影夜景，感覺就好似「時光倒流十幾年」咁，去番當年 130 萬像素鏡頭 feature phone 影出來嘅效果咁。雖然筆者都預咗平板影出來嘅相唔會好得去邊，但都無諗過係去到呢個水平……所以整體來講，Dell Venue 8 7000 嘅鏡頭概念係值得欣賞，但改進空間都極大。
▲景深鏡頭除可讓大家改變相片焦點外，亦可以量度相片內物件的高度 / 距離或平面面積。
▲但一定只能是平面，如果係凌空嘅空間就度唔到了。
▲係就係可以改變焦點，但效果其實都唔算自然。
▲唯一係呢個整特效的功能較為實用，不過都係屬於「整色整水」的次要功能。
▲相片質素方面，就算係夠光，唔洗放大都見到暗位有明顯雜訊……
▲用來影夜景就更加……Orz（唯一可以「讚」佢係咁多雜訊情況下仍然好清囉張相……）
熒幕質素不俗明顯偏藍
至於熒幕方面，Dell Venue 8 7000 採用了時下好流行嘅 2,560 x 1,600 WQHD 2K 熒幕，點距都去到約 359ppi，用來睇片或者睇網頁，清晰度都超高，不過色調方面都比較偏濃，適合較 like「重口味」的用家（筆者自己就覺得一般般）。色準方面，Edward 覺得有明顯偏藍情況，當欣賞有藍天或者有藍色物件的相片或影片時尤其感受得到，但佢唔似 Sony 平板咁可以俾用家自行微調熒幕色溫，所以如果對「藍血芒」有「歧視」的用家，選購時就要留意了。
▲熒幕採用 2K 解像度，清晰度好高，就算睇細字，唔洗放大都好清晰。
▲睇片方面，色彩比較誇張，尤其從藍色物件睇到熒幕有明顯偏藍情況。
▲不過可視角度就算唔錯，就算側面睇都唔會影響觀感。
▲平板亦有內建 Intel 自家的 Smart Video 功能，第一個用來提供更流暢的播片體驗，而第二個就會按影片內容，自行修改影片中的雜訊、色彩及對比度。
既然講開娛樂，就等 Edward 係度評埋音色啦。Venue 8 7000 的喇叭位於機身前方，基本上如果拿係手度唔係遮住個喇叭，音量都好夠聲。不過純粹係音量夠大而已，音質方面雖然有 MAXXAUDIO 音效加持，可以俾用家就睇緊 / 用緊嘅 content（影片、音樂、錄音或遊戲）進行音量、低音、高音及人聲的微調，但出來嘅效果分別唔算大，表現只屬一般，所以大家都係唔好有太高期待度啦。
▲係就有 MAXXAUDIO 可因應唔同情況改絪音量、低音、高音及人聲效果，不過效果分別唔大（可能因為筆者係「木耳」聽唔出啦…….）。
▲對於進階用家，亦可以自行修改微調音色。
▲係狀態欄亦有 MAXXAUDIO 插件，方便用家隨時轉換設定。
效能不俗•採用原生介面
最後講到裝置本身，首先講介面，基本上 Dell 唔太覺有為 Venue 8 7000 的介面進行特別設計，都係 Android 5.0.2 Lollipop 的原生介面，同 Nexus 10 幾乎相同，所以可以估計得到，未來 Google 推出新 Android OS 的時候，Venue 8 7000 的用家應該都唔洗等太耐已經可以獲得 OTA 升級。當然，原生介面對於習慣自己裝嘢的用家來講，自然係優點；但對於習慣用廠方自行設計 UI，已經預載了輸入法、常用程式等 APP，介面亦微調至更易用的一般 end user 來講，反而上手難度會高咗（情況就好似 Nexus 裝置一樣）。所以係咪啱自己用？大家自行斟酌了。
▲採用原生 Android Lollipop 介面，感覺就同 Nexus 平板無分別。
▲內建 16GB 儲存空間，但實際用得到只有 9.12GB。
▲好彩支援 microSD 記憶卡，不過筆者放入 64GB SDXC 卡就似乎未能支援……
▲OS 方面當然係採用 Android 5.0.2 Lollipop。
至於效能來講，Dell Venue 8 7000 採用了 Intel Atom Z3580 2.3GHz 四核心處理器，其他規格包括：2GB RAM、16GB 內建儲存空間及預載了 Android 5.0.2 Lollipop 作業系統。表現來講就中規中矩，安兔兔評測中亦取得 46,291 分，算是不俗，無論睇片定係打機都應該會幾暢順。不過唯一係內建電池容量只有 5,900mAh，Edward 試用過耗電速度都幾快，基本上一日一充是常識，比一般 8.4 吋熒幕平板可以用到一日以上、甚至兩、三日來講，算是「短命」。
總結：手感唔錯但設計怪怪
整體來講，Dell Venue 8 7000 係手感來講，因為用咗金屬機身，所以算係唔錯。但問題係 Dell 刻意採用幼邊框設計，但卻將喇叭設於邊框較粗的一方，變相令手感上大打折扣。加上它的景深鏡頭概念好但表現一般，所以筆者覺得整體感覺只係合格，未至於十分好。希望 Dell 係未來機款可以進一步針對今代的缺點大幅改進，給予用家多一部好用 Android 平板選擇吧！
售價：$3,999
查詢：DELL（2969 3115）
分享到 :
最新影片
