Startup 專訪系列:開 P 唱 K 唔驚無人黎!PlanDo 團隊專訪

讚好此文:

八月 7, 2015 •unwire SPACE, 人物專訪, 業界專訪

相信好多人都試過呢啲情況:打牌唔夠腳、唱 K 打波唔夠人、搞活動最後階段有人放飛機……臨時臨急搵人?又趕唔切;但硬著頭皮繼續 Go?又好似好蝕,甚至好似船 P 咁唔夠人直頭 book 唔到船被迫取消,真係好掃興!最近就有間香港 Startup 設計了一款約「叭」APP Plando,我們就與他們的團隊做了個專訪,睇睇他們點解會有呢個構思?

DSC03292

一切源於自身經歷

PlanDo 簡單來講,就係一個約一大班識或者唔識嘅人一齊玩一項活動的 APP,只要登記咗,就可以參與上面嘅活動,甚至做搞手搞壇活動出來俾人 join。當初究竟點解會有呢個構思?原來一切源於 PlanDo 創辨人之一的 Philip 的自身經歷:「仲記得係 2013 年年尾,個下突然想去旅行散下心,所以就去咗英國搵家姐。玩咗幾日家姐要番工,我就諗住睇下搵唔搵到人一齊落倫敦玩幾日,個時唯一途徑就係透過約會 APP,但約會 APP 都無得咁『突發』搵到個人陪你落倫敦,於是最後就孤伶伶咁係 London Eye 上面兜咗個圈,好慘!覺得今時今日智能手機咁普及,又咁多社交網絡平台,點解咁簡單嘅問題都搵唔到解決方法?之後番咗來香港,再做下資料搜集、修飾下自己嘅諗法,就有咗 PlanDo 嘅雛型啦。」

DSC03198

團隊因「緣」結合

PlanDo 今時今日的團隊,合共有 4 人:Philip 負責技術層面的工作、Daniel 就負責市場推廣、Aaron 就負責經營不同的社交平台、Rain 就負責聯絡傳媒的 PR 工作,分工十分清晰。那麼當初 4 人又係點認識?雖然好似「老套」了一點,但也是源於一個字:緣。

IMG_8796

「我(Philip)與 Daniel 是在一個名為 Founder Institute 的初創學院認識,彼此交換了想法之後,就約出來傾傾點樣合作。仲記得有次係 cafe 度傾咗兩個幾鐘,之後有個人係 Facebook 度 add 我,問有關 PlanDo 的詳情,他就是 Aaron。原來佢係 cafe 個度就正係坐係我哋附近,聽到我哋高談闊論覺得好過癮,於是就 join 咗個團隊啦。至於 Rain,本身都係廣告界度做,又同 Daniel 過往係好多 projects 度夾慣夾熟,咁啱有次因緣際會聽到我哋嘅 PlanDo 構思,覺得好有趣,個排我哋又想搵個有 PR 經驗,兼且可以保證係媒體度有曝光率的人,於是就一拍即合!」Daniel 更打趣地說,搵 Rain 加入的另一原因,是因為她靚女:「代言人都唔洗另外搵!」

 

「用家有自我保護機制」

聽完 Philip 及他的團隊介紹 PlanDo,Edward 不禁有個問題想問:「如果任何人都可以參與活動,單獨赴會會否有人身安全問題?」Daniel 就舉另一成功 Startup 例子回應:「唔知大家有冇玩過 Airbnb?去旅行要住人哋屋企喎!咁咪仲危險過 PlanDo 赴約?但事實上,用慣呢類 social APP 的用家,都會有種『自我保護機制』,他們在赴會前會先與對方用 PlanDo APP 聊天、瀏覽對方資料查證對方身份、以及通過電話認識過後,才會選擇是否應約。另外赴約時,更會特別警剔,其實比起與一般約會 APP 結識的網友約出來會更安全。」

DSC03263

Philip 更補充指,PlanDo 會透過網誌、廣告、Facebook 等向用戶灌輸約會安全貼士,另外每個活動都有自己的聊天室,當如果系統發現有人發出「見面」、「約出來」這些敏感字眼,就會自動向發出訊息人傳送一個訊息,指約出來後的安全 PlanDo 不會負責,不但可令赴約者或遨約人自我警剔,亦可保障公司聲譽。Daniel 進一步表示,其實 PlanDo 團隊每日都會花時間審視所有用戶傳出來的訊息,如果監察到有不良語言或訊息,會向該發出訊息的用戶提出警告、甚至有權 blacklist 該用家,令用戶不會「亂來」。

 

著重全球市場 + 用戶體驗•預計發展至 5 國家

其實 Edward 聽到 PlanDo 的概念,第一時間就想起另一隻同樣係約「叭」約活動的 APP:HK2Gather。既然有 HK2Gather,點解 Philip 的團隊還要開發 PlanDo「搶生意」?Aaron 就表示兩者是有分別:「介面上,PlanDo 會比其他同類功能的 APP 簡潔,而且活動不限於只邀約 Facebook 上的朋友參加,任何 PlanDo 用家都可參與。」

 

DSC03273

Daniel 亦補充,PlanDo 團隊其實都唔會其他同類型 APP 可能比較著重本土市場,但 PlanDo 就著重全球發展:「今年就打算係香港市場站穩陣腳之後,會推展到 5 個國家,包括:澳洲、新加坡、印尼、日本等,令大家去到外國,都可以玩快閃活動。」那麼為何不推廣至其他歐美國家?Philip 就表示,第一步希望先推廣至人口較密集、而且他們較熟悉當地文化的國家,之後才考慮發展至其他地方。

 

識人兼享優惠•未來會加入付款

至於 PlanDo 由創立至今已有數月,創立時第一個星期訊息傳送量已達到 120 萬條,而去到 6 月中旬,更位列 App Store 社交媒體類別的第三位,下載量只是僅次於第一、二位的 Facebook 及 Instagram,以一間細 Startup 來講,成績已算驕人。但 Daniel 表示,公司的發展並不會因此而減慢:「我們現在正與不同公司洽談各種合作,希望 PlanDo 不只是一個可讓用家認識志同道合的朋友的平台,還可以以比門市價平 15% 至 20% 的優惠價,參與各種活動。」

螢幕快照 2015-07-21 下午6.34.57

另外,Daniel 更表示正研究在 PlanDo 上加入付款平台,讓用家付款上更方便:「而家 PlanDo 用家參與各種活動,是需要到現場才付現金的,但有些用家俾現金可能不方便,但活動現場又未必可以碌卡;如果唔事先付款,又擔心報咗名的人『甩底』。我哋未來就打算新增 APP 內付款功能,讓大家可以用信用卡付款,咁樣一來就算甩底主辦單位都唔會蝕底之餘,用家付款就更方便啦。」

 

香港創業誘因:容易 + 成本低

在訪問中,Edward 從閒聊 4 位 PlanDo 創辦人的背景得知,原來 Philip 及 Daniel 均有在香港及外國創立 Startup 的經驗:Philip 8 年前在澳洲開設過眼鏡網購店,而 Daniel 就在幾年前於英國創立過與電訊業有關的 Startup。好多人都覺得在外國創業,機會多過香港好多。但點解他們兩位又反其道而行,「回流」香港創業?Philip 及 Daniel 就簡單綜合出兩個原因:機會多、成本低!

DSC03285

「係香港創業,人工相比外國低好多好多,稅亦比外國低,如果唔係要租一個大 office,成本其實相比外國係好低;而且就算外國人來香港創業,無論係申請 BR、住、食、交通、稅、甚至貿易等都好齊全同埋方便,而且政府對 Startup 的支援亦比在外國多。如果你是從事硬件開發,香港亦有地利優勢,因為好近中國,過條河就到,要搵 OEM 或者單純搵原材料,都比係外國方便同成本低。」

他們更表示,外國人比較著重 Work-Life Balance,而且工作比較輕鬆及穩定,人工又高,唔會有太多人願意放棄高薪厚職跳出 comfort zone 來創業,令他們搵合作 partner 比較困難;相比香港就會容易得多。「因為香港人雖然都著重 Work-Life Balance,但係放工時間真係要處理緊急事務都會比較願意,唔會好似外國人咁推三推四。」

不過 Daniel 都覺得,香港人才比較集中於金融及銀行業,要搵人才就要向這兩個工作群「埋堆」,比較困難。而且香港人習慣轉工轉得密,好多人都是只會在一間公司做兩年左右,就會被其他公司「刮走」:「我唔係話香港人比較現實同物質主義,只係實際上環境真係咁。」

 

唔一定要衝出香港!視乎行業性質

其實今日唔少香港 Startup 都唔止睇住香港市場來做,因為不少人都覺得香港市場太細,要「做大個餅」,自然應該放眼世界!就算唔咁大,都至少放眼東南亞、甚至亞洲市場。對於呢一點,擁有豐富創業經驗的 Philip 及 Daniel 又點睇?

「我們覺得好視乎主攻什麼市場性質:如果你是社交網絡平台,要多人用先至有望上位,自然係不能局限於香港幾百萬的智能裝置用家市場,最少都要照顧其他東南亞、甚至亞洲人的需要;但如果是針對一些香港比較主流的行業,例如酒店業、旅遊業等,因為本身在香港都已經發現蓬勃商機處處,所以只係做『本土』市場已經夠做。」

Daniel 更補充話,就算你創立的 Startup 在外國十分成功,也不應該,亦不能完全將整個模式移植到香港或者其他亞洲國家,因為唔同地方有唔同的文化差異:「例如外國要去購物,都要最少駕十幾分鐘車,更遑論要搭幾個鐘飛機去其他城市購買;但係香港,落屋企樓下已有超市、便利店等店舖,就算要從最東南走到最西北的地方,都只係個零鐘的事,如果照搬外國的一套來香港、甚至亞洲其他城市,又怎會不失敗呢?」

DSC03225

先不考慮點「搵錢」•重點谷大用戶量

最後,相信各位 unwire 讀者都同 Edward 有同一個疑惑:PlanDo 可任由用家免費建立活動,而活動收費又是主辦人 / 單位收取,究竟整個 revenue model 係點?點賺錢?如果唔賺錢,點樣持續發展落去?Daniel 就表示其實 PlanDo 發展會好似 GoGoVan,第一步會先谷大用戶量,未來才考慮如果賺錢並持續發展落去:「因為只有多人用,才會有更多種類的活動提供出來,先可以進一步再吸引更多人用 PlanDo。

正因為用戶體驗是我哋最注重的一部分,所以第一步唔會考慮收費。至於如何持續發展?其實我們與投資者或申請不同 funding,都係以用戶人數及用戶體驗,而唔係用 revenue model 去說服對方。如果有投資者來問我哋 revenue model,每年賺幾多?若干年後可以賺到幾多?我哋寧願拒絕佢哋,因為我哋明白唔係為咗一開始透過活動賺錢,而係希望建立一個平台,令大家可以結識到一班志同道合的朋友,而且是為快閃活動而設,就係咁簡單。」

不過 Daniel 都表示,待平台用戶到達一定數量之後,加上加入了付款功能,就會嘗試與不同公司合作,提供不同的活動,例如:試餐、試玩等,而 PlanDo 就可以向主辦單位收取信用卡手續費、或者若干金額的宣傳費用,令 PlanDo 可以獲利兼持續發展。

 

甚麼是 unwire.space ?

unwire.hk 作為生活科技網站,一直有報道科技生活之餘,亦有採訪科技創新企業,試透過我們的綿力推動一下香港創業文化的發展,因此推出類似現時流行的 co-working space 概念工作間 – UNWIRE Space。就在我們位於觀塘區的編輯室旁方便我們採訪報導,Co-working space 結合新媒體宣傳力就是我們與眾不同的 unwire.space 了

<詳情請按此>

 • 不想錯過新科技 ? 請 Follow unwire.hk FB 專頁http://facebook.com/unwirehk/
• 要入手生活科技潮物 即上 unwire store
https://store.unwire.hk/

Tags:

讚好此文:


Comments are closed.

unwire TV



更多同類文章:

最新文章