傍晚收到先達 G-World Lo 哥電話，原來 SE 第一部 Android 手機 X10 剛剛到貨，新鮮熱辣，Unwire.hk緊係即刻仆去影畀大家睇。
其實早在過年之前，先達已經有傳 X10 就快出黎，於是有 D 手機舖擺定個 Dummy 出黎，叫定人預訂，但點知一等就等到今時今日。好彩果班機迷團火仲未過，依然好有興趣立即入部黎玩，唔怪得 Lo 哥笑笑口咁同我講，呢水貨返左十部，到我趕到先達時已經賣左一半，剩低既一半都已經有客訂晒，爭在未黎拎貨咋！
我都借左部 X10 黎玩了一陣，覺佢除左有 Nexus One 咁快，個介面仲俾 SE 執過，首頁分類清楚過普通既 Android 機。最難得係佢本身已經有繁中介面、輸入法同手寫功能，唔駛好似 Nexus One 咁自己入，少好多麻煩架！價錢？今日係 $5,980，聽日唔知。值唔值？呢 D 位又要搬句 Gadget 真理出黎：早買早享受呀嗎，起碼今日買機o個幾位仁兄一定覺得值得先啦！
查詢：G-World（2396 6380）
首頁底部有 Timescape 同 Mediascape Icon。Timescape 包含晒 Facebook、Twitter 等社交網站捷徑；Mediascape 包含相簿、歌曲庫同影片庫，分類清晰。