今日先達繼續係全民講 iPad，我仍然見到有舖頭o係一個鐘頭內賣到四、五部，真係賺到笑！但冇 iPad 賣o既舖就慘啦，當堂拍晒烏蠅，理都冇人理。為求救市，有 D 舖頭諗盡辦法搶番 D 收視，包括一樣使出平板 Gadget 攻勢，即係乜o野？咪 PMP 囉！
間唔中我就見到有人圍住o係呢間舖頭門口睇 PMP 播片，播豆花妹片o個陣最多人圍，佢o既魅力真唔講得笑！
唔好噓住，賣 PMP 當然唔會起眼，但好在可以入片落部機度做 Display，咁就唔同講法啦！好似一樓有間舖頭新番左批叫做 Benss o既 PMP，老細就專登入左大量台灣網絡女神豆花妹o既 YouTube 片入去，幾部機一字排開咁擺o係櫥窗度播，我見好多宅男行過，真係會停低望o下，有 D 一睇仲睇o左好耐添！間唔中老細又會轉播《鐵馬尋橋》同《鋼之鍊金術師 FA》，搶埋其他類型行人o既收視，聽講因為咁，批 PMP 真係賣多左，真係識捕捉客人喜好。想有生意，就係要咁用腦架啦！
呢部 4.3 吋 Benss PMP o既賣點仲有薄身，聽講真係有 D 人見佢薄先買。
講番批 Benss PMP，最多人買o既係 4.3 吋芒o個款，賣 690 蚊。佢播到 720p o既 RMVB 片，我睇 Display 見播得幾流暢，唔似得之前有 D 機咁，播播o下會窒，或者畫面跟唔到聲。我本身都想買 PMP 好耐，但一直就係驚播片有呢 D 問題，而家見到 D PMP o既質素已經咁理想，終於可以放心買。
查詢：熱賣店（2390 3231）
