雖然大家講 iPhone 4 講足三日，但應該有好多人仲未夠喉，今日等我繼續，不過唔係講 iPhone 4 本尊，係講佢 D 山寨機！
相信大家一早睇網料知道，大陸晨早有廠根據之前網上流傳o既外洩 iPhone 4 相，製造出山寨版，其實當中有兩、三款o係 iPhone 4 發布前已經流入左先達。但係果時仲有人估緊大家睇到o個部 iPhone 4G（或叫 HD）係咪真，亦有人估 Apple 會唔會為挽回面子，臨急臨忙大改 iPhone 4 個樣，所以大陸廠偷步整山寨版，其實係擔博擔，博錯就會淪為笑柄（雖然佢地唔怕俾人笑）。
好喇，結果開出黎係 Apple 乜都冇改，批山寨機 Bingo 中晒，但班先達大佬都冇坐地起價，之前賣開 $780 至 $980，而家都 Keep 住賣呢 D 價。鬼咩，山寨機始終係山寨機，就算似足真機九成，都唔會有人買黎扮真機搶先用，班大佬緊係知道冇條件賣得貴，咪冇起到價囉！
幾款山寨 iPhone 4 之中，呢部「4G+」就最似，賣 $980 左右。
山寨 iPhone 4 仲出埋 mini 版，機背仲夠膽話有 1,200 萬像素（實情係吹水），賣 $780 左右。