我啊Bowl 上回講到科技發展得太好，好多野好似方便得多，無論你想搵 D 咩或者做 d 咩都輕而易舉。好似你想聽首歌咁咪打開電話上網撳個掣聽囉、想搵資料都唔洗再去圖書館、連睇地圖都有 Google Maps 幫到你…….
好多野變得太科技化，有時候停低諗一諗，科技究竟起度幫緊我地定係害緊我地呢? 點解我咁講?
唔知係咪時代嘅進步，大家太過依賴科技，人與人嘅溝通好似愈黎愈疏離，有時嚴重到連最基本嘅禮貌同尊重都失去埋，唔知大家認唔認同又或是有無遇過，不過我都係將自己見到嘅野【有碗話碗】，以下係我嘅見解：
– 朋友結婚請飲篇
大家有冇發覺以前朋友請飲，例必打個電話約你出黎俾帖你 (雖然你未必想去，但你見佢誠意十足，又真係好難推卻)。但係而家普遍人都會喺 WhatsApp / FB 開 Group 講，仲要當正你地班人一定會去，直接同你地講日期地點就收工唔再提，可能到婚宴前一刻你都仲未收到帖，而家究竟佢係邀請人定係通知人呢？滿腦困惑中， 呢個時候我究竟應該去定唔去呢？你究竟係咪真心想我去呢？
– 問答篇
有時候有人用 WhatsApp/ FB Messenger 問你野，你可能好好心花左半個鐘頭幫佢解答左好多疑難，最後連一句唔該/ Thank You 等極都等唔到……
– 表白/情侶分手篇
而家普遍人只係喜歡電話打字溝通，就算連同對方表白嘅勇氣都無，都只係用 WhatsApp 問你一句【不如我地一齊丫】，咁你又應該點答佢呢？好嗱又或者講分手，對方都可能只係 Send 句【我地唔合適，分手吧】，從此消失得無影無蹤。請問你今天當我什麼? 🙁
– 見面食飯篇
明明約左好耐先約到好耐無見嘅朋友出黎食餐飯，諷刺嘅係大家全程開口講嘅野唔多過廿句，但係全餐飯既過程中大家都”Dup”低緊頭用緊 FB 討論緊某個話題已超過 60 個回應，請問你地約出黎見面食飯既意義喺邊?
– 父母篇
以前大部分嘅父母買新電話都係求通話音質良好、接收能力佳，究竟入面有幾多偉大嘅功能佢係唔會理，佢地只求清清楚楚聽到仔女把聲就足夠。但係而家？父母開始追求買 1 部上網速度快，手寫板能力佳，通常也追求 MON 大 (怕細一點睇唔清楚字體)，因為佢地知道只要佢地學識左用 WhatsApp 用 FB ，就可增加同兒女嘅溝通機會，佢地寧願辛苦一點花 30 分鐘去研究【今晚回家吃飯嗎?】既字點寫，都唔敢打電話用 5 秒去問一句。開始覺得呢個風氣愈黎愈諷刺……
其實仲有好多好想繼續講落去，不過唔知要講到幾時，唔知大家對以上有冇少少感同身受嘅感覺?
通訊科技發展嘅原意係希望加強人與人之間溝通，但而家卻好似有點違背當初堅持的理念。即使你改變唔到呢個聯繫嘅方式，也不妨在文字間改善你嘅語氣及態度，最起碼有基本嘅禮貌及尊重吧!
分享到 :
最新影片
