開幕前實試 ! 西港島線月台新機・4G・免費 Wifi・車長室・直上港大 10 分鐘完成

讚好此文:

十二月 13, 2014 •生活娛樂, 重點推介, 重點消息

如果大家有留意最近的新聞,就知道西環區的港鐵西港島線將會在 12 月 28 日正式通車!當日會先開通香港大學站及堅尼地城站,而西營盤站就會在 2015 年首季才開幕。昨日 Edward 就有幸率先參觀香港大學站及堅尼地城站,以下就為大家介紹一下啦!

20141212_160924

港島線唔洗轉車尾站變堅尼地城

之前可能大家都擔心,如果要去西環,究竟洗唔洗轉車?係咪要去傳說中的上環中層月台搭西港島線?但實情係西港島線只係代表西營盤、香港大學同埋堅尼地城 3 個站的代稱,相信當 3 個站通車之後,其實都只會叫做港島線,只係總站由上環站搬去堅尼地城,同馬鞍山線、將軍澳線呢種獨立線唔同,所以大家如果搭港島線列車,只要去到上環站唔落車,就可以直接去到西港島線 3 個站,完全唔洗轉車,非常方便。

DSC01673a

 

▲從呢幅圖大家就知道西港島線 3 個新站基本上都係屬於港島線,所以唔洗轉車都可以直達。

香港大學 + 西營盤‧堅尼地城採用唔同設計

至於月台設計方面,香港大學 + 西營盤同埋堅尼地城係採用唔同設計的:香港大學同埋西營盤站係採用一候車兩月台的「島式設計」,即係如果要轉線坐對頭車返歸,直接行去對面月台就得,設計就好似金鐘、尖沙咀、旺角個種;至於堅尼地城站,由於係總站,所以就採用單邊月台的「側式設計」,即係話如果要坐回頭車,要先搭電梯返上大堂,再行過對面搭番電梯先可以去到對面月台,就好似坑口、將軍澳站的設計。早前有新聞指港鐵考慮以香港大學站作為南港島線西段及西港島線的轉車站,屆時可以在香港大學站轉車去南區,但此方案現時仍在建議中,仍未落實。

DSC01668a

▲香港大學站採用島式月台設計,過對面月台就可以搭回頭車。

DSC01670

▲堅尼地城站就採用側式月台設計,要搭回頭車就要先上大堂再搭另一條扶手電梯先落到對面月台。

4G 接收未穩定‧但收到地方下載勁快!

相信 unwire 讀者最期待就係究竟 3 個西港島線新站,在網絡接收方面表現如何?Edward 就測試過 csl.、 3HK 及中移動香港在月台及大堂的接收情況,發現無論在月台定係大堂閘內,csl. 的手機仍然只顯示 3G 網絡,不過下載速度仍然有 16.5Mbps 左右;而 3HK 的話,就月台及大堂閘內都收到 4G,速度已經有 60Mbps 以上;而中移動香港在大堂閘內亦順利接收到 4G 訊號,速度仲上到去 125.76Mbps,快到痴線!至於一出閘外大堂範圍,無論 csl. 定係 3HK 都可以順利收到 4G,3HK 與閘內速度相若,而 csl. 都有 74Mbps 左右。所以大家就唔洗擔心新站網絡接收差啦。Edward 都有就點解月台只收到 3G 詢問過港鐵方面,他們回應指現時 3 個車站仍未開幕,所以網絡商仍就網絡表現方面進行微調,待車站開幕時,應可確保西港島線所有站及月台都接收到 4G 訊號。

DSC01671

▲在堅尼地城站,csl. 在月台只能收到 3G 訊號,連 H+ 都無。

DSC01680

▲上到大堂閘內,仍然有呢個情況。

DSC01687

▲不過下載速度都仲有 16.5Mbps,上載就有 3.67Mbps。

DSC01692

▲但在大堂閘內相同位置,3HK 就收到 4G 訊號,而且下載、上載速度仲分別有 62.29Mbps 同埋 19.84Mbps ,好快。

DSC01689

▲在相同位置,中移動香港的 4G 接收效果仲誇張!下載、上載速度去到 125.76Mbps 同埋 41.58Mbps,快到痴線!

DSC01698

▲當去到大堂閘外,csl. 終於可以收到 4G 訊號,下載、上載速度亦回復正常,分別有 74.03Mbps 同埋 39.32Mbps。

站內免費 Wi-Fi 可用 15 分鐘‧表現僅可接受

如果大家在港鐵站入面等人等車時,港鐵都有同 PCCW 合作提供免費 Wi-Fi 服務,每節為 15 分鐘,每人每個裝置每日最多可以使用 5 節,即係最長可以用到 75 分鐘,同其他站一樣,Edward 覺得對於大多數人來講,應該都夠用啦。至於速度方面,Edward 就係堅尼地城站大堂閘內試過,下載速度大約係 12Mbps 左右,而上載速度就有 3Mbps 左右,算係不過不失啦,但如果同一時間多人用可能會再慢 D……

DSC01695 DSC01696

▲新的 3 個西港島線港鐵站仍然有提供免費 Wi-Fi 上網,服務都係由 PCCW 提供,每人每機每日可以上 5 節,每節 15 分鐘。

DSC01697

▲速度方面,下載、上載速度分別為 12.91Mbps 同埋 3.29Mbps,還~~好~~吧……

改用全新閘機‧紅外線感應閘門開關

至於 3 個新站,就改用全新的閘機,用色為藍、白組合,與傳統港鐵站的銀色閘機唔同,感覺潮 D 但好似有 D 膠……如果大家有細心睇下面的相,應該會發覺閘機表面有好多黑色細點,其實個 D 都係紅外線感應器,如果感應有人通過,一來可以防止衝閘,二來前面的人過閘時,如果後面的人心急已嘟八達通,閘門就唔會關上,可以俾後面的人繼續出閘,加強繁忙時間過閘機的效率。據港鐵表示,其實現時舊閘機都有呢個設計,不過可能係新閘機採用白色面板,所以 D 黑點紅外線感應器會比較明顯而已。

DSC01675

▲改用全新藍加白閘機,而且感覺好似……長左。

20141212_152818 DSC01677

▲閘機採用單向設計,只有一邊有八達通感應器。而運作中的閘機,會顯示出八達通感應位置,唔似傳統閘機該感應器會凸出來;而不在運作的閘機,熒幕上就唔會顯示八達通的圖案,以資識別。

DSC01682 DSC01681

▲閘機上面有好多黑色小圓點,其實是紅外線感應器。

DSC01678

▲下?全新閘機用的 OS 竟然係 Windows XP?初時 Edward 都以為係,但後尾睇真 D 其實係 Windows CE,嚇死!

買飛‧增值二合一!八達通都可以買飛

Edward 之後參觀新港鐵站的買飛範圍,發覺搵極都搵唔到八達通增值機?港鐵職員後來解釋原來新站的售票機已經改用全新設計,唔止可以買飛,仲可以為八達通增值,就算用散銀都可以增到值,唔洗好似傳統八達通增值機咁一定要入 20 蚊或以上的紙幣。只要你夠耐性,而排後面隊的人唔罵你,入 100 個 5 毫為八達通增值 50 蚊都得(笑~~)!另外,新售票機都有個好處,就係如果你要幫親友買單程飛,都可以用八達通俾錢,唔洗一定要暢散銀。

DSC01700 DSC01712

▲全新售票機,一機就可以做到買飛 + 增值功能。

DSC01704

▲而且可以用八達通幫親友買單程飛,唔洗事先暢散銀啦!

DSC01728

▲雖然售票機已可查閱八達通餘額,但站內仍有查閱八達通 / 車票機,方便乘客查閱更詳細資料。

售票機加入無障礙設施方便傷健人士

另外,新的售票機亦加入唔少無障礙設計,例如:禁前往車站、買票數量的熒幕採用雙熒幕上下設計,而且禁個制就可以互換兩個熒幕的顯示,方便小朋友或者坐輪椅的乘客,就算企唔高都可以用熒幕買飛。此外,針對視力有障礙的乘客,亦有凸字及語音設計,讓他們都可以自行買到飛搭港鐵。呢 D 設計,確實見到港鐵就加入無障礙設施的細心。

DSC01709a DSC01711a DSC01710a

▲新售票機加入唔少無障礙設施,熒幕分為上下設計,禁個制就可以互換,方便企唔得高的傷健人士或者小朋友自行買飛。

DSC01713 DSC01714

▲另外,雙按熒幕就可以放大顯示,方便老人家睇到細字站名,然後點按買飛。

DSC01717

▲如果唔想係大地圖度揀站,亦可以先禁線路再揀車站。

DSC01715 DSC01719

▲買飛時唔止睇到要幾多錢,仲可以睇到最快到達時間,好體貼!

DSC01721

▲一次可以最多買 10 張成人 / 特惠飛,買盡即係可以買到 20 張,實夠一般人一次過買幾張飛啦。而且所有都係用觸控設計,同其他售票機一樣。

DSC01723

▲揀完之後,就可以俾錢,有燈著的就是可以用來俾錢的方法,可用散銀、紙幣或八達通。但如果該位置出現故障,或者售票機錢袋已入滿散銀,該付款位置的燈就唔會著,代表唔可以用個種辦法俾車飛錢。

DSC01708

▲散銀、車飛同埋收據以後會在同一個 tray 拿。

DSC01724

▲售票機亦有唔少為傷健人士而設的設施,例如:地上有膠粒指示傷健人士到指定的售票機買飛。

DSC01725 DSC01727

▲售票機上有凸字,亦有視障人士通用的數字鍵盤,方便輸入買飛數量。

車站設計與港島線統一‧加入社區元素

至於車站設計方面,由於西港島線與原有港島線會統稱為合一的港島線,所以在設計上會繼續沿用原有港島線的設計,除了月台找來原本為港島線站名寫草書大字的人書寫 3 個西港島線車站站名的大字,令設計統一外,亦加入唔少社區元素:例如在堅尼地城站的大堂,就有一個切開一半的銀色大蘋果,上面有唔少人仔同埋手印,而 D 手印就係由住係堅尼地城的小朋友印上去的,而牆上面亦印有西環海岸線的景色,而當中就有好多堅尼地城居民捐出來的生活小照片,好有特色;至於香港大學站,亦有香港大學的景觀,而且在往返大堂及地面的等候電梯大堂的牆上,更印有本地漫畫家畫出的西環眾生相,好有社區元素,呢 D 都係其他港鐵車站無的特色設計,大家如果有機會到呢 3 個站的時候,不妨駐足參觀一下?

DSC01684 DSC01683

▲西港島線車站加入唔少社區元素,例如:堅尼地城站的大堂就有一對切開了的銀蘋果。

DSC01685 DSC01686

▲上面唔只有打燈顯示出西區市民日常生活的寫照外,亦有該區居住的小朋友打下的小手印。

DSC01693 DSC01694

▲車站牆上印有西環海岸線,而大廈上細睇,就可以見到由該區居民捐贈出來的生活相片。

20141212_15245420141212_152630

▲至於香港大學站,就在牆上印有香港大學文學院的外觀及香港大學百周年歷史圖像。上圖更有一大亮點,大家看得到嗎?

20141212_153724

▲等候電梯往地面的大堂,更有由著名插畫家蘇敏怡與學生共同創作,以西區街畫為主題的插畫。

20141212_153321

▲香港大學站內亦出現了已少有在港島線出現的港鐵車站傳統紙皮石牆壁設計,好難得哦!不過這是預留給商店的內籠,當車站啟用並有商店進駐後,就未必可以睇到得了。

20141212_152307 20141212_152116

▲所有西港島線車站的設計均沿用港島線其他車站的統一風格,包括以草書書寫站名的設計。

直擊神秘站長室

港鐵可能大家日日都會搭,但係每個車站都有的站長室,可能大家都唔係有咩機會入去參觀。今次西港島線開幕,港鐵就安排了我們參觀堅尼地城站的站長室,據港鐵職員表示西港島線採用了全新的操控面板,可以透過幾個大熒幕,對站內所有設施的狀況一覽無遺!而 Edward 參觀的堅尼地城站站長室,更加可以一覽 3 個新站站內的所有設施,是名符其實的總站長室!至於列車運行情況,職員表示只能透過一個小熒幕觀看列車位置,而總控制仍然會設在青衣總部。

DSC01729

▲直擊堅尼地城站站長室,唔係人人都有機會入去參觀架!

DSC01731DSC01735

▲呢幾個大熒幕就係觀察站內所有設施的使用狀態,如有故障會以紅色圓點標示,站長就可以找人前往維修或查看問題所在。

DSC01734

▲相比其他車站這個傳統設計,西港島線車站的設施明顯較為先進。

DSC01736

▲唔止堅尼地城站,由於呢個係總站,所以就連香港大學站同埋西營盤站內的設施狀況都可以睇得到。

DSC01738

▲至於更詳細的資料及操控,就由大熒幕下面的電腦代勞。

DSC01739

▲不過查看列車行駛情況,就只有這個小熒幕睇得到,但操控仍然由青衣總部負責。

10 分鐘直上香港大學!

最後,相信大家對於傳聞中的香港大學超長走廊好有興趣:究竟要由車站大堂行上去香港大學,會唔會行到腳跛?Edward 今日就親身體驗過,對於平常極少運動的我來講,雖然真係行到索哂氣,但都未至於行到腳跛!基本上通過半條長走廊,再搭電梯直上 60 米以上的地面,再通過走廊走出室外,然後再通過天橋,就可以直達港大校園,前後由大堂出發到港大,全程都係 10 分鐘左右,相比以前要係西環行斜路上去,或者要係中環搭小巴上港大,真係方便好多!相信各位港大學生,以後就算遲左出門口,都無藉口再走堂啦!不過如果夜晚行落西環食糖水,如果返宿舍時已過左港鐵營運時間,就唔可以通過呢個快捷通道番學校,而要行返斜路或者搭車啦。

20141212_160546

▲要去港大或者去西寶城 / 寶翠園,就要行呢條超超超長的通道……

20141212_154253

▲港大仲好 D,搭個電梯就上得到。

20141212_154303

▲最近港大出口附近的指示牌。

20141212_160924

▲但如果要去西寶城或者寶翠園,就要行得長得多啦……不過好彩有自動行人通道。

20141212_153112

▲俾個香港大學站的附近街道圖大家睇下啦!

20141212_153153

▲車費資料都有啦,去尖咀、旺角都係 $11.1(八達通),去銅鑼灣都係 $6.2(八達通),ok 啦。

以下就俾大家同 Edward 一齊親身行一轉由香港大學站大堂去到地面的過程啦。

 • 不想錯過新科技 ? 請 Follow unwire.hk FB 專頁http://facebook.com/unwirehk/
• 要入手生活科技潮物 即上 unwire store
https://store.unwire.hk/

Tags:

讚好此文:


Comments are closed.

unwire TV



更多同類文章:

最新文章