一年一度於美國 Las Vegas 舉行的 CES 大展，終於在上個星期完滿結束。CES 本來是以影音產品為主，不過近年隨著 CES 重要性愈來愈高，也有不少大品牌在這個大展中發佈新的智能產品。綜觀今年的產品，有驚喜有失望有期待，在 CES 閉幕的呢一刻，就等 Edward 同大家講講感受吧。
說好的 8K ？ 4K 進入普及年
CES 一直都係影音產品的重要發佈場合，早在舊年年底，已經有聲氣指今年會有廠商展出採用 8K 解像度（7680 x 4320）的電視，不過 CES 2015 已過去，「說好的」8K 電視始終未成為主角。這也難怪，4K 電視，如果是大品牌的話，也是舊年年底先至落到 8 千幾的價位，開始進入普及時段，相信絕大部人家中仍然在睇 1080p 甚至更低解像度的電視，而且電視不像手機，一年可以換兩、三部，亦沒有二手價值，作為廠商，既然 4K 未普及，8K 亦無迫切性要「走馬」推出。
此外，眾所周知電視購買有所謂的「大賽年」周期，亦即是遇上有重要運動賽事，例如：奧運、世界盃等，當年的電視銷量會因而大幅上升，品牌亦會趁這些年期大肆宣傳（如果某品牌有份贊助該次體育盛事，更甚！）。而過去的 2014 年正是世界盃賽期，相信唔少家庭之前想買電視的都已經買咗，而 2015 年，就不算是大賽年（相信沒有人會覺得非洲國家盃同埋美洲金盃係大賽掛……），所以廠商不在今年推出新技術以吸引消費者亦屬常理。不過以舊年的勢，低階 4K 電視已跌至 4 位數字價位，今年應該會開始有中階 4K 電視跌入這個水平，進入普及之年。而以往的入門級電視（4、5 千元或以下價位）就會一律採用 1080p，可以說是全面進入全高清年代。至於 8K 電視，2016 年將會是巴西奧運年，所以 8K 電視在下年 CES，或者最快在下半年德國的 IFA，曝光機會反而最大。
除了電視外，其實 4K 元素在今次 CES，亦見到走入更多流動 gadgets 中，例如：Sony 就推出迷你手提式 4K Handycam、以及擺明車馬同 GoPro 爭一日長短的防水防塵 4K Actioncam。可以預計的是，在 2015 年，應該會有更多攝錄產品支援 4K 解像度，售價亦會大幅下調至「平民價」，大家以後就可以更容易拍攝到自家製作 4K 內容，在 4K 電視上欣賞了。
物聯網世代來臨
今年的 CES，或許不是產品最矚目，因為幾乎每個大廠商講 keynote 時都會提及一項技術：Internet of Things（物聯網）。說實在，物聯網，簡稱 IoT，已不是今時今日先至出現的技術，其實早幾年已經出現的智能家居、智能門鎖上，已經有運用到 IoT 技術。簡單啲講，物聯網即係將好多身邊成日會用到嘅嘢都連上互聯網，而且唔止係智能車、智能雪櫃等，Samsung 更預示未來大家返到辦公室，只要坐落張連上互聯網的椅子，就會確認身份，然後電腦同埋 mic 會自動開啟，天氣凍仲會幫用家開暖墊，等大家可以舒舒服服工作。其實呢個只係一個例子，而今次 CES，就明顯見到愈來愈多家品、汽車、用具等等都已連接互聯網，可以講物聯網世代正式來臨。相信大家都要為屋企的 router 升級，為物聯網乜乜乜作好準備喇！
平價手機成各家戰場
智能手機在呢幾年已經成為每個都市人隨身必備 gadgets，不過舊年，多數廠商都俾「大芒」iPhone「突擊」因而在不同程度影響旗下手機的銷量。雖然 CES 這個大展是每年兵家必爭之地，不過手機廠習慣會留力今年三月初於巴塞隆那舉行的 MWC（Mobile World Congress）大展，所以在今年 CES，新手機確實唔多。
不過吸引機款又唔係無，今年 CES 最引人注目的肯定係 LG 的最新曲面熒幕手機 G Flex 2，相比 Note Edge「多條邊」的曲面熒幕同埋 GALAXY Round（香港無出行貨），G Flex 的曲面設計已是比較實用（尤其是打橫部機睇戲個時，感覺似睇緊曲面電視）。而今代 G Flex 2 唔止規格強了，而且酒紅色機身都好靚，唯一就係唔知售價會係幾多？傳聞會係二月尾最遲三月頭到港，屆時再同大家測試一下。
而另一款吸引產品，就係 ASUS 的 Zenfone Zoom。繼 Samsung 推出擁有光學變焦鏡頭的手機 K-Zoom 後，又一間廠商進軍這個市場，而且以 399 美元（約 HK$3,094）的定價來講，算係幾吸引。究竟表現係點？等在香港推出時再同大家介紹。
另外，其他廠商都有推出新機，不過就以平價機為主，這也難怪，旗艦機款愈賣愈貴，而且部部功能差唔多，加上台費亦愈加愈貴，已經好少人會為咗新機「約蓋約」咁買機。反而平價機，千零蚊可以有唔錯表現，會吸引唔少人買番部來當 2nd phone 用。可以預示到今年智能手機市場，應該會係平價機爭霸的天下。究竟平價機仍然是小米、華為呢啲大陸品牌「玩哂」，定係 Sony、HTC、Samsung、LG 呢啲外國品牌都會係 2015 年係平價手機市場入面俾到我哋驚喜？個零月之後的 MWC，自有分曉。
穿戴式裝置後勁不繼？
最後一項，就是近幾年一直是各大展「寵兒」的穿戴式裝置。無疑在過去兩年的大展，均展出不同功能、形狀的穿戴式裝置，最多的自然是手帶、手錶等。不過經歷過兩年發展，大部分穿戴式裝置仍然解決不到一日或兩日一充的電量問題，加上市場上仍然未出現令用家覺得生活上非用不可的 killer product（就算是今年將推出的 Apple Watch，如果不能解決電量問題，相信仍很難令用家覺得是必備 gadget），所以自然紅不起。這從今年 CES，穿戴式產品驟然減少可見一斑（就算 Sony 也只是推出手錶的錶帶或者特別版手帶……）。這些結果，亦與 CES 前外媒所預測的一樣。
其實在去年香港舉行的穿戴式裝置研討會中，有研發這類產品的公司負責人已明言，穿戴式裝置一日未能解決電量問題，始終難以普及；而且只限於手錶、手帶、眼鏡這類產品，對於一般人來講不一定是必需品，自然難以像智能手機般引起購買慾。如果穿戴式產品未來可以走入生活「必需品」，例如：時裝、銀包、飾物（對於女士而言吧）等，相信會更易普及。所以小編認為，穿戴式裝置終會普及，但應該不會是今年或往後一兩年內的事。
如果大家想多了解穿戴式裝置如何走入「必需品」世界，可以點擊以下連結瀏覽去年我們所做的相關訪問：
無屏才是未來！直擊 Cyberport：The Billion Dollar Wearable Technology Industry 研討會
分享到 :
最新影片
