而家係星期日晚，相信大家都休息在家，不停在按電視機遙控，睇睇有咩好睇吧！啱啱係 J2 睇完頒獎禮，仲有咩好睇？其實 HKTV 都終於更新咗 TV Box APP，可以好似手機、平板同電腦上面睇咁，支援點播功能。點做？效果點？而家 Edward 就利用家中用咗幾年嘅新小米盒子同大家試試。
更新步驟
要係 TV Box 可以用到點播功能，首先大家要將 APP 更新至最新嘅 1.0.0 版本，而且記住拿住部裝咗 HKTV APP 而且已登入 HKTV 戶口嘅手機或者平板係手。好啦，而家就開始更新啦~~
▲Step 1：首先開啟 TV Box 並點按開啟 HKTV APP，進入時會詢問大家是否更新 APP 版本，以 TV Box 遙控器點按「確定」–>「安裝」–>「打開」即可。
▲Step 2：以 TV Box 遙控器點按下方向按鍵，然後移動顏色遊標到「點播」位置並按下遙控器上的決定鍵。
▲Step 3：有兩種登入方法，第一種是輸入 9 位數字的登入碼，第二種就是輸入大家登入 HKTV 戶口的電郵及密碼。由於第一個比較簡單，所以 Edward 就選擇了呢個方法。
▲Step 4：然後大家拿起手機進入 HKTV APP，再點按「帳戶 / 其他」–>「電視盒登入碼」，然後就會獲得 9 位數字的登入碼。
▲Step 5：回到 TV Box APP，點按第一方法，然後就輸入剛才在手機獲得的登入碼。如果發現錯誤（如上圖），可以在手機退回一步再按下「電視盒登入碼」獲得一組全新的 9 位數字登入碼，然後再在 TV Box APP 中試一次，理論上應該無問題了。
▲Step 6：登入後就可以看到節目列表，以遙控器的方向鍵選擇節目、集數，當像在手機、平板或電腦般看完兩、三個廣告後，就可以開始睇節目了！
質素只屬標清‧播放流暢
Edward 的新小米盒子以 HDMI 線接駁著的，是 SHARP 的 1080p 解像度電視，當以點播功能欣賞 HKTV 節目時，質素似乎無係手機、平板或電腦上般高，畫面會有輕微起格情況，但效果仍可接受（如果大家只係想睇到嘅話）。至於流暢度方面，Edward 以新小米盒子欣賞完一整集《挑戰》，整體好流暢，而且利用遙控器的左、右方向鍵進行節目快搜，亦好快可以回復播放。大家可以透過以下影片，睇睇 Edward 實測的效果。
總結：希望可「谷」收視！質素有待提升
HKTV 開台已有一段時間，到今日終於可以透過 TV Box 使用點播功能，雖然真係遲咗好多，但至少「遲到好過無到」，起碼大家以後係大電視上面欣賞 HKTV 節目，唔洗再局睇直播，而可以按自己喜好，選擇鍾意嘅節目來睇，咁先至可以發佈互聯網電視嘅威力嘛！不過係質素上，Edward 覺得真係比以前嘅模擬廣播訊號節目畫質好少少，確實有待改善。如果未來可以提升畫面質素，應該大家都會睇得更盡興吧！（最少，真係可以有番兩個電視台俾大家選擇……囉~~）
分享到 :
最新影片
