小編 遠赴倫敦參加 Huawei 於當地舉行的發佈會，它們這次發佈了 P8 及 P8 Max 兩款新機，它們都以全金屬製成，配搭最新款處理器及 3GB RAM 等配置，唔知用起來感覺如何呢？(以下有更多資料。)
成塊鋼板咁 支持雙卡 4G
自從 P7 加入金屬邊框後，這次 P8 終於改用全金屬設計，邊框跟機背都是鋁製，驟眼睇成塊鋼板咁，但拎起又唔覺很重，感覺比 S6 Edge 重少少，單手操作亦問題不大，只是機背及提供顏色有著 iPhone 6 影子。此外，P8 亦對應雙卡設計，一邊是 Nano SIM；另一邊是 Nano SIM + MicroSD，雖然雙卡代價是冇得插 MicroSD，但總算仍有得揀，而且它還備主 SIM 切換及 Roaming+ (更快收信號) 等功能，讓手機可無時無刻都有最佳連線。
針對續航力的配置
手機性能固然重要，但越快電池就越唔耐用，因此 Huawei 為 P8 搭載的 Kirin 930 用了特別設計，雖然都係 8 核 4+4 架構，但 Huawei 就把性能高的 A57 以 A53X 來取締，而 A53X 只係 A53 高速版，性能固然較低，但電池會更耐用。老實說，小編 幾「Buy」這個設計，況且配合 3GB RAM 在 Antutu 仍錄得約 42,000 分，日常操作唔覺遲緩，雖然現場冇法試電量比較可惜，但機內省電功能可監察各款 App 耗電量情況，而且跟機還有快充火牛。
搭載 Kirin 930 處理器及 3GB RAM，於 Antutu 錄得約 42,000 分，成績跟 Qualcomm Snapdragon 801 接近。
▲ 省電模式裡可監察各 App 的耗電量。
▲ 觸控加入手指背手勢功能，敲兩下就會截圖、掃動就可變成 Crop 圖。
相關文章:
【評測】Huawei WATCH Fit 4 Pro 開箱評測 外型時尚清新 + 功能齊全抵玩 + 電量依然長氣 【評測】Huawei Pura80 Ultra 國行正式發佈 遠攝鏡雙光學變焦 + Pura80 / Pura80 Pro / Pura80 Pro+ 同時發佈 + 定價公佈 【評測】Huawei WATCH Fit 4 Pro 快速評測 輕薄方形錶身 + 功能齊全 + 電量依然長氣
增慢快門模式 測光超準
起初聽見 P8 用 1,300 萬像素鏡頭就以為好普通，但原來佢把重點放在其他地方。首先，相機用了 RGBW (4 色) 感光元件及 DSLR 級數影像處理器，這點令相機特別在極端環境都能計算準備曝光，鏡頭支持 OIS 防震，幅度比 iPhone 6 Plus 還多。不過，最特別應該係增設慢快門模式，讓手機可以攝車軌及 Light Painting 效果，而且自拍亦提供「美顏」，另外還有 Bracketing 及幾部機成串成的 Director 模式等，功能感覺豐富。實際拍攝，小編 現場發現對焦反應比想像慢 (約 0.5秒才對好)，但曝光計算很準確，防手震效果亦明顯，而相片質素就普通，原因係比較粗糙，係手機睇及網上分享是綽綽有餘 。
▲ 雖然非手動慢快門，但模式都讓你可車軌、Light Painting 等效果。
▲ Director Mode 是透過多部手機來拍攝影片，類似功能其實 Sony 都推出過。
▲ 主機鏡曝光準確，在暗環境下相片質素都算過得去。
▲ 前鏡頭像素足夠，但相片就稍為有點油畫。 (冇女 Model 才自拍)
比 Z Ultra 更大的巨無霸
現場發佈的還有 P8 Max，佢重點係配備 6.8 吋屏幕，設計基本上係 P8 放大版。兩者分別除了屏幕，處理器會改用更強的 Kirin 935 及搭載 4,360 mAh 電池。手感方面，雖然佢好大部，但又出奇地唔重，但大細其實同 Tablet 都差唔多，通話就成塊板貼落臉上，因此它們都建議使用 TalkBand 來輔助通話。
▲ 6.8 吋屏幕，幾乎肯定冇法單手操作，幸好拿起唔算好重。
▲ 搭載更快的 Kirin 935 處理器及 3GB RAM，於 Antutu 成績比 P8 高少少，有約 47,000 分。
▲ 6.8 吋屏幕可橫置使用 Split Screen 功能。
▲ P8 Max 聲稱使用顏色最鮮艷的 IPS-Neo 屏幕，跟 S6 Edge 比起來又的覺比一般 IPS 明顯鮮艷。
▲ P8 Max 的專用保護殼，還附有點點顯示功能。(這個根本是 DotView Case 吧！)
小編 ：有驚喜 但定價太貴！
這次 Huawei 發佈 P8 及 P8 Max 設計及功能上都總算有驚喜，外表造工非常唔錯，相機又加入慢快門拍攝模式，某程度此機軟件比硬件來得吸引。不過，此機最大問題係定價比較高，P8 入場價都要 $499 (16GB) 即約 HK$4,129，頂配版更須 $599 毆元 (約 HK$4957)，價錢貼近 Samsung、HTC 等大廠旗艦機，相信較難跟 Mate 7 一樣咁受歡迎。
售價：
P8 (16GB / 64GB) – €499 (約 HK$4,129) / €599 (約 HK$4,957)
P8 Max (32GB / 64GB) – (€549 (約 HK$4,676) / €649 (約 HK$5,528)
相關文章:
【評測】Huawei WATCH Fit 4 Pro 開箱評測 外型時尚清新 + 功能齊全抵玩 + 電量依然長氣 【評測】Huawei Pura80 Ultra 國行正式發佈 遠攝鏡雙光學變焦 + Pura80 / Pura80 Pro / Pura80 Pro+ 同時發佈 + 定價公佈 【評測】Huawei WATCH Fit 4 Pro 快速評測 輕薄方形錶身 + 功能齊全 + 電量依然長氣
分享到 :
最新影片
