唔知大家係咪好似我咁一日 24 小時 check 實個 Facebook 架呢？嗱嗱嗱，唔好誤會，我唔係蛇王呀～係工作需要先咁架咋，因為公司想攞到 Facebook 個 Very Responsive 奬章 認證（好似係），所以我就要金睛火眼 mon 實個 Facebook Page，順便睇埋自己個幾個，以便秒回 Subscribers 的 Messages，係咪好盡責先～？:P
▲睇到嗎？要係過去 7 日大部分 messages 要係 5 分鐘內回覆先得架～
咁 message 就唔係成日有嘅，得閒咪睇下 unwire.hk，睇下女人心事，睇下人地 Facebook，睇下唔同文章咁囉～我最近讀到一則討論，你知啲女仔有好多感情問題架嘛，就講男朋友個個「紅顏知己」咁啱係自己嘅 Facebook Friend，世界從此就混亂了～成日睇住佢地互動，超級不是味兒咁樣樣。佢深明做女朋友要大方得體的道理，亦都深信自己的另一半係忠於自己，但偏偏就係睇唔過眼「個個女人」，unfriend 佢又唔係，唔 unfriend 又眼冤，訴了很多苦。
俾著係我，我就會同佢講，除左 unfriend 之外，其實 Facebook 仲有樣野，叫做 unfollow （不追蹤）。當你 Add 左人地做 Friend 之後，Facebook 係會自動幫你 Follow 佢，如果佢好活躍，成日出 post，咁你睇到佢的機會就會大啲；如果佢同你其他 Facebook Friends 有互動（like，comment，reply，share… ）機會會再大啲；如果你成日八卦 search 佢個名，有意無意㩒入去睇下，都會增加出現機會架！
所以，如果你真係咁信任男朋友（or 相反），想冇眼屎乾淨盲，不妨 unfollow 個位紅顏知己先，咁佢啲 posts 就唔會再出現係你個 news feed 到，唔使篤眼篤鼻丫嘛。當然，unfriend 佢就一了百了啦，但我都知女仔就係會八卦啲嘅，間唔中睇下咪算數囉，無謂成日激親自己丫嘛～
▲✓Following（上） 即係追縱緊，㩒一下就會變成下圖，放心，佢唔會知架～
咩時候先 unfriend 人地好呀？
咁就要問下自己：
一、當初點解你唔諗清楚先 Add 人做 Friend 呢？
（我明嘅，人會變月會圓，繼續睇下面）
二、你有幾經常 check Facebook？
（唔係成日睇就算啦，唔好搞咁多野）
三、佢個 Facebook 有冇野值得繼續睇？
（一定要理性地諗，價值呢樣野人人唔同，我就會睇朋友 share 開啲咩，講啲咩合唔合邏輯呀等等…）
四、你自己個 Facebook 有冇野唔俾得／唔想佢睇？
（好簡單，唔使解釋啦）
五、使唔使睇人地眼色？
（尤其出左黎做野，好多是非圈子，一個唔覺意跌左入陷阱，咁你水洗都唔清）
六、使唔使等埋發叔先做決定？
（純粹抽水 :P）
其實 Unfriend 同 Unfollow 之間有好大空間嘅，不過人地話 Social Media 將人際關係複雜化，我就信呀！因為而家乜都 O2O 架啦，係呀，你冇睇錯係 online to offline （或者掉返轉） ，唔係純粹講 services 或者你用緊個啲 apps ，關係都 O2O 架，個人都要 marketing 架。你 post 張咩相出黎，like 左邊個 page，鬧過邊個，去過邊度… 一一記錄在案。所以呢個故事教訓我地，做人最緊要表裡如一，online 同 offline 講到尾其實都係同一個世界黎架。
相關文章:
澳洲禁 16 歲以下少年使用社交平台 社交媒體需驗證用戶年齡 Meta 或將開發 AI 搜尋引擎 減少依賴 Google、微軟 實惠「多謝支持」帖文被誤解結業 網民：結業潮「呃 Like」黑心 + IKEA 即出抽水文
分享到 :
最新影片
