以前唔少人都會考慮砌番部「黃金」檯機放係屋企或者 office 用，但今時今日蝸居空間有限，又要擺芒又要放主機同埋鍵盤滑鼠，其實都幾佔檯面空間，所以唔少人都寧願選擇 Desktop Replacement（DR）類的手提電腦。HP 昨日就推出了 Pavilion 14 / 15，究竟好唔好用就要睇 Edward 速試啦。
15 吋更抵用？
Pavilion 14 / 15 其實都係一樣，只係一部 14 吋一部 15 吋型號而已。當然如果空間有限又想慳慳地，14 吋機款都夠用；但如果空間足夠，其實買 15 吋機款仲抵玩，因為有獨顯機款之餘，熒幕解像度又有 1080p（14 吋只有 1,366 x 768），仲有埋觸控功能（雖然係 DR 上無乜用），加上有埋個數字鍵盤，輸入數字又方便過一般手提電腦，點計都抵玩好多。不過大家要留意，15 吋機款又有齊上面的元素，只有採用 AMD CPU + AMD Radeon 顯示卡的機款是以 5 千幾賣街，如果要 Intel i5 / i7 機款又要有獨顯，就要 $7,099 起，除非大家是 Intel 死忠，否則 AMD 版本點計都抵玩好多。
▲15 吋機款有 1080p 解像度，可以睇到更多內容。
▲左邊為 14 吋，右邊為 15 吋機款，可見 15 吋機款多了一個數字鍵盤，輸入數字時會更方便。
機身玩色幾靚仔
另外，唔少 DR 機款都係非黑即銀或白，如果大家想用來配襯家居環境，顏色機點都吸引好多。今次的 HP Pavilion 14 / 15，就加入了唔少顏色機款，有銀、白、紅、粉紅同埋藍色，而且顏色都好鮮艷搶眼，用來配襯家居設計，一流，好適合年青一族玩整合部屋設計。加上機身枕手位都有拉絲紋設計，比一般機採用淨色設計，感覺都高貴好多。
▲各種顏色機款，小編最 like 這款紅色，真係幾靚。
▲與之前的 x360 一樣，採用磨砂機面，手感都算唔錯。
▲枕手位有拉絲紋設計，頗為高貴。
▲鍵盤同埋 TouchPad 同 x360 一樣都係咁好襟。
同樣 B&O Play 加持
之前介紹過的 HP Pavilion x360，就內建了 B&O Play 音效強化功能，令大家在睇戲、聽歌、甚至用 Skype 等程式與別人通話時，也有更佳的音質。而這部 Pavilion 14 / 15，亦同樣內建了這個音效強化功能，令大家唔洗駁喇叭，都有唔錯的音效。至於 B&O Play 加持後的音效質素，可按此瀏覽早前的 Pavilion x360 速測文。
熒幕質素還好可視角度一般
至於熒幕方面，14 吋機款熒幕解像度只有 1,366 x 768，質素就同之前介紹個部 Pavilion x360 差唔多；至於 15 吋機款熒幕解像度就有 1,920 x 1,080，可以睇到更多內容，不過質素就同 14 吋的熒幕差不多，字體會銳利少少，不過可視角度方面，從上、下側睇埋去都係會變反白。不過幸好 Pavilion 14 / 15 唔係好似 x360 咁採用扭芒設計，所以都係當正常手提電腦咁打開用，未至於需要從上、下側去睇熒幕，影響點計都無 x360 咁大。
▲15 吋機款採用 1080p 熒幕。
▲而這就是 14 吋機款的熒幕，只有 1,366 x 768 解像度，可見 15 吋機款的熒幕確可睇到更多內容，但兩機熒幕的銳利度都差唔多，只是一般，字邊有點化開唔夠銳利。
▲與 x360 的熒幕一樣，上、下側睇去都係會呈反白情況，可視角度一般。只是 Pavilion 14 / 15 的熒幕不能像 x360 般扭到背面當平板用，所以影響不算大。
端子齊全有燒碟機
另外，作為 DR 機款，既然用來取代桌面電腦，端于自然唔可以少，而 Pavilion 14 / 15 的端子就叫做齊備，一般 USB、SD 讀卡器、LAN 插槽、HDMI 輸出都有齊，亦內建燒碟機，方便需要用光碟安裝軟件或燒錄檔案到 CD / DVD 備份的用家使用。而最特別的地方，係呢部機仲仍然採用可拆除電池設計，唔似時下主流機款咁採用內置電，雖然部機會比較厚，但最少第日粒電壽命將盡個時，都可以自行買電池替換，變相延長電腦壽命。
▲端子都算齊全。
▲亦有內建燒碟機。
▲連電池都係採用可拆除式更換設計。
▲內建 1TB（可用：約 870GB）硬碟，已足夠一般人使用了。
總結：15 吋 AMD 最抵玩但無色揀
整體來講，HP Pavilion 14 / 15 整體表現都算唔錯，因為功能及效能都頗全面，而且用來做 DR 機款，無論係上網、打機、睇戲都能一一滿足。雖然熒幕質素只屬一般，但以 5 千多元的售價來講，都算值回票價。
不過如此多規格的機款應如何選擇？Edward 就覺得 15 吋採用 AMD CPU 及 AMD Radeon 獨顯顯示卡的機款最為抵玩，5 千多元的機款有四核心處理器、獨顯及 1080p 觸控熒幕，確實是「夫復何求」？不過唯一缺點是此機只有銀色選擇，如果想買其他顏色的機款，你只可以購買 Intel CPU 的款式。要靚還是抵玩？就睇大家自己的需要及預算多少了。
售價：$5,099 起（HP Pavilion 14）；$5,599 起（HP Pavilion 15）
查詢：HP（800 938 833）
分享到 :
最新影片
