本身住屯門既小編，平時好鍾意四圍搵食，但要食到特別既街頭小食好多時都要去到旺角、銅鑼灣，單單係車費都要幾十蚊。最近胃食既屯門友就有好消息啦！由安定同友愛合併而成既商場 H.A.N.D.S，舉辦左一個名命 「H.A.N.D.S 手創仲夏祭」既市集，由 7月19日 至 8月9日 星期六、日都會有10大潮流創意美食的，包括韓式U型粟米筒雪糕、港產手工鮮果雪條、長洲韓式焦糖餅、懷舊蜜糖星星雞蛋仔和抹茶紅豆雞蛋仔等，等緊大家！而小編亦都急不及待為各位 wire 民試齊咁多種美食啦！哈哈！
1) N*ice Pops 手工雪條
夏日炎炎最好就食番支鮮果雪條降溫，不含人工添加、天然果味，食落都特別清甜。而講到鮮果雪條就一定要講 N*ice Pops ，雖然係好多展覽、party 你都可能見過，不過佢無實體店舖，暫時只能係幾間餐廳中食到，所以今次有幾會就一定要試下啦！
稀有度：★★★★☆
創意度：★★★☆☆
甜度：★☆☆☆☆
抵食度：★★☆☆☆
小食評：小編試左今季最新推出既士多啤梨檸檬，味道偏酸，果肉不多，適合炎熱既天氣下解解渴。
▲ 鮮果雪條每種口味都經過混合製造而成，例如：芒果雪條就由西瓜汁、青檸汁及甜椒粉混合而成，而菠蘿熱情果雪條就由菠蘿蓉、熱情果及rum酒混合而成，味道特別。
2) 韓式U型粟米筒雪糕
最近由韓國引入既粟米筒雪糕，係出面通常見到既粟米筒雪糕都係 J型，雪糕注入係香脆既甜筒入面，外型有趣之餘，口感非常特別。而係今次市集所見既就係 U型，可以分開一半，變成兩條 J型粟米筒雪糕，同朋友一齊分享。
稀有度：★★★★☆
創意度：★★★☆☆
甜度：★★★☆☆
抵食度：★★★★☆
小食評：粟米筒同雪糕比例剛好，一口咬下去，鬆脆既粟米筒配合雪糕，外脆內滑。
▲ 一個人食的話，份量可能略多，搵多個人一齊分享會比較好。
3) H.A.N.D.S x Chef Koo 煙肉香芒杯子蛋糕
煙肉香芒杯子蛋糕係由人氣甜品大師 Chef Koo 為今次市集特製，上面既朱古力牌就係商場既標誌。
稀有度：★★★☆☆
創意度：★★★★☆
甜度：★★★☆☆
抵食度：★★★☆☆
小食評：鹹既煙肉配合微酸既芒果味，食落沒有杯子蛋糕既死甜，反而更有驚喜。
4) H.A.N.D.S x Chef Koo 朱古力棉花棒棒糖
朱古力綿花棒棒糖同樣由人氣甜品大師 Chef Koo 為今次市集特製，有中間夾心有黑加侖子、香芒百香果、紅桑子三種不同味道。
稀有度：★★☆☆☆
創意度：★★★★☆
甜度：★★★★☆
抵食度：★★☆☆☆
小食評：包裝好似波板糖咁，非常可愛。兩塊朱古力脆片夾著軟軟既夾心，口感特別。
5) 抹茶紅豆雞蛋仔
係傳統雞蛋仔中加入大熱既抹茶口味，淡淡的抹茶味外殻包裹著中間粒粒紅豆。
稀有度：★★★☆☆
創意度：★★★☆☆
甜度：★★★☆☆
抵食度：★★★★☆
小食評：抹茶紅豆與雞蛋仔原先既味道好夾，但小編略厭沒有抹茶應有既苦澀味。
▲ 唔知點解抺茶味同平時雞蛋仔光滑既表面唔同，出現一個個細孔，外觀上有 D 輸蝕。
6) 蜜糖星星雞蛋仔
雞蛋仔同蜜糖星星都可以話係香港人童年必食，而今次就將兩者結合，係每粒雞蛋仔中加入蜜糖星星，睇到都好想食一留粒。
稀有度：★★★☆☆
創意度：★★★☆☆
甜度：★★★☆☆
抵食度：★★☆☆☆
小食評：雞蛋仔同蜜糖星星既口感就唔太夾，食落去咸咸地甜甜地，不過單睇外表已經加唔少分了。
▲ 每粒雞蛋仔都有一粒蜜糖星星，單睇外表已經加唔少分。
7) 手型脆皮棉花糖
兩片手掌型夾糖皮住一粒朱古力脆皮棉花糖，包裝成好似波板糖咁，非常可愛。
稀有度：★★★☆☆
創意度：★★☆☆☆
甜度：★★★★☆
抵食度：★★☆☆☆
▲ 一支支唔同顏色既手型脆皮棉花糖放埋一齊，感覺非常浪漫。
▲ 除左脆皮棉花糖，同一架車內仲有好多非常吸睛既甜品呢！
8) 長洲韓式焦糖餅
長洲美食多就係人都知，但依家就唔洗搭船都可以食到韓式焦糖餅。焦糖餅係將糖烤熱、攪拌，再壓扁成圓形，最後畫上簡單的圖案，例如愛心、圓圈、星星等。
稀有度：★★★★☆
創意度：★★★☆☆
甜度：★★★★★
抵食度：★☆☆☆☆
小食評：焦糖餅脆脆地，而味道就係甜得嚟再點焦糖既苦味，要幾個人分享先食得晒呢！
9) H.A.N.D.S 手製糖果
睇落普普通通既糖果，其實工夫比想像中繁複好多，不但要調校糖漿味道、搓糖、塑形，過程中溫度要控制得宜，仲要靠師傅強勁既臂力將半硬的糖果拉成幼條。
稀有度：★☆☆☆☆
創意度：★★☆☆☆
甜度：★★★★☆
抵食度：★★★☆☆
▲ 手工糖最特別既地方當然唔係味道，而係可以自己揀整 D 咩字同圖案係糖入面啦！
▲ 同一架車內仲有果汁糖、以及棒棒糖三大類等手工營果可以選擇。
10) 花式棉花糖
呢一檔唔可以話係咩新潮美食，反而係主打懷舊，不但有整到好似花咁靚既棉花糖，仲有楊枝金露同芒果糯米滋添！
稀有度：★★★★☆
創意度：★☆☆☆☆
甜度：★☆☆☆☆
抵食度：★★★☆☆
小食評：棉花糖咩味，我諗唔洗點講，大家都知，不過花型既棉花糖就唔係度度都有得賣啦，難得呢度有，一於買嚟自拍下吧！
▲一粒粒芒果糯米滋睇落好有 DIY 既感覺呢！
美食以外
美食以外，其實市集仲有其他 DIY 飾物售賣架！另外，商場 L3 露天平台仲有夏日戶外遊樂場同互動體感遊戲俾大家免費玩，可以話係屯門區居民一次難得既福利呢！
▲ 除左食，市集仲有 DIY 既飾物售賣架！
▲ 係 L3 露天平台仲有夏日手搖船玩添！小朋友都玩得好開心啊！
▲ 飄浮球樂園就可以考考你既眼界同臂力，又睇下用豆袋可以一次過掉中幾多個浮係空中既波。
依莉詩感言
安定同友愛呢兩個商場本來就係陪伴小編成長既地方，小時候日日落公園玩都會經過。以前呢個商場雖然無冷氣，但每一間細鋪都充滿人情味，望住佢一部份一部份咁裝修，到依家都變晒連鎖店。由一個屋邨商場，變成好似屯市既一部份咁。雖然係多左好多乾淨既食肆，街市既都行得舒服左，有手推車用，入去仲有人同你講歡迎光臨，但我依然懷念以前朝朝係大排檔飲個杯熱朱古力。
分享到 :
最新影片
