仲有一個星期，OnePlus 的 OnePlus 2 就會發佈。早前已流出過有關此機的邀請函及用木作機殼材質的傳聞，今日中國工信部更爆出疑似係此機的外型，亦有試相、真木材機背及跑分流出！想知更多詳情如下：
這就是從工信部流出的疑似 OnePlus 2 外型，說老實小編覺得無乜特別，機身前面熒幕下方的應是指紋辨識器，而機背鏡頭下方的，就應該係類似 LG G4 的激光輔助對焦功能。至於機背方面，從此機圖似乎不像是木材質料，只是一般塑膠。但係咪代表 OnePlus 2 唔會用木做機殼？
又唔係喎！有微博用家就流出這個疑似係 OnePlus 2 機背的相片，可以見到整體設計同工信部流出的 OnePlus 2 機背設計十分接近，但它就用上木紋，明顯係木材物料來。睇來之前傳聞 OnePlus 會出幾個版本的 OnePlus 2 有機會係真，又或者純粹可以俾用家自己換殼，好似 LG G4 咁想膠殼得想皮殼亦得？
此外，unwire 亦收到讀者報料，這個疑似是 OnePlus 2 的安兔兔評測跑分資料，可以見到 OnePlus 2 雖然同其他旗艦手機一樣，用上 Qualcomm Snapdragon 810 八核處理器，但它竟然獲得 63,719 分！成績比同樣採用此處理器的 Sony Xperia Z3+ 及 HTC One M9、或者採用自家 Exynos 處理器的 Samsung Galaxy S6 / S6 edge 都要高！真係好誇張，相信應係同佢採用 4GB DDR4 RAM 有關。
至於大家都好關心的相機成像方面，今日一加社區都有官方流出比較相，上面左方是疑似用 OnePlus 2 拍照的相片，而右方就是 iPhone 6 拍攝的相片。從相片可以睇到 OnePlus 2 在低光環境下，雜訊比較低比較乾淨，天空的黑色亦不會像 iPhone 般灰灰地咁，似乎真係唔錯。
但以上的，畢竟全是傳聞。一日 OnePlus 2 未發佈，一日都有可能改的。但睇過上面的傳聞，各位 wire 民又覺得點？小編就覺得除了外型，其他都係好吸引嘅！
來源：新浪微博、GizChina、一加社區
相關文章:
【報價】OnePlus 12 港行正式發表 黑、綠兩色任揀 + 定價公佈
分享到 :
最新影片
