如果講起平板，相信唔少人都覺得 iPad 系列應係最好的選擇；不過 iOS 系統始終較為封閉，使用起來唔夠 Android 方便。Samsung 昨日就正式係香港推出新一代 Galaxy Tab S 平板：Tab S2，設有 8 吋及 9.7 吋兩種選擇，究竟用落係點？就等筆者 Edward 係詳細試用後為大家分享一下使用感受啦。
轉用 4：3 芒更輕薄更方便工作
舊年六月，Samsung 就推出了旗艦系列的 Galaxy Tab 平板：Tab S，唔止用上 2K 芒，而且機背仿皮手感真係唔錯。今年推出第二代 Tab S2，就一改上代採用 16：10 熒幕比例的長長機身，而選用 4：3 熒幕比例的 8 吋 / 9.7 吋熒幕，拿係手上除咗無 iPad mini 3 的機背金屬感外，其他都真係（抄得）幾似！
改用 4：3 比例熒幕的好處是更方便商業用途，直身看文件更舒適，16:9 格式看不到幾個字就換行！而且橫向用個時單手揸比較好手感；但缺點就係睇片個時上下會出現更粗黑邊（因為多數影片都係採用 16：9 比例），用唔盡成個熒幕。
▲大細上，iPad mini 3（左）同 Galaxy Tab S2 8.0（右）相比真係好接近。
▲厚度方面，iPad mini 3（左）同 Galaxy Tab S2 8.0 亦差唔多。
▲相比上代 Tab S 8.4（右）採用 16：10 比例熒幕，今代 Tab S2 8.0（左）採用 4：3 比例熒幕，明顯令機身闊了少許，但長度就大大縮短。
▲不過睇片個時，頂同底嘅黑邊會比上代更粗！（上代採用 16：10 比例熒幕都會有黑邊，但相對幼好多。）
▲由於機身輕，單手拿一段時間都不太累
▲單手都勉強可以操控得到。
▲機身做得好薄。
▲3.5mm 耳機插孔、MicroUSB 插槽及喇叭均設於機底。
▲最後 Edward 係現場都發現外國未曝光過的金色版 Galaxy Tab S2 8.0，但呢種金色始終無上代 Tab S 8.4 的金色般好睇（Edward 個人感受……）。
▲另外 Galaxy Tab S2 亦會同其他廠商的平板一樣，預載 Microsoft Office 完全版 APP，令大家係平板上可以新建、編輯及閱讀 Office 檔案。
▲Galaxy Tab S2 的用家亦會獲贈 100GB 的 OneDrive 儲存空間，呢一樣亦係同其他廠商睇齊。
機身輕但少少跣手
至於手感方便，Tab S2 輕係輕，但係機背就改番採用一般塑膠物料，無上代 Tab S 採用仿皮物料咁唔易跣手，感覺好似 cheap 咗（雖然售價都有調整，減咗 $10 咁大把），而且跣手咗，加上機身輕了薄了，所以係街度拿住用個時，真係要小心唔好比人撞跌部平板呀！
▲上代 Tab S 8.4（底）採用仿皮物料，相比今代 Tab S2 8.0（面）採用一般塑膠機背物料，後者更容易跣手，手感亦無咁 grand。
相關文章:
【評測】Samsung Galaxy Tab S10 Ultra 開箱評測 機身較薄但偏重 + 熒幕顯示出色舒服 + 旗艦級效能打機剪片都得 + 定價偏貴入手門檻高
AMOLED 依舊偏冷色
今次的 Tab S2 都係採用 2K QHD Super AMOLED 熒幕，不過由於熒幕比例由上代 16：9 改為今代的 4：3，所以解像度亦由 2,560 x 1,600 跌至只有 2,048 x 1,536，點距亦由上代約 359ppi 跌至今代的約 320ppi。好彩呢啲都係數據上的下調，實際睇落細緻度同上代分別唔大。
不過要求色溫準的話，它未必合乎你要求！其實上代 unwire 記者測試時都覺得 Tab S 的 Super AMOLED 熒幕色溫偏冷，而去到今年的 Tab S2，這情況似乎依舊，拿來 iPad mini 3 與 Tab S2 8.0 一比，就覺得 Tab S2 有少許偏藍問題。
Spyder 測色溫 / 光暗比併 iPad mini
筆者拿來測試熒幕的專業工具 Spyder 5 測試 iPad mini 3 及 Galaxy Tab S2 8.0 的熒幕在顯示白色時的色溫讀數。一準標準來說若白色讀數約為 6,500K 為最佳，高於此數為顏色偏冷(藍)，低於此數為顏色偏暖(黃)
Spyder 數據顯示 iPad mini 3 的白色色溫讀數為 6,397K，十分很接近 6,500K ；但 Galaxy Tab S2 8.0 白色讀數為 7,153K，有偏冷（藍）的問題，就算肉眼看都會感到。當然有些用家未必太在意「夠唔夠白」，但如果經常 Show 相片 / 樣版給客戶看的話， iPad mini 相對比較可信
▲為求證，Edward 拿來 Spyder 5 專業熒幕測試工具，試一試 iPad mini 3 及 Galaxy Tab S2 8.0 的熒幕色溫讀數。
▲Galaxy Tab S2 8.0 的熒幕，色溫讀數達到 7,153K，明顯有輕微偏冷色情況。
▲相反 iPad mini 3 的熒幕，讀數就是 6,397K，與真正白色的 6,500K 極為接近！
相關文章:
【評測】Samsung Galaxy Tab S10 Ultra 開箱評測 機身較薄但偏重 + 熒幕顯示出色舒服 + 旗艦級效能打機剪片都得 + 定價偏貴入手門檻高
iPad Mini 3 比較亮一丁點
至於光度方面，Edward 同樣拿來 Galaxy Tab S2 8.0 與 iPad mini 3，並將兩機的亮度調至最高，再以 Spyder 5 測試了一下，發現 Tab S2 8.0 有 336.32cd/m2， iPad mini 3 就有 367.09cd/m2 略光一點。但如果係日常生活上，呢個差別應該唔會太影響使用感受嘅。
指紋辨識更好用
其實係上代 Galaxy Tab S 8.4 / 10.5 上，Samsung 早已加入指紋辨識器在 Home 鍵位置，不過那時的辨識方法是要將手指從上而下滑過 Home 鍵才可辨識得到，變相令辨識成功率大大降低。今代 Galaxy Tab S2 8.0，Samsung 就改用早已係 S6 / S6 edge 上應用了的全新指紋辨識器，Edward 試用過覺得效果同 S6 / S6 edge 差唔多（自然係比上代好好多！），基本上手指襟落去好快就解到鎖，呢一點 Edward 覺得係抵讚的。
▲今代 Galaxy Tab S2 同樣有加入指紋辨識功能，而且採用 S6 / S6 edge 的一按即感應設計，唔似上代 Tab S 8.4 般需要將手指由上而下係 Home 鍵掃一掃先解到鎖。大家從以下影片就睇得到個效果啦。
Samsung Galaxy Tab S2 指紋解鎖比上代更方便
Posted by UNWIRE.HK on Tuesday, 28 July 2015
▲用指紋辨識，同 S6 / S6 edge 一樣，唔止可以為熒幕解鎖，仲可以選擇用於網站登入或驗證三星帳戶。
相關文章:
【評測】Samsung Galaxy Tab S10 Ultra 開箱評測 機身較薄但偏重 + 熒幕顯示出色舒服 + 旗艦級效能打機剪片都得 + 定價偏貴入手門檻高
效能沒 S6 / S6 edge 出色
作為旗艦 Tab 系列的 Tab S2 8.0，而且今年較早時份 Samsung 已推出更強勁，以及採用最新 14nm 制程的 Exynos 7420 4+4 核處理器的 S6 / S6 edge，很多人猜測今次應該都會採用同級、甚至更強勁的處理器吧。誰知道 Samsung 竟然來個「反高潮」，只在今次的 Tab S2 上採用 Exynos 5433 4+4 核處理器！雖然係架構上，Exynos 5433 及 Exynos 7420 都係用 Cortex-A57 + Cortex-A53 設計，但係制程上只是 20nm，比 S6 / S6 edge 的處理器落後一個 generation。
結果就係係安兔兔評測上，只獲得 43,574 分的分數，比 S6 / S6 edge 所獲得的 55,519 分低出一截。當然係一般使用上，用家應該唔會感覺到太大分別，畢竟 Tab S2 的規格與 Tab S 相比，始終是有所升級，但既然有更佳效能的手機推出在前，為何今次 Tab S2 卻用上次一級的硬件？莫非是 Exynos 7420 產能不足，導致 Tab S2 需要使用次一級的新處理器「頂替」？又或者因為今年稍後時份有更強勁效能的 Tab S2 機款推出，所以今次係 Tab S2 上要「忍手」？相信箇中原因要 Samsung 自己先至知道了。
▲Galaxy Tab S2 預載了 Android 5.0.2 Lollipop 作業系統，仍未更新至最新的 Android 5.1.1。
▲以安兔兔評測測試 Galaxy Tab S2 8.0，只獲得 43,574 分，比之前推出的 S6 / S6 edge 明顯低得多。
影相唔錯，夜景一般
至於影相方面，今次的 Tab S2 採用了 800 萬像素 F/1.9 光圈主鏡頭，前鏡頭亦具備 200 萬像素，基本上同上代相同。操控上就採用了 S6 / S6 edge 的介面，攝影模式亦大致相同，對於 S6 / S6 edge 用家來講，上手應無大問題。至於質素方面，Edward 使用 Tab S2 8.0 的主鏡頭影過幾張相，發覺整體來講都算唔錯，清晰度高之餘顏色亦算自然，唔會過份誇張。不過相片暗位，又或者係較暗環境影相時，雜訊就十分明顯。但作為一部平板，影相功能始終屬於其次，相信都可以滿足大部分用家的要求。
▲相機介面上，基本上同 S6 / S6 edge 相同。
▲模式上，Galaxy Tab S2 ２同樣有「專業」模式。
試相區
相關文章:
【評測】Samsung Galaxy Tab S10 Ultra 開箱評測 機身較薄但偏重 + 熒幕顯示出色舒服 + 旗艦級效能打機剪片都得 + 定價偏貴入手門檻高
鍵盤 cover 打字手感佳
講完平板本身，就講講啲配件啦！今次 Samsung 除了繼續有為 Tab S2 8.0 / 9.7 推出專用磁吸開關筆記式保護套外，亦為 Tab S2 9.7 吋機款推出專用的磁吸藍牙鍵盤保護套。Edward 係現場就試玩過，打字舒適度同 Sony 為 Xperia Z4 Tablet 推出的藍牙鍵盤差唔多，但最好嘅係多好多專用制，例如：中英文輸入切換襟個「Lang」制就得，要擷取熒幕亦有專用制，使用上令大家唔洗掂個芒都可以做到有限度操控，呢一點真係抵讚！
▲Samsung 今次有為 Galaxy Tab S2 9.7 推出專用藍牙保護套。
▲打字起來十分舒服，拍得住 Sony 為 Xperia Z4 Tablet 推出的藍牙鍵盤。
▲鍵盤亦有唔少專用鍵，包括：擷取熒幕、主頁、程式切換等，亦有切換輸入法的 Lang 鍵（位於空白鍵旁），令大家可以單用鍵盤也可某程度上操控平板本身。
▲今次 Samsung 亦有為 Galaxy Tab S2 8.0 / 9.7 推出專用筆記式保護套，亦支援 3 種不同高低的擺放模式。
總結：熒幕少許偏冷，驚喜度不大
整體來講，Samsung Galaxy Tab S2 8.0 俾 Edward 筆者的最大感覺，就係一個字：輕。但老實說，上代 Tab S 8.4 已經輕過一次，今次雖然再輕身啲，但新鮮感已沒有上代般高。反而改用 4：3 比例熒幕有好不不好，方便看文件但睇片上始終無上代可以真正全熒幕欣賞般爽，加上「冷 」芒情況似乎問題依舊，對於較喜歡自然色的筆者來講，係扣分扣得最勁的地方。加上沒有了仿皮機背，令拿係手上時較為跣手，雖然仍然可以插 microSD 記憶卡加大儲存空間，亦係白、金兩色機身上加入黑色有多個選擇，但始終「瑕不掩瑜」。如果真要筆者揀部 Tab S 平板，我真係寧願揀番上代 Tab S 8.4 了，可能覺得 Android Tablet 係偏向娛樂型，widescreen 睇片打機會比較爽。
售價：$3,088 / $4,088（Tab S2 8.0″ Wi-Fi / LTE）；$3,888 / $4,888（Tab S2 9.7″ Wi-Fi / LTE）
查詢：Samsung（3698 4698）
相關文章:
【評測】Samsung Galaxy Tab S10 Ultra 開箱評測 機身較薄但偏重 + 熒幕顯示出色舒服 + 旗艦級效能打機剪片都得 + 定價偏貴入手門檻高
分享到 :
最新影片
