本來上星期發現咗照銀紙電筒都可以照到 Gel甲之後，依莉詩我已經覺得 LED燈機只係不外如是。不過最近喺網上見到 ETUDE HOUSE Gel甲套裝嘅燈機之後就即刻令我著迷。粉紅色嘅亮面機身，就好似一個寶盒一樣非常夢幻，於是我就膽粗粗借咗一套嚟試下，睇下 D 色油喺咪一樣咁夢幻。
相信呢部燈機最吸引嘅地方一定喺佢嘅外表，長方形、粉紅色亮面就好似一個寶盒，愛糖果色系嘅女仔一定鍾意。但講到效能方面，雖然佢有 36顆 LED燈，而且密封式設計可以更均勻照射每隻指甲，但佢就無之前試過嘅 Depend 同 Nailla 燈機咁快，要 45秒先照得乾。聽落只係差 15秒，但當你塗底油多 15秒、色油多 15秒、面油又多 15秒，如果想整得靚 D ，色油、面油要塗兩層以上，手指公又分開照燈的話，實際上可能多咗 5、6分鐘。
▲ 粉色系統嘅甲油同淺粉紅色嘅燈機有著 ETUDE HOUSE 一貫嘅風格。
▲ 呢部燈機用嘅 LED燈同 Depend 、 Nailla 燈機唔同，唔會清楚睇到一個個燈泡 ，而係一塊連接多顆燈嘅平面。因此上蓋比較薄身，而且輕身。
▲ 同時呢部燈機都有計時功能，按下電源按鈕，燈機會喺 45秒後自動關閉。不過我就唔太鍾意呢粒黑色橡膠按鈕，同粉紅色機身總喺格格不入。
▲ 另外，最奇怪嘅係轉換插同插頭顏色唔同，令靚靚嘅燈機分數大減。
今次 ETUDE HOUSE 推出嘅色油有 50種色，分佈喺 10個唔同風格嘅限量套裝，都算多顏色選擇。而我所借到嘅套裝有 5支，分別係鮮紅、寶藍色同偏紅、偏橙、偏紫嘅粉紅。如果 5種色同時油到一個人嘅手上，確真有點奇怪，所以小編今次借來了兩位女同事嘅肉手嚟試色。質地上，色油比 Depend 的稀，較鮮色嘅紅色同藍色都最少要油兩層先出到色，而且較難控制。顏色方面，塗左一日，暫時都無 Nailla 甲油既變色情況，應該可以 keep到一段長時間。
▲ 紅色同藍色都幾 sharp，適合野性嘅女仔，或者用來畫花。
▲ 而偏紅、偏橙同偏紫嘅粉紅就非常可愛。
今次 ETUDE HOUSE 推出嘅 Gel甲套裝有 D 奇怪，只喺包含 LED 美甲機同 5支色油，但都要 $550。如果新手想整 Gel 甲就要另外再買一套 $150 嘅 Gel Nail Removal Set，包括 Base Gel、Top Gel、Cleanser 同 Remover，而且仲未包括木棒、卸妝綿待修甲用品。新手要買齊嘅話，計落比起 Depend 同 Nailla Gel甲套裝貴成二、三百蚊。如果只係想買嚟試下真係要諗諗。
但就算玩開 Gel甲，屋企有一定物資，ETUDE HOUSE 嘅色油無得單買，睇中一隻色就要買埋部燈機又好似唔太化算，所以依莉詩覺得如果燈機同色油可以分開買應該會更好。
售價：$550
查詢：ETUDE HOUSE (2375 2875)
