同 Tap & Go 死過!Smartone 推 KISS 流動支付 + 宣傳平台硬撼 csl.

讚好此文:

八月 13, 2015 •生活娛樂, 評測

DSC04832RS

Apple Pay 及 Samsung Pay 推出之後,繼有 HKT 推出「Tap & Go 拍住賞」,近日電訊商 Smartone 亦表示將推出名為 KISS 的流動支付兼網上營銷平台,標榜重新定義零售商和消費者營銷模式。對我哋普遍消費者又有咩著數呢?而家就同大家解釋下。

iPhone 都用到!

有別於暫時只支援 Android 的 HKT Tap & Go 拍住賞,又或者 Apple Pay 只限 iPhone 及 Apple Watch 使用,Samsung Pay 亦只限於 Samsung 機款使用,KISS 不論 Android 或 iOS 用家都可以使用,而且唔洗一定係 Smartone 客戶都用到,變相唔洗迫大家轉機款或網絡商,呢樣真係好體貼。用戶只要於 Google Play Store 或 App Store 下載相關應用程式,就可以享受 KISS 服務。

DSC04871RS

集付款、拿著數平台於一身

消費者唔止可以透過 KISS App 進行流動付款,KISS APP 仲支援 iBeacon 或藍牙功能,只要消費者踏入商店,它就會主動詢問用家是否接收優惠或產品資訊,如果消費者允許,就可以取得商戶優惠及推廣的資訊及更新。另外,每間採用 KISS 平台的商戶,均會設有一個或多個 KISS 插卡機,用戶可每日於 KISS 參與商戶消費或拍取呢啲裝置時得到不同金額的 KISS Dollar,下次消費時就可以當現金洗,變相消費者有著數拿,商戶亦多個平台推廣店舖優惠或宣傳新上架產品,互惠互利。

DSC04849RS DSC04853RS

UltraSound + NFC 功能於一身

可能大家去到呢度都會問:點解 KISS 平台可以「能人所不能」,做到無論 iPhone 定係 Android 手機都可以做到流動付款?其實每部 KISS 拍卡機(包括打卡或擷取商品資訊 / 優惠的拍卡機,以及用於付款的 POS)都支援兩種技術:UltraSound 及 NFC。如果裝置感應到手機支援以 NFC 配對,就會優先採用 NFC;如果裝置感應到手機不支援 NFC,又或者用家沒有開啟 NFC 功能,就會發出人類聽唔到的超高頻音效,而如果手機亦開啟了 KISS APP,亦會同時發出可配對的超高頻音效,當裝置感應到兩條音頻數據吻合,就可以完成配對認證,消費者就可以打卡、睇產品資訊拿 KISS Dollars,又或者進行流動付款了。筆者亦係現場測試過,發覺整個過程只係歷時 1、2 秒左右,十分有效率。另外,可能有人會問:如果手機用家關閉了手機的音效,又或者調較了震機模式,會否令 UltraSound 配對失效?SmarTone 方面就表示唔會,亦唔洗要求用家解除靜音先配對到,因為手機係 KISS APP 內如要進行付款或擷取資料,都會強制發出用於配對的超高頻音效,變相唔洗麻煩用家。

DSC04842RS

保安有保障要 hack 超難

去到呢度,作為消費者的大家,可能會有另一個疑惑:咁傳輸過程全程使用無線傳輸資料,會唔會導致相關付款資料被 sniff 到,因而外洩?SmarTone 方面就表示呢個可能性係極低,因為 POS 與手機之間,無論係用 UltraSound 定係 NFC 技術,都只係由手機傳送出指示付款的動作,而真正傳送交易資料的線路,是 POS 與伺服器之間的連線。雖然該連線係以 4G LTE 網絡傳送,但每宗交易都會有自己獨特兼只會使用一次的 Token,而且資料均被有效加密,所以就算被駭客 sniff 到資料,唔止只係一堆無意義的訊息,就算駭客可破解相關訊息,由於每次交易都會採用獨特的 Token,所以仍然係無法有效盜用消費者的付款資料,於背後進行非法交易。

DSC04837RS

 

 

仍然唔可以拿錢

HKT 嘅 Tap & Go 拍住賞雖然都幾方便,不過有用家就覺得入咗錢落去,要拿番錢出來就要俾手續費,其實都幾麻煩。今次 SmarTone 又有冇進步?Sorry 啦,其實係更退步,因為他們表示如果要拿番係 KISS Wallet 入面嘅錢,就只有取消 KISS 服務,然後就等 SmarTone 以支票退回戶口剩餘金額一途。但又咁睇:呢個 Wallet 對於消費者來講,都係拿著數同埋俾錢嘅平台,而且佢亦同 Tap & Go 拍住賞一樣,可以駁住信用卡俾錢,SmarTone 採用呢種做法就可以避免萬一不慎遺失手機,都唔會入面啲錢俾人偷哂;而平時亦唔驚俾消費者當「提款機」從信用卡透支現金使用,實屬係比較安全嘅做法。

DSC04861RS

總結:最緊要睇幾多商戶參與!

流動支付係全球大趨勢,香港繼 HKT Tap & Go 拍住賞服務推出後,再有 SmarTone 推出 KISS 平台,仲要支援上更加完善,對於消費者來講肯定係好事。另外 KISS 唔係一個流動支付平台咁簡單,佢仲係一個 Shopping 同埋店舖可用於宣傳品牌或產品嘅平台:以往如果我要知道一個品牌出咩新衫,就要 Download 嗰個品牌出嘅 App 先知道。一個半個自然無乜大問題,但如果喜歡品牌眾多,一個品牌一個 App,好快手機就有好多個依啲 App,要管理真係好麻煩。依家有 KISS 就可以用一個 App follow 晒好多個品牌嘅優惠及推廣的資訊,仲要可以賺取 KISS Dollars 當錢洗,真係方便得多。相信想享受手機支付服務嘅 iPhone 用家,今次應該好期待。不過 KISS 的其中一個重要功能,始終是作為支付平台,而要成功最重要始終係參與商戶要夠多,否則功能點勁都係冇用!而且 SmarTone 表示,而家仲未知 KISS 的正式推出時間表,所以 Android 手機用家,都係用住八達通或者 HKT 嘅 Tap & Go 拍住賞先啦!至於 iPhone 手機用家,都無計,可以做嘅,就只有等。

DSC04832RS

 • 不想錯過新科技 ? 請 Follow unwire.hk FB 專頁http://facebook.com/unwirehk/
• 要入手生活科技潮物 即上 unwire store
https://store.unwire.hk/

Tags: , , ,

讚好此文:


Comments are closed.

unwire TV



更多同類文章:

最新文章