即將會係 9 月 3 日先上映既《絕地狂逃》，小編已經係早前睇左首映場，入場前睇預告發現 Owen Wilson 主演同成個題材，本身已經唔抱任何期望但仍拋開成見去睇；可惜既係由頭睇到落尾完場 100 分鐘，小編只係想講「不如你還返我人生 100 分鐘比我好過？」想知點解就緊係要留意以下內文：
泰國取景夠誠意 音效配樂極具東南亞特色
雖然小編認為佢係年度爛片，但亦都有少少既可取之處既。故事講述美國工程師 Jack 被派往泰國工作，於是帶埋老婆同兩個女一齊去； Jack 以為去到泰國開展美滿新生活之際，泰國人民因政府基建為名中飽私囊奴役人民爆發騷亂，一家人展開逃亡之旅。咁故事講述泰國暴亂，所以成套戲都係用返泰國取景，係開首更加有幾幕當地人既生活照，令觀眾可以更快投入成個環境，係幾夠誠意；而且音效配樂捉得住節奏之餘，亦都有東南亞既特色，唔會有格格不入既問題出現。
騷亂一觸即發 唔囉嗦但好似好急
由 Jack 落地到騷亂發生，其實可能唔夠 10 分鐘： Jack 出一出去買啲野，然後發現成條街突然寧靜，緊住店鋪立刻落閘，騷亂即刻發生。入戲玉仲快過台灣 hold 住姐既「一秒變格格」，小編就覺得唔囉嗦有好有唔好：如果無睇定預告故事情節，相信要去到中段先捉到點解會爆發騷亂，即使前面有少少隱喻；但就算小編睇左預告，都係覺得好似有啲急咁。
慢動作用太多 累贅到令人煩厭
以上就講晒小編覺得既優點，但令佢成為爛片既元素就多到不得了！就好似慢動作畫面，用一次幾 impressive，用兩次開始煩，第三次就已經厭爆。 Slow motion 係成套戲一而再再而三咁出現，其實觀眾同小編都睇得幾厭啦。尤其係用既情況拿挰得唔準確，小編成個感覺就係為用而用，um…. 攝影師到底係有幾咁鍾意拍慢動作呢？
震動鏡頭當緊張逃亡 「其實觀眾對眼睇得好攰」
講到逃亡，攝影師最鍾意而且必用既緊係不停震動既鏡頭畫面，「夠緊張啊嘛！」但係由頭震到落尾的話，其實就唔係緊張而係頭暈。震動幅度大得驚人，有某幾個位完全 feel 到只係攝影師係咁搖個鏡頭就算，製作唔認真既程度簡直嚇死街坊。
太多訊息想帶出 完美演繹蜻蜓點水
雖然套戲明顯唔賣內涵，但都好明顯睇到想嘗試係戲中情節內容擺啲正面訊息，例如：（少量劇透！）無分職業貴殘，泰國妓女不介意讓 Jack 一家人留在妓院過夜，展現人性光輝；一但殺過人，無論任何理由就算係自衛，殺人果個已經回不去之前既自己啦；美國人藉故奴役泰國人民並非任何見得光之事，但泰國人民暴動漫無目的追殺當地外國人並非正當行為。其實好多訊息想講，可惜就係得咁少時間，又無咩特別處理，結果咩都交代得唔好，比蜻蜓點水更蜻蜓點水。
情節發展到結局 意料之中既「離奇」
套戲英文名就叫 No Escape ，不過小編就算劇唔劇透讀者都絕對估到個結局又係同套戲個名唔一樣既啦！其實情節本身已經行得急，所有野都交代得唔清唔楚，變相好多唔合理既位同睇唔明既位；而結局變到「Yes They did escape!」更係自打嘴巴，更重要係由 No 到 Yes 個下，絕對睇到觀眾「吓」到下巴跌落黎！
三個字總結：「趕收工」
其實由編劇到攝影師，以至到所有演員既演出，成套戲比小編既感覺就係「早完成早收工」；泰國騷亂咁敏感既題材可以做得更有深度更具震撼性。相反， No Escape 完完全全展現無內涵唔賣特技兼喪震既爛片元素，睇完無任何 mental 上既野帶得走仲要暈陀陀咁走出戲院。既然用三個字「趕收工」可以總括晒成套戲，咁小編就比 3 分你就好了！
評分： 3/10
分享到 :
最新影片
